ނެދަލޭންޑްސް އަށް އެއް ވަނަ، މެސެޑޯނިއާގެ ލެޖެންޑް ޕަންޑޭވް ރިޓަޔާކޮށްފި

އެމްސްޓަޑަމް (ޖޫން 21) - ނޯތު މެސެޑޯނިއާގެ މައްޗަށް 3-0 އިން ކުރި ހޯދައި، ގްރޫޕް ސީގެ އެއް ވަނަ ނެދަލެންޑްސް ހޯދިއިރު، މިރޭގެ މެޗަށް ފަހު ނޯތު މެސެޑޯނިއާގެ ލެޖެންޑް ގޯރާން ޕަންޑޭވް ވަނީ ގައުމީ ޓީމުން ރިޓަޔާކޮށްފަ އެވެ.

މެޗު ފެށުން ހާއްސަ ވެގެން ދިޔައީވެސް ޕަންޑޭވް އަށެވެ. ނެދަލެންޑްސްގެ ކުޅުންތެރިންގެ ފަރާތުން ވަނީ ޕަންޑޭވްއަށް، ނެދަލެންޑްސްގެ ޖޯޒީއެއް ހަވާލު ކޮށްފަ އެވެ. މެސެޑޯނިއާގެ ތާރީހްގައި ފުރަތަމަ ބޮޑު މުބާރާތަށް އެ ޓީމު ކޮލިފައި ކޮށްދިނުމުގައި އެންމެ މުހިންމު ދައުރެއް އަދާ ކުރީ އަންނަ މަހު 38 އަހަރު ފުރޭ ޕަންޑޭވް އެވެ.

މެޗުގެ 69 ވަނަ މިނެޓްގައި ޕަންޑޭވް ބަދަލު ކުރަން މެސެޑޯނިއާގެ ޓީމުން ތައްޔާރު ވުމުން އެމްސްޓަޑަމްގެ ތާރީހީ ސްޓޭޑީއަމް "ޔޯހަން ކްރައިފް އެރީނާ" ގައި ތިބި ދެ ޓީމުގެ ސަޕޯޓަރުން ވަނީ ޕަންޑޭވަށް އިހުތިރާމް އަދާ ކުރުމުގެ ގޮތުން އޭނާ އަށް ތަރުހީބު ދީފަ އެވެ. ދަނޑުން ފައިބައިގެން ޕަންޑޭވް ދިޔައިރު އޭނާގެ މޫނު މަތިން ފާޅު ވަމުން ދިޔައީ ގައުމީ ޓީމާ ދުރަށް ދާންޖެހުމުގެ މާޔޫސްކަމެވެ.

މެޗުގައި، ނެދަލެންޑްސްގެ ތިން ލަނޑުގެ ތެރެއިން ދެ ލަނޑު ކާމިޔާބު ކުރީ ކެޕްޓަން ޖޯޖީނިއޯ ވައިނަލްޑަން އެވެ. ހޮލެންޑަށް ލީޑް ނަގައި ދިނީ މެންފިސް ޑިޕާއީ އެވެ. މެޗަށް ނުކުތް އިރުވެސް ނެދަލެންޑްސް އޮތީ ދެ ވަނަ ބުރުގެ ޖާގަ ޔަގީން ކޮށްފަ އެވެ.

ގުރޫޕްގެ އެއް ވަނައިގައި އެ ޓީމު ދެ ވަނަ ބުރަށް ދަތުރު ކުރުމުން، އެ ޓީމު ކުޅެން ޖެހޭނީ، ތިން ވަނަ ހޯދާ ޓީމަކާ ދެކޮޅަށެވެ