މެސެޑޯނިއާ ބަލިކޮށް ޔޫކްރޭން އުންމީދު ދަމަހައްޓައިފި

ބުކަރެސްޓް (ޖޫން 17) - އުތުރު މެސެޑޯނިއާގެ މައްޗަށް 2-0 ގެ ނަތީޖާއަކުން ކާމިޔާބު ހޯދައި، ޔޫކްރޭންއިން ޔޫރޯގައި ދެމިއޮތުމަށް އުންމީދު ދަމަހައްޓައިފި އެވެ.

މެސެޑޯނިއާ ކުރިން ކުޅުނު މެޗުގައި އޮސްޓްރިއާ އަތުން ވަނީ ބަލިވެފަ އެވެ. މިރޭ ޔޫކްރޭން އަތުން ބަލިވުމުން އެ ޓީމ ވަނީ މުބާރާތުން ކެޓުމާ ކައިރީގަ އެވެ.

ބަލި ކުރަން އުނދަގޫ ޓީމެއްގެ ގޮތުގައި ކުރިން ފާހަގަ ކުރެވުނު، މެސެޑޯނިއާ ފުރަތަމަ ފަހަރަށް ޔޫރޯގައި ވާދަކޮށް ބަލިވެގެން ދިޔައީ މާ ފަސޭހަ ކޮށެވެ. ވޯލްޑް ކަޕް ކޮލިފިކޭޝަންގައި މާޗް މަހު މެސެޑޯނިއާ އިން ވަނީ ޖަރުމަން ބަލިކޮށްފަ އެވެ. އެހެންނަމަވެސް ޔޫރޯގައި އެ ޓީމުގެ ކިބައިން އެވަރުގެ ކުޅުމެއް ނުދެއްކުނެވެ.

މިރޭގެ މެޗުގައި ޔޫކްރޭންގެ ލަނޑުވެސް ޖެހީ ފުރަތަމަ ހާފުގަ އެވެ. އެ ދެ ލަނޑު ވަނީ މާ ފަސޭހަ ގޮތަކަށެވެ. މެސެޑޯނިއާގެ ކިބައިން އެކަށީގެންވާ ގޮތަށް ޑިފެންސް ކުރި ތަނެއް ނުފެނުނެވެ.

ފުރަތަމަ ލަނޑު އަންޑްރޭ ޔާމެލެންކޯ، 29 ވަނަ މިނެޓްގައި ކާމިޔާބު ކުރީ ކޯނަރަކުން ތަނަވަސްވި ބޯޅައިންނެވެ. ގޯލްގެ ދަނޑި ކައިރީގައި ހުރެފައި އޭނާ ފޮނުވާލި ބޯޅަ ތިރިތިރިންގޮސް ގޯލްގެ ތެރެއަށް ވަނެވެ. ބޯޅަ ފައިން ދިފާއުކުރަން މެސެޑޯނިގެ ކީޕަރު ސްޓޯލް ޑިމިޓްރިއޮވްސްކީ މަސައްކަތް ކުރިނަމަވެސް އޭނާގެ ފައިގައި ލައްވައި ނުލައި އެ ބޯޅަ ވަނީ ގޯލްގެ ތެރެއަށެވެ.

ޔޫކްރޭންގެ ދެ ވަަނަ ލަނޑު ރޯމަން ޔަރެމްޗުކް ކާމިޔާބު ކުރީ މެޗުގެ 34 ވަނަ މިނެޓްގަ އެވެ. އޭރިއާގެ ބޭރުން އޭނާ ފޮނުވާލި ބޯޅަ ގޯލް ދަނޑި ކައިރިން ގޮސް ވަނީ ގޯލްގެ ތެރެއަށެވެ. ފުރަތަމަ ހާފުގައި މެސެޑޯނިއާގެ ކެޕްޓަން ޕެންޑޭވް، ޔޫކްރޭންގެ ގޯލަށް ބޯޅަ ވައްދާލިނަމަވެސް އޭނާ ހުރީ އޮފްސައިޑްގަ އެވެ.

ދެ ވަނަ ހާފުގައި، މެސެޑޯނިއާގެ ކުޅުން ރަނގަޅު ކުރި އެވެ. އެ ޓީމުގެ ލަނޑު އެޒްޖަން އަލިއޮސްކީ ކާމިޔާބު ކުރީ މެސެޑޯނިއާއަށް ލިބުނު ޕެނަލްޓީ ޔޫކްރޭންގެ ކީޕަރު ބުޝްޗާން ދިފާއު ކުރުމުން ރީބައުންސްވި ބޯޅަ އަލިއޮސްކީ ދެ ވަނަ ފަހަރަށް ޖަހައި ގޯލްގެ ތެރެއަށް ވައްދާލައިގެންނެވެ. ނަތީޖާ ތަފާތުކުރަން ޔޫކްރޭން އަށް ވެސް ޕެނަލްޓީއެއް ލިބުނެވެ. އެ ޓީމުގެ ޔާމެލެންކޯ ފޮނުވާލި ޕެނަލްޓީ ކީޕަރު ޑިމިޓްރިއޮވްސްކީ ދިފާއު ކުރި އެވެ.