އަންނަ އާދިއްތަ ދުވަހު ފަށަން ތާވަލުކޮށްފައިވާ، ދިވެހި ޕްރމިއާ ލީގު ހުޅުވާ މެޗު ލ. ގަމުގައި ކުޅެވޭތޯ ކުރި މަސައްކަތަށް ކޮވިޑް-19 ގެ ސަބަބުން ހުއްޓުމެއް އަތުވެއްޖެ އެވެ.
މިދިޔަ މަހު 20 އިން ފެށިގެން ގަން އޮތީ މޮނިޓަރިންގަ އެވެ. އެ ރަށު ކައުންސިލްގެ ނައިބު ރައީސް އިބްރާހިމް ރަޝީދު ވިދާޅުވީ ގަމުގައި ލީގުގެ އޯޕަނިން މެޗު ބޭއްވުމަށް މަސައްކަތްކުރާ ކަމަށް ސްޕޯޓްސް މިނިސްޓްރީން ކުރިން އަންގާފައިިވާ ކަމަށެވެ.
އޭނާ ވިދާޅުވި ގޮތުގައި ކައުންސިލުން ވެސް ތިބީ އެ މެޗު ގަމުގައި ކުޅެވޭނެ ގޮތް ހަމަޖެހިގެންދާނެ ކަމުގެ އުންމީދުގަ އެވެ.
"ކުރިން އޮތީ މިއަދު އިސްޕެކްޝަން ޓީމް އަންނަ ގޮތަށް. އެކަމަކު އަދިވެސް ރަށް މޮނިޓަރިންގައި އޮތުމުން ދަތުރު ކެންސަލް ކުރިކަމަށް ވަނީ އަންގާފައި،" އިބްރާހިމް ވިދާޅުވި އެވެ.
"މާދަމާ މޮނިޓަރިން ނެގިޔަސް މިހާ ވަގުތު ކުޑަތަން ވެފައިވުމުން އަލުން ގަމުގައި މެޗު ބޭއްވިދާނެތޯ ނުވަތަ ނޫންތޯ ބުނާކަށް ވެސް ނޭނގެ."
ދިވެހި ލީގު ފުރަތަމަ މެޗުގައި ވާދަކުރާނީ ގްރީން ސްޓްރީޓްސް އާއި ދަ ގްރާންޑޭ ސްޕޯޓްސް ކްލަބެވެ.
މިދިޔަ މަހު ނިމުނު، ޕްރެޒިޑެންޓްސް ކަޕް ފައިނަލް މެޗު ކުޅެފައި ވަނީ ރ. އަލިފުށީގަ އެވެ. އޭގެ ފަހުން އެހެން ރަށްރަށުގައި މެޗުތައް ކުޅުމުގެ ވާހަކަތައް ވަނީ ދެކެވިފަ އެވެ. އެގޮތުން މިހާރު ކުރިއަށްދާ ޔޫތު ޗެމްޕިއަންޝިޕް ފުޓްބޯޅަ މުބާރާތުގެ ފައިނަލް މެޗު، ފ. ނިލަންދޫގައި ކުޅެން އެފްއޭއެމުން ދަނީ މަސައްކަތް ކުރަމުންނެވެ.
ލ. ގަމުގައި ސަރުކާރުން ވަނީ ޓާފް އަޅައިގެން ދަނޑެއް ތަރައްގީ ކޮށްފަ އެވެ. ގަމަކީ ދެ ޖިންސުގެ ފުޓްބޯޅަ އަށް ވެސް ފޯރިގަދަ ރަށެކެވެ. ގަމަށް ނިސްބަތްވާ ސޮސައިޓީ ފޯ ތުނޑި އެޑްވާންސް ރެކްރިއޭޝަން (ސްޓާ) ގެ އަންހެން ޓީމުން ވަނީ ކުރިން މާލޭގައި ބޭއްވި އަންހެން ފުޓްބޯޅަ މުބާރާތުގައި ވެސް ވާދަކޮށްފަ އެވެ. ފުރަތަމަ ޑިވިޝަންގައި ކުޅޭ ކުޅުންތެރިންގެ ތެރެއިން ގަމަށް އުފަން އެންމެ ފާހަގަ ކުރެވޭ ކުޅުންތެރިޔަކީ ގްރީން ސްޓްރީޓްސްގެ ޑިފެންޑަރު އަލީ ޝާމިސް (ތޮއްޕެ) އެވެ.
