ފިންލެންޑް ބަލިކޮށް، ރަޝިއާ އުންމީދު އާކޮށްފި

ޕީޓާސްބާގް (ޖޫން 16) - ޔޫރޯ 2020ގައި ކުޅުނު ފުރަތަމަ މެޗުގައި ތަފާތު ބޮޑުކޮށް ބަލިވިޔަސް، މުބާރާތުގައި މިރޭ ފިންލެންޑް އަތުން 1-0 އިން މޮޅުވެ، ރަޝިއާ އިން ދެވަނަ ބުރުގެ އުންމީދު އާކޮށްފި އެވެ.

މި މުބާރާތުގައި ކުޅުނު ފުރަތަމަ މެޗުގައި ބެލްޖިއަމް އަތުން ރަޝިއާ ބަލިވީ 3-0 އިންނެވެ. އަނެއްކޮޅު، ފިންލެންޑް ވަނީ މުބާރާތުގައި ކުޅުނު ފުރަތަމަ މެޗުގައި ޑެންމާކް އަތުން މޮޅުވެފަ އެވެ.

ރަޝިއާގެ ސެއިންޓް ޕީޓަސްބާގްގައި މިރޭ ކުޅުނު މެޗުގެ ފުރަތަމަ ހާފު ނިމުމުގެ ކުރިން ރަޝިއާގެ ލަނޑު ކާމިޔާބު ކުރީ އަލްކްސެއި މިރާންޗުކް އެވެ. އޭނާ ލަނޑު ޖެހީ އާޓެމް ޒޫބާ އާއި ދެ ކުޅުންތެރިންގެ "ކޮމްބިނޭޝަން" ބޭނުންކޮށްގެނެވެ. އޭރިއާގެ ތެރެއަށް ބޯޅަ ހިފައިގެން ވަންނަން މިރާންޗުކް އަށް ޖާގަ ނުލިބުމުން، އޭނާ ކުރު ޕާހެއް ދިނީ ޒޫބާ އަށެވެ. ޒޫބާ އަލުން މިރާންޗުކްއަށް ބޯޅަ ދިނެވެ. މިފަހަރު ބޯޅަހިފައިގެން އޭރިއާތެރެ އަށް ވަދެ މިރާންޗަކް ވަނީ ފިންލެންޑްގެ ޑިފެންޑަރުން ކައިރިން ނައްޓާލައި ގޯލުގެ ތެރެއަށް ބޯޅަ ވައްދައިލައިފަ އެވެ.

ގުރޫޕް ބީ ގެ ފުރަތަމަ މެޗުގައި ފިންލެންޑުން ޑެންމާކް ބަލި ކުރުމުން މިރޭ ރަޝިއާ އާ ދެކޮޅަށް ކުޅޭ މެޗަށް އިތުރު ހިތްވަރެއް އެ ޓީމަށް ލިބޭނެ ކަމަށް ބެލެވުނު ނަމަވެސް، ބެލްޖިއަމް އަތުން ބަލިވި ރަޝިއާގެ ފަރާތުން މާ ރަނގަޅަށް ކުޅޭތަން ފެނުނެވެ. މެޗުން މޮޅުވެ ރަޝިއާ ވަނީ މުބާރާތުގައި ދެމިއޮތުމަށް އުންމީދު އާކޮށްފަ އެވެ.

މެޗުގެ ފިންލެންޑުން ލަނޑު ޖެހުނު ކަމަށް އެ ޓީމަށް ހީކުރެވުނެވެ. ޖޯލް ޕޯޖެންޕާލޯ ގޯލަށް ބޯޅަ ވައްދާލައި، އުފާފާޅު ކުރިނަމަވެސް އޭނާ ލަނޑު ވީއޭއާރުން ގަބޫލު ނުކުރި އެވެ.

ދެ ވަނަ ހާފުގައި، ފިންލެންޑްގެ ޓީމޫ ޕޫކއަށް ލަނޑު ޖަހާނެ ދެ ފުރުސަތެއް ލިބިގެން ދިޔަ އެވެ. ދެ ވަނަ ހާފުގައި ރަޝިއާގެ ޓީމަށް ލަނޑު ޖަހާނެ އެންމެ ރަނގަޅު ފުރުސަތެއް ލިބުނީވެސް މިރާންޗުކް އަށެވެ. ރަޝިއާއިން އުފެއްދި ކައުންޓަ އޭޓޭކް ފުރުސަތެއްގައި އޭނާ ފޮނުވާލި ނުރައްކާތެރި ބޯޅަ ދިފާއުކޮށް ކޯނަރަކަށް ބޭރުކޮށްލީ ފިންލެންޑްގެ ކީޕަރު ލޫކަސް ހަރެޑެޓްސްކީ އެވެ.

ފިންލެންޑަށް ދެ ވަނަ ހާފުގައި ލިބުނު އެންމެ ރަނގަޅު ފުރުސަތު ލިބުނީ މެޗުގެ 89 ވަނަ މިނެޓްގަ އެވެ. އެ ޓީމުން ނެގި ހުރަހެއްގައި އެ ޓީމުގެ ޕޯލުސް އަރަޔޫރީ ބޮލުން ފޮނުވާލި ބޯޅައިންނެވެ. އެ ބޯޅަ ހުރަސް ދަނޑި މަތި ގޮސް ޖެހުނީ ގޯލުގެ މަތީ ދާގަނޑު މައްޗަށެވެ.

އޭގެ ކުރިން ގޮލްވިން އަށް ވެސް ރަނގަޅު ފުރުސަތެއެއް ލިބުނެވެ. ލީޑެއް ނެގިފައި އޮތުމުން ރަޝިއާއިން ދެ ވަނަ ހާފުގައި ކުޅެމުން ދިޔައީ ޑިފެންސިވް ގޭމެކެވެ. ފިންލެންޑްގެ ޓީމަށް އޯޕަން ފުރުސަތުގެ ގޮތުގައި ފުރުސަތެއް ލިބުނަކަ ނުދެ އެވެ. އެއީ ރަޝިއާގެ ކޯޗް ސްޓެނިސްލާވް ޗެރިޝޭސޮވްގެ މައިގަނޑު ގޭމް ފިލޯސަފީ އެވެ.