ފިންލެންޑް ބަލިކޮށް ބެލްޖިއަމް ގުރޫޕްގެ އެއް ވަނައަށް

ޕީޓާސްގާގް (ޖޫން 22) - ފިންލެންޑުގެ މައްޗަށް 2-0 ގެ ނަތީޖާ އަކުން ކާމިޔާބު ހޯދައި، ގުރޫޕް ބީ ގެ އެއް ވަނަ ބެލްޖިއަމުން ހޯދައިފި އެވެ.

މެޗަށް ނުކުތް އިރުވެސް ބެލްޖިއަމް އޮތީ، ދެ ވަނަ ބުރުގެ ޖާގަ ކަށަވަރު ކޮށްފަ އެވެ. މެޗުގެ 74 ވަނަ މިނެޓާ ހަމައަށް ދިޔައިރުވެސް ބެލްޖިއަމްއަށް ފިންލެންޑްގެ ގޯލް ފޫއަޅުވާ ނުލެވުނެވެ. މެޗު އެއްވަރު ވެގެން ނިމުނު ނަމަ ބެލްޖިއަމްއާ އެކު ދެ ވަނަ ބުރަށް ދާނީ ފިންލެންޑެވެ.

ބެލްޖިއަމްގެ ފުރަތަމަ ލަނޑަކީ، ފިންލެންޑްގެ ކީޕަރު ލޫކަސް ހާޑެޓްސްކީ އަތުން ބައިކޮޅަށް ވަން ލަނޑެކެވެ. ބެލްޖިއަމުން ނެގި ކޯނަރު ތޯމަސް ވާމެލޮން ބޮލުން ފޮނުވާލުމުން ދަނޑީގައި ޖެހިފައި ރީބައުންސްވި ބޯޅަ ގޯލަށް ވަނީ ހާޑެޓްސްކީ ދިފާއު ކުރަން އުޅުމުގެ ތެރޭގައި އޭނާގެ އަތުގައި ޖެހިފަ އެވެ.

ބެލްޖިއަމްގެ ދެ ވަނަ ލަނޑު ކާމިޔާބު ކުރީ ރޮމެލޫ ލުކާކޫ އެވެ. އޭނާއަށް ކުރިންވެސް ލަނޑެއް ޖެހުނު ކަމަށް ހީކޮށް އުފާފާޅު ކުރި އެވެ. ނަމަވެސް އެ ލަނޑުޖެހުމުގެ ކުރިން އޭނާ އޮފްސައިޑް ވެފައިވާ ކަމަށް ނންމީ ވީއޭއާރު މެދުވެރިކޮށް ބަލައިގެންނެވެ.

ފިންލެންޑް ބަލިވެ، ރަޝިއާގެ މައްޗަށް ޑެންމާކު މޮޅުވުމުން ގުރޫޕްގެ ދެ ވަނަ ޓީމުގެ ގޮތުގައި ދެ ވަނަ ބުރަށް ދިޔައީ ޑެންމާކް އެވެ. ތިން ވަނަ ލިބުނު ފިންލެންޑަށް އޮތީ އެ ޓީމަށް ވާގޮތް ބެލުމަށް، ގްރޫޕް ސްޓޭޖް ނިމެންދެން އިންތިޒާރު ކުރުމެވެ. ތިން ވަނަ ހޯދާ ޓީމުތަކުގެ ތެރެއިން އެންމެ ރަނގަޅު ނަތީޖާ ހޯދާ ހަތަރު ޓީމުގެ ތޭރަގައި އެ ޓީމު ހިމެނިއްޖެނަމަ ދެ ވަނަ ބުރަށް ފިންލެންޑް ވެސް ދާނެ އެވެ.