ރާއްޖޭގެ ޑިވެލޮޕަރު ނަސްރުﷲ އަދުނާން (ނައްޓު) ކޯ ފައުންޑަރެއްގެ ގޮތުގައި ހިއްސާވެ އުފެއްދި ލޮޓީފައިލްސް އަށް ސީރީޒް ބީ ނުވަތަ އިންވެސްޓްމަންޓް ހޯދުމުގެ ދެ ވަނަ ބުރުގައި 37 މިލިއަން ޑޮލަރު ލިބިއްޖެ އެވެ.
ސްޓާޓްއަޕްތަކަށް ފައިސާ ދޭ ބައިނަލްއަގުވާމީ ފަސް ފަރާތަކުން މިފަހަރު އިންވެސްޓްކޮށްފައި ވާއިރު މީގެ ތެރޭގައި ދުނިޔޭގެ އެންމެ ބޮޑު އެއް ޓެކް ކުންފުނި މައިކްރޮސޮފްޓް ވެސް ހިމެނެ އެވެ.
ލޮޓީފައިސްލް އަށް މީގެ ކުރިން ވެސް މައިކްރޮސޮފްޓްގެ ވެންޗާ ފަންޑު އެމް12 އިން ނުވަ މިލިއަން ޑޮލަރުގެ ފަންޑިން ދިނެވެ. މީގެ ތެރޭގައި "500 ސްޓާޓްއަޕްސް"ގެ ހިއްސާއެއް ވެސް ހިމެނެ އެވެ. މި ދެ އިންވެސްޓަރުންގެ އިތުރުން މިފަހަރުގެ އިންވެސްޓްމަންޓްގައި ބައިވެރިވަނީ ގްރޭޓް ޕޮއިންޓް ވެންޗާސް، ސްކުއާ ޕެގް ކެޕިޓަލް އަދި އެކްސް.ވައި.ޒެޑް ވެންޗާ ކެޕިޓަލް އެވެ.
ކުރިން ލިބުނު އިންވެސްޓްމަންޓާ އެކު މިހާތަނަށް ލޮޓީފައިލްސް އަށް 47 މިލިއަން ޑޮލަރު (726 މިލިއަން ރުފިޔާ) ގެ އިންވެސްޓްމަންޓް ވަނީ ލިބިފަ އެވެ.
ލޮޓީފައިލްސް އިން ނެރުނު ބަޔާނެއްގައި ބުނީ އަލަށް ލިބުނު 37 މިލިއަން ޑޮލަރު ހޭދަކުރާނީ ޑިޒައިން ކުރުމަށް ހޭދަވާ ވަގުތުން 15 ގަޑިއިރު ސަލާމަތްކޮށްދޭނެ އާ ގޮތްތަކެއް ހިމެނޭ ހިދުމަތެއް ތައާރަފްކުރުމަށް ކުންފުނީގެ ޓީމަށް މީހުން ހޯދުމަށާއި ކުންފުނި އިތުރަށް ފުޅާކޮށް ހިންގުމަށް ކަމަށެވެ.
ލޮޓީފައިލްސްގެ ކާމިޔާބީއާ ގުޅިގެން، މިނިސްޓަ އޮފް އެންވަޔަރަމެންޓް، ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާ ވަނީ މަރުހަބާ ވިދާޅުވެފަ އެވެ.
"ޑިޒައިންކުރުމާއި އެމިނޭޝަން އެންމެންނަށް ވެސް ބޭނުންކުރެވޭ އެއްޗަކަށް ހަދައިދިން ދިވެހި ޓީމަށްޓަކައި ފަހުރުވެރިވަން،" ޝައުނާ ކުރެއްވި ޓްވީޓެއްގައި ވިދާޅުވެފައިވެ އެވެ.
ލޮޓީފައިލްސް އަކީ ކުންފުނީގެ މިހާރުގެ ސީޓީއޯ ނައްޓު އާއި ސީއީއޯ ޝިޓީޖް މިންގްލާނީ އިސްވެ ތިބެ 2017 ވަނަ އަހަރު އުފެއްދި ކުންފުންޏެކެވެ. މިހާރު ތިން މިލިއަނަށް ވުރެ ގިނަ މީހުން ބޭނުންކުރާ މި ހިދުމަތަކީ އަޑޯބީ އާފްޓަ އިފެކްޓް ފަދަ ސޮފްޓްވެއާތަކުން ހަދާ އެނިމޭޝަންތައް އެޕްތަކުގައި ބޭނުންކުރުމަށް ކުރަންޖެހޭ މަސައްކަތް ލުއިކޮށްދިނުމެވެ. ލޮޓީފައިލްސް އިން މިފަދަ އެނިމޭޝަންތައް އެޕްގައި ބޭނުންކުރުމުގެ ކުރިން މަސައްކަތްކުރާނެ ގޮތް ޕްރިވިއުކޮށްލެވޭނެ އެވެ. އެހެންވެ އެޕަށް އެނިމޭޝަން ބަދަލުކުރުމަށް އެތައް ގަޑިއިރެއް ވަންދެން ކުރަންޖެހޭ ކޯޑްކުރުމުގެ ބޭނުމެއް މިހާރު ނޯންނާނެ އެވެ.
ދިވެހި ޑިވެލޮޕަރުން ގިނަ އަދަދަކަށް މަސައްކަތްކުރާ ލޮޓީފައިލްސްގެ ބޭނުން ހިފާ 150،000 ކުންފުނި މިހާރު އެބަ ތިއްބެވެ. އޭގެ ތެރޭގައި ގޫގުލް، ޓިކްޓޮކް، ޑިޒްނީ، އޫބާ، އެއާބީއެންޑް އަދި ނެޓްފްލިކްސް ހިމެނެ އެވެ.
