ޗެކް އަތުން މޮޅު ނުވެވުމުން ކްރޮއޭޝިއާއަށް ހާސްކަން

ގްލާސްގޯ (ޖޫން 18) - ޗެކް ރިޕަބްލިކް އަތުން 1-1 އިން އެއްވަރުވެ، ކްރޮއޭޝިއާގެ އިމްތިހާން ބޮޑު ވެއްޖެ އެވެ.

ކްރޮއޭޝިއާ ކުޅުނު ފުރަތަމަ މެޗުގައި އިންގްލެންޑް އަތުން ބަލިވުމުން، މިރޭ ޗެކް ރިޕަބްލިކްއާ ދެކޮޅަށް ކުޅުނު މެޗަކީ އެ ޓީމަށް މޮޅުވުން މަޖޫބުރު މެޗެކެވެ. މޮޅު ނުވެވުމުން ވޯލްޑް ކަޕްގެ އެންމެ ފަހުގެ ރަނަރަފް ޔޫރޯއިން ކެޓުމުގެ ބިރު ވެސް އޮތީ މިހާރު ކުރިމަތި ވެފަ އެވެ. މެޗު އެއްވަރުވުމަކީ ކްރޮއޭޝިއާއަށް އޮތް ހިތްހަމަޖެހުމެއް ނޫނެވެ. ޗެކް ރިޕަބްލިކް ވަނީ ކުޅުނު ފުރަތަމަ މެޗުގައި ޕޮލެންޑް ބަލިކޮށްފަ އެވެ. މިރޭގެ މެޗުން މޮޅުވިނަމަ ދެ ވަނަ ބުރުގެ ޖާގައެއް އެ ޓީމަށް ލިބޭނެ އެވެ.

މެޗުގައި ފުރަތަމަ ލީޑު ނެގީ ޗެކުގެ ލަނޑަކީ، ލިބުނު ޕެނަލްޓީ އަކުން ޕެޓްރިކް ޝިކް ކާމިޔާބު ކުރި ލަނޑެކެވެ. މެޗުގެ 34 ވަނަ މިނެޓުގައި ޗެކުން ނެގި ކޯނަރެއްގައި ޝިކް ބޯޅައިގައި ބޮލުން ޖަހަން ފުންމައިގެން އެރިއިރު އޭނާއަށް ބޯޅަ ލިބުނަ ނުދޭން ކްރޮއޭޝިއާގެ ޑިފެންޑަރު ޑޭޖާން ލޮވްރެން ވެސް ފުންމައިގެން އެރި އެވެ. ލޮވްރެންގެ އުޅަނބޮށިން، ޝިކްގެ ނޭފަތް މަތީގައި ޖެހުނެވެ.

ރެފްރީ ފުރަތަމަ ދެއްކީ ޕްލޭއޮން ކަމަށެވެ. ނަމަވެސް ފަހުން ވީއޭއާރް އެސިސްޓެންޓުންގެ ކިބައިން މެސެޖު ލިބުމުން ވީއޭއާރް މެދުވެރިކޮށް ބެލުމަށް ރެފްރީ ނިންމި އެވެ. ވީއޭއާރް މެދުވެރިކޮށް ޕެނަލްޓީއެއް ކަމަށް ނިންމައި ރެފްރީ ވަނީ ލޮވްރެންއަށް ރީނދޫ ކާޑުވެސް ދައްކައިފަ އެވެ. ނޭފަތަށް ލިބުނު އަނިޔާއަށް ފަރުވާ ހޯދުމަށް ފަހު، އެނބުރި ކުޅުމުގެ ތެރެއަށް އައިސް ޝިކް ވަނީ ޕެނަލްޓީން ޗެކްގެ ޓީމަށް ލީޑް ނަގައިދީފަ އެވެ. އޭރުވެސް އޭނާގެ މޫނުމަތީގައި ކޮންމެވެސް ވަރަކަށް ލޭގެ އަސަރު ހުއްޓެވެ.

ފުރަތަމަ ހާފުގެ ކުރީކޮޅު ކްރޮއޭޝިއާގެ އެންޓޭ ރެބިޗްއަށް ލަނޑު ޖަހާނެ ރަނގަޅު ފުރުސަތެއ ލިބުނެވެ. އޭނާ ގޯލްގެ ކަނަށް އަމާޒުކޮށް ފޮނުވާލި ބޯޅަ ޗެކްގެ ކީޕަރު ޓޯމަސް ވަސްލިކް ދިފާއު ކުރީ ގޯލް ދަނޑިކަިއރިންނެވެ.

ކޮރޮއޭޝިއާއަށް ނަތީޖާ ހަމަހަމަ ކޮށްދިނީ އީވާން ޕެރިސިޗް އެވެ. ދެ ވަނަ ހާފު ފެށިގެން ދެ ވަނަ މިިނެޓްގައި ކްރޮއޭޝިއާއިން ތަނަވަސް ކުރި ބޯޅަ ހިފައިގެން އޭރިއާގެ އަރިމަތިން އަރައި ޕެރިސިޗް ވަނީ ގޯލްގެ ތެރެއަށް ބޯޅަ ފޮނުވައިލައިފަ އެވެ. ދެ ވަނަ ހާފުގައި ލަނޑު ޖާހާނެ ގިނަ ފުރުސަތުތައް އުފެއްދީ ކްރޮއޭޝިއާއިންނެވެ.