ސްވިޒަލެންޑް މޮޅުވިޔަސް ދެ ވަނަ ބުރުގެ އިންތިޒާރު ދިގުވެއްޖެ

ބަކޫ (ޖޫން 20) - ޔޫރޯ މުބާރާތުގައި މިރޭ ތުރުކީ އަތުން 3-1 އިން މޮޅުވިޔަސް، ދެ ވަނަ ބުރަށް ދިއުމަށް ސްވިޒަލެންޑް ކުރަން ޖެހޭ އިންތިޒާރު ދިގުވެއްޖެ އެވެ.

ކޮންމެ ގުރޫޕަކުންވެސް ދެ ވަނަ ބުރަށް ސީދާ ދަތުރު ކުރާނީ ގަދަ ދެ ޓީމެވެ. މިރޭ ކުޅުނު ގުރޫޕް އޭ ފަހު މެޗުތަކަށް ނުކުތް އިރުވެސް އިޓަލީ އޮތީ ދެ ވަނަ ބުރުގެ ޖާގަ ޔަގީން ކޮށްފަ އެވެ. އެ ގުރޫޕުން ދެ ވަނަ ޖާގައަށް ވާދަ ކުރީ ވޭލްސް އާއި ސްވިޒަލެންޑެވެ. އިޓަލީ އަތުން ވޭލްސް ބަލިވީ 1-0 ންނެވެ. އެހެން ނަމަވެސް އެ މެޗަށް ނުކުތް އިރުވެސް އެ ޓީމު އަތުގައި ހަތަރު ޕޮއިންޓް އޮތެވެ.

ތުރުކީ އަތުން މިރޭ މޮޅުވެ ސްވިޒަލެންޑް ވެސް ވަނީ ޖުމްލަ ހަތަރު ޕޮއިންޓް ހޯދައިފަ އެވެ. ވޭލްސް އާއި ސްވިޒަލެންޑް ކުޅުނު މެޗު އެއްވަރު ވެފައި ވުމުން ދެ ޓީމުގެ މަގާމު ކަނޑައެޅުމުގައި ބެލީ ގޯލުގެ ތަފާތަށެވެ. ވޭލްސް އަށް ފައިދާ އެއް ގޯލް އެބައޮތެވެ. ސްވިޒަލެންޑަށް އޮތީ ގެއްލުން އެއް ގޯލެވެ. އެހެންވެ ގުރޫޕްގެ ދެ ވަނަ ޓީމުގެ ގޮތުގައި، ދެ ވަނަ ބުރަށް ދަތުރު ކުރީ ވޭލްސް އެވެ.

ސްވިޒަލެންޑް ޖެހޭނީ ގުރޫޕް ސްޓޭޖް ނިމެންދެން އެ ޓީމަށް ވާގޮތް ބަލަން މަޑުން ކުރާށެވެ. ހަ ގުރޫޕްގެ ތިން ވަނަ ހޯދާ ޓީމުތަކުގެ ތެރެއިން އެންމެ ރަނގަޅު ނަތީޖާ ހޯދާ ހަތަރު ޓީމު ދެ ވަނަ ބުރަށް ދަތުރު ކުރާނެ އެވެ.

މިރޭގެ މެޗުގައި ސްވިޒަލެންޑްގެ ޒެރްދާން ޝަކީރީ ދެ ލަނޑު ކާމިޔާބު ކުރި އެވެ. މެޗުގައި އެ ޓީމަށް ލީޑު ނަގައިދިނީ ހާރިސް ސެފަރޮވިޗެވެ. އޭނާ ލަނޑު ޖެހީ މެޗު ފެށިގެން ހަ ވަނަ މިނެޓުގަ އެވެ. ދެ ވަނަ ލަނޑު ޝަކީރީ ކާމިޔާބު ކުރީ 26 ވަނަ މިނެޓުގަ އެވެ. ދެވަނަ ހާފުގައި ޝަކީރީ އިތުރު ލަނޑެއް ޖެހި އެވެ.

ތުރުކީގެ ހަމައެކަނި ލަނޑު ކާމިޔާބުކުރީ އިރުފާން ކަވޭސީ އެވެ. މިއީ މުބާރާތުގެ ގްރޫޕް ސްޓޭޖުން ކެޓި ތުރުކީ އަށް ގުރޫޕް ސްޓޭޖުގައި ޖެހުނު ހަމައެކަނި ލަނޑެވެ ތިން މެޗުން ތުރުކީ ކޮޅަށް 8 ލަނޑު ވަނެވެ.

ގުރޫޕް ތަކުގެ ތިން ވަނަ ހޯދާ ޓީމުތަކުގެ ތެރެއިން އެންމެ ރަނގަޅު ނަތީޖާ ހޯދާ ޓީމުތަކުގެ ތެރޭގައި ހިމެނި، ސްވިޒަލެންޑް ދެ ވަނަ ބުރަށް ދަތުރު ކޮށްފިނަމަ ދެ ވަނަ ބުރުގައި އެ ޓީމު ވާދަ ކުރަން ޖެހޭނީ ގްރޫޕް ބީ ގެ އެއް ވަނަ ޓީމާ ދެކޮޅަށެވެ. އެއް ވަނައިގައި މިވަގުތު އޮތީ ބެލްޖިއަމް އެވެ