ތުރުކީ ބަލިކޮށް ވޭލްސް ދެ ވަނަ ބުރާ ކައިރިއަށް

ބަކޫ، އަޒަރުބައިޖާން (ޖޫން 16) - ތުރުކީގެ މައްޗަށް 2-0 ގެ ނަތީޖާ އަކުން ކާމިޔާބު ހޯދައި، ޔޫރޯގެ ދެ ވަނަ ބުރާ ކައިރިއަށް ވޭލްސް ޖެހިލައިފި އެވެ.

މެޗުގައި ވޭލްސްގެ ލަނޑުތައް ކާމިޔާބު ކުރީ ކާނޯ ރޮބަޓްސް އާއި އާރޮން ރަމްސީ އެވެ. ކުޅުނު ދެ މެޗުންވެސް ބަލިވުމުން ތުރުކީ މިހާރު އޮތީ މުބާރާތުން ކެޓުމާ ކައިރީގަ އެވެ. ފުރަތަމަ މެޗުގައި އިޓަލީ އަތުން އެ ޓީމު ބަލިވީ 3-0 އިންނެވެ. ވޭލްސް ކުރިން ކުޅުނު މެޗުގައި ސްވިޒަލޭންޑް އަތުން އެއްވަރުވީ އެވެ.

ވޭލްސްގެ ލަނޑު އާރޮން ރަމްސީ ކާމިޔާބު ކުރީ، 42 ވަނަ މިނެޓްގަ އެވެ. ތުރުކީގެ ހާފުގެ މެދުތެރޭގައި ހުރެފައި ކެޕްޓަން ގެރެތު ބޭލް އޭރިއާ ތެރެއަށް ބޯޅަ ނަގައިދިނީ އޭރިއާ ތެރެއަށް ރަމްސީ އަރާނެކަން އެނގިގެންނެވެ. އޮފްސައިޑް މަޅިން ސަލާމަތްވެ ރަމްސީ ވަނީ އޭރިއާ ތެރެއަށް ހުސްކޮށް ވަދެ ގޯލްގެ ތެރެއަށް ބޯޅަ ފޮނުވައިލައިފަ އެވެ.

ދެ ވަނަ ލަނޑު ޖަހަން ފުރުސަތު ރޮބަޓްސް އަށް ތަނަވަސް ކޮށްދިނީވެސް ބޭލް އެވެ. އެ ލަނޑު ޖެހީ މެޗުގެ އެންމެ ފަހު ވަގުތުގަ އެވެ.

އޭގެ ކުރިންރަމްސީ އަށް ވަނީ ހަމަ އެފަދަ ފުރުސަތެއް ލިބިފަ އެވެ. މެޗުގެ 23 ވަނަ މިނެޓްގައި އޭނާ އޭރިއާ ތެރެއިން ހުސްކޮށް ލިބުނު ބޯޅައަށް ހުރަސް އަޅަން ތުރުކީގެ އޭރިއާ ތެރޭގައި އެ ޓީމުގެ ކީޕަރު އޫޖާން ޗަކަރް ފިޔަވައި އެހެން ކުޅުންތެރިޔަކު ނެތެވެ. އެހެން ނަމަވެސް ރަމްސީ ބޯޅަ ފޮނުވާލީ ހުރަސް ދަނޑިމަތިން ބޭރަށެވެ.

ތުރުކީއަށް ވުރެ ރަނގަޅަށް މެޗު ފެށީވެސް ވޭލްސްއިންނެވެ. އެހެންނަމަވެސް ލަނޑު ޖަހާނެ ފުރަތަމަ ފުރުސަތު ތަނަވަސް ކުރީ ތުރުކީންނެވެ. މެޗުގެ އަށް ވަނަ މިނެޓްގައި ލަނޑެއް ޖެހުމާ ގާތަށް ތުރުކީ ދިޔަ އެވެ. އަރިމަތިން އަރައި ތުރުކީގެ ޖެންގިސް އުންޑާ ތަނަވަސްކޮށްދިން ބޯޅަ ބުރާކް ޔިލްމާޒް ފޮނުވާލުމުން ދިޔައީ ދަނޑިކައިރިން ބޭރަށެވެ. އެ ފުރުސަތު ބޭކާރުވުމުން އޭނާގެ ކިބައިން ހިތްހަމަނުޖެހުން ފެނިގެން ދިޔަ އެވެ.

މިފަހަކަށް އައިސް ލަނޑު ޖެހުމުގެ މައްސަލަ ކުރިމަތި ވެފައިވާ ބޭލްއަށް މިރޭގެ މެޗުގއިވެސް އެކަން ތަކުރާރުވި އެވެ. މެޗުގެ 61 ވަނަ މިނެޓްގައި ވޭލްސްއަށް ލިބުނު ޕެނަލްޓީ ބޭލް ފޮނުވާލުމުން ދިޔައީ ހުރަސް ދަނޑިމަތިން ބޭރަށެވެ.