ކެންސަރު ބަލިކޮށްލި ހިތްވަރުގަދަ ޒުވާނާ

02 ސެޕްޓެމްބަރ 2021 - 08:46

އެމްއެންޔޫގެ އެފްއެޗްޓީއެސްގައި ލެކްޗަރާއެއްގެ ވަޒީފާ އަދާކުރަމުން އަންނަ އަލްމާ އަލީލަކީ ކެންސަރު ބަލީގެ ކުރިން ވަރަށް އެކްޓިވްކޮށް އުޅުނު ޒުވާނެކެވެ. އެންމެ 25 އަހަރުގައި ކެންސަރާ ހަނގުރާމަކުރަން ޖެހުމުން އޭނާ އަށް އެންމެ އުނދަގޫވީ ވެސް ކުރީގެ އެ އެކްޓިވް ލައިފްސްޓައިލް ދޫކޮށްލަން ޖެހުމުންނެވެ. މާ ގިނައިރު ކޮޅަކަށް ނުހުރެވެ އެވެ. ކެއްސާވަރުން ވާހަކައެއް ނުދެއްކެ އެވެ. އަބަދު ހުންނަނީ ބޮލުގައި ރިއްސައި ވަރުބަލިވެފަ އެވެ.

ޓެސްޓުތައް ހެދިއިރު އެނގުނީ ލޭގެ ކެންސަރު ތަހައްމަލުކުރަން ޖެހިފައިވާ ކަމެވެ. އޭރު ހުރީ އެ ބަލީގެ ހަތަރު ވަން ސްޓޭޖުގަ އެވެ. އޭނާގެ އާއިލާގައި މީގެ ކުރިން ކެންސަރާ ހަނގުރާމަ ކުރި މީހަކު ނެތުމާ އެކު، އަދި މި ބަލީގެ އެންމެ ނުރައްކާތެރި ސްޓޭޖުގައި ހުރުމުން، މި ހަބަރު ވީ އޭނާ އާއި އާއިލާ އަށް ވެސް ލިބުނު ބޮޑު ޝޮކަކަށެވެ.

ނަމަވެސް، އާއިލާ އާއި ރައްޓެހިން ދިން ލޯތްބާ އެކު، ކަށިން ހިތްވަރު ނެރެގެން ކެންސަރާ ހަނގުރާމަ ފެށި އެވެ. އެ އުނދަގޫ ދަތުރު އޭނާ ނިންމާލީ ކާމިޔާބު ކަމާ އެކު އެވެ.

އަލްމާ "މެދުސަފުހާ" އަށް މި ކިޔައިދެނީ އޭނާގެ އެ ހިތްވަރުގަދަ ދަތުރުގެ ހަނދާންތަކެވެ.