ކުޅިވަރު / ޔޫރޯ 2020

އިތުރު ވަގުތުގައި ސްވިޑެން ބަލިކޮށް ޔޫކްރޭން ކުއާޓާއަށް

ޔޫކްރޭޏްގެ ކުޅުންތެރިން އުފާފާލު ކުރަނީ --- ފޮޓޯ: އޭއެފްޕީ

ހުސެއިން ހަބީބް، މިހާރު

30 ޖޫން 2021 - 02:47

ގްލާސްގޯ (ޖޫން 30) - އިތުރު ވަގުތުގެ ދެ ހާފު ކުޅެ ސްވިޑެންގެ މައްޗަށް 2-1 އިން މޮޅުވެ، ޔޫރޯގެ ކުއާޓާ ފައިނަލަށް ޔޫކްރޭން ދަތުރުކޮށްފި އެވެ.

ކުއާޓާގައި ޔޫކްރޭން ނުކުންނާނީ އިންގްލެންޑާ ދެކޮޅަށެވެ.

މެޗުގައި ފުރަތަމަ ލީޑު ނެގީ ޔޫކްރޭންގެ ޓީމުންނެވެ. އެ ޓީމުގެ ލަނޑު އެލެކްޒެންޑާ ޒެންޗެންކޯ ކާމިޔާބުކުރީ އަންޑްރީ ޔާމެލެންކޯ ދިން ބޯޅައިންނެވެ. ޒެންޗެންކޯ ފޮނުވާލި ބޯޅަ ގޯލުގެ ތެރެއަށް ވަނީ ސްވިޑެންގެ ކީޕަރު ރޮބިން އޮލެސްންގެ އަތުގައި ޖެހިފަ އެވެ.

ލީޑުގައި އޮވެގެން ފުރަތަމަ ހާފު ނިންމާލަން ޔޫކްރޭންގެ ކުޅުންތެރިން ހިފާފައި ތިބި ނަމަވެސް، ސްވިޑެންއިން ވަނީ މެޗުގެ 43 ވަނަ މިނެޓްގައި ނަތީޖާ ހަމަހަމަ ކޮށްފަ އެވެ. އެމީލް ފޯސްބާގް ލަނޑު ޖެހީ އެލެގްޒެންޑާ އީސާކް ދިން ބޯޅައިންނެވެ. އީސާކް ބޯޅަ ދިން އިިރު ފޯސްބާގް ހުރީ އޭރިއާގެ ބޭރުގަ އެވެ. އޭނާ ވަނީ ބޯޅަ ކޮންޓްރޯލް ކޮށްލުމަށް ފަހު ގޯލްގެ ތެރެއަށް ފޮނުވައިލައިފަ އެވެ.

މެޗުގެ 55 ވަނަ މިނެޓްގައި ލަނޑެއް ޖެހުމާ ވަރަށް ގާތަށް ޔޫކްރޭން ދިޔަ އެވެ. ޔާމެލެންކޯ އޭރިއާ ތެރެއަށް ވަދެ ސާހީ ސިޑޯރްޗުކް އަދިން ބޯޅަ، ސިޑޮރްޗުކް ފޮނުވާލުމުން އަމާޒުވީ ގޯލް ދަނޑި އެވެ. ޖެހިގެން އައި މިނެޓްގައި ސްވިޑެންއިން އުފެއްދި ކައުންޓަ އެޓޭކެއްގައި ފޯސްބާގް ހުސްކޮށް ފޮނުވާލި ބޯޅަ ވެސް އަމާޒުވީ ދަނޑިއަށެވެ.

މެޗުގެ 69 ވަނަ މިނެޓްގައިވެސް ފޯސްބާގަށް ލިބުނު ބޯޅަ ނުރައްކާކޮށް ފޮނުވާލި ނަމަވެސް އެ ބޯޅަ އަމާޒުވީ ހުރަސް ދަނޑިއަށެވެ.

މެޗުގެ ފުރިހަމަ ވަގަުތުގަިވެސް ވަކި ކޮޅަކަށް ނަތީޖާ ބުރަ ނުވުމުން ކުޅުނު އިތުރު ވަގުތުގެ 15 މިނެޓްގެ ދެ ހާފުގެ ތެރެއިން ފުރަތަމަ ހާފުގައި ބަދަލު ކުޅުންތެރިޔެއްގެ ގޮތުގައި ކުޅެން އެރި އާޓެމް ބެޒަޔެޑެންގެ ފަޔަށް ޓެކްލު ކުރުމުން ސްވިޑެންގެ މާކޯސް ޑެނިއެލްސަން އަށް ރަތް ކާޑު ދައްކައި ދަނޑުން ފޮނުވާލި އެވެ. ބެޒަޔެޑެންގެ ފަޔަށް ލިބުނު އަނިޔާ އާ ގުޅިގެން އޭނާ އަށް މެޗު ކުރިއަށް ނުގެންދެވޭނެ ކަން އެނގުމުން ބަދަލުގައި ވިކްޓާ ސްނަންކޯވް ކުޅެން އެރުވި އެވެ.

އިތުރު ވަގުތުގެ ދެ ވަނަ ހާފުގެ އެންމެ ފަހު ވަގުތުގައި ޔޫކްރޭން މޮޅުކޮށްދިން ލަނޑު ކާމިޔާބު ކުރީ އާޓެމް ޑޯބިކް އެވެ.