ރާއްޖޭގެ އާބާދީގެ ބޮޑު ބަޔަކަށް ކޮވިޑް ވެކްސިންގެ ބޫސްޓާ ޑޯޒް ޖެހުމަށް ބޭނުންވާ ފައިޒާ ވެކްސިން މީގެ ދެ ހަފްތާއެއް ކުރިން ލިބިފައިވީ ވިޔަސް ވެކްސިން ޖެހުމަށް ބޭނުންވާ ސިރިންޖް ޝިޕްމަންޓް ލިބޭނެ ވަކި ދުވަހެއް ބުނަން އަދިވެސް ނޭނގޭ ކަމަށް ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) އިން މިއަދު ބުނެފި އެވެ.
ބޫސްޓަ ޑޯޒްގެ ގޮތުގައި، ކޮވެކްސް ފެސިލިޓީގެ ދަށުން އެމެރިކާއިން އިން ފައިޒާގެ 100،620 ޑޯޒް ރާއްޖެ އަށް ވަނީ ހަދިޔާކޮށްފަ އެވެ. ކޮވިޑް ވެކްސިންގެ ބޫސްޓާ ޑޯޒް މި ވަގުތު ޖަހަމުން އަންނަނީ ސިއްހީ ދާއިރާ އާއި ޓޫރިޒަމް ދާއިރާގައި މަސައްކަތްކުރާ މީހުންގެ އިތުރުން ބޮޑެތި ބަލިތަކަށް ފަރުވާ ހޯދަމުން އަންނަ މީހުންނާއި އެއާޕޯޓްގެ ޕްރޮންޓްލައިން މުވައްޒަފުންނަށެވެ.
އެޗްޕީއޭ އިން ކުރިން ބުނެފައި އޮތީ އިތުރު ކެޓަގަރީތަކުގެ މީހުންނަށް މިދިޔަ މަހުގެ މެދުތެރޭގައި ބޫސްޓަ ޑޯޒު ޖަހަން ފަށާނެ ކަމަށެވެ. އެކަމަކު އެ ތާރީހަށް ބޫސްޓާ ޑޯޒް ޖަހަން ނުފެށޭނެ ކަމަށް ބުނެ އެޗްޕީއޭ އިން ނެރުނު ބަޔާނުގައި ބުނީ ރާއްޖެއަށް ސިރިންޖް ލިބުމުގައި ދަތިވެފައި ވަނީ މުޅި ދުނިޔެއަށް ވެސް ސިރިންޖުގެ ދަތިކަން އޮތުމުން ކަމަށާއި ސިރިންޖް ލިބި އެހެން ތައްޔާރީތައް ނިމުމުން ވެކްސިން ޖަހާނެ ތާރީހެއް އިއުލާންކުރެވޭނެ ކަމަށެވެ.
ރާއްޖޭގައި މިހާރު ބޭނުންކުރަމުން އަންނަ ފައިޒާ ވެކްސިންގެ މުއްދަތު ހަމަވާން އޮތް ތާރީހަކީ މިދިޔަ ނޮވެމްބަރު މަހުގެ ނިޔަލެވެ. އެކަމަކުު ޑިސެމްބަރުން ފެށިގެން އިތުރު ތިން މަހަށް ވެކްސިން ބޭނުންކުރެވޭނެ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ އެޗްޕީއޭއަށް އަންގައިފަ އެވެ.
މިފަހުން ރާއްޖެއަށް ލިބުނު ފައިޒާ ވެކްސިންގެ މުއްދަތު ހަމަވާން އޮތް ތާރީހު އަދި ސާފެއް ނުވެ އެވެ.
ރާއްޖެއިން މިހާތަނަށް 367،450 މީހަކު ކޮވިޑް ވެކްސިންގެ ދެ ޑޯޒް ޖަހާފައިވެ އެވެ. އަދި މިހާތަނަށް ބޫސްޓާ ޑޯޒް ޖަހާފައި ވަނީ 25،925 މީހެކެވެ.
ބޫސްޓާ ޑޯޒް ޖެހޭނެ ދުވަހެއް އަދި ނޭނގޭއިރު މިދިޔަ ނޮވެމްބަރު މަހު އޮމިކްރޯން ވޭރިއަންޓް ފެނުނު ފަހުން ރާއްޖޭގެ ކޮވިޑްގެ ކޭސްތައް ވެސް ދަނީ އިތުރުވަމުންނެވެ.
