ލަންޑަން (މެއި 17) - އެމެރިކާގެ މަހުޖަނު ޓޮޑް ބޮއެލީ އަށް ޗެލްސީ ވިއްކާލަން، މިހާރުގެ އޯނަރު ރޯމަން އަބްރޮމޮވިޗް އެއްބަސްވިނަމަވެސް ގާނޫނީގޮތުން ކްލަބްގެ މިލްކިއްޔާތު ބަދަލުކުރުމަށް އަބްރޮމޮވިޗް ހުރަސްތައް ކުރިމަތިކުރަމުންދާ ކަމަށް އިނގިރޭސި ސަރުކާރުން ތުހުމަތުކޮށްފި އެވެ.
ޓޮޑް ބޮއެލީ އިސްކޮށް ހުންނަވައިގެން އުފެއްދި ކޮންސޯޓިއަމަކުން މިދިޔަ މަހު 5.2 ބިލިއަން ޑޮލަރަށް ޗެލްސީ ގަތުމަށް އެއްބަސްވި ނަމަވެސް މިހާރު އެކަން ނުވެދާނެކަމުގެ ސުވާލު ވެސް އުފެދިފައިވާކަމަށް މީޑީއާ ރިޕޯޓްތައް ބުނެ އެވެ. އިނގިރޭސި ސަރުކާރުގެ އެތެރޭގެ މަސްދަރަކުން ބުނެފައި ވަނީ އެ ޑީލް ރޫޅިދާނެ ކަމުގެ ކަންބޮޑުވުން ސަރުކާރުގެ ތެރޭގައި އެބައޮތް ކަމަށެވެ.
"އަބްރަމޮވިޗް ފާޅުގައި ކުރާނެ ކަމަށް ބުނި ކަންތައްތަކާއި ކްލަބް ވިއްކުމުގެ މަރުހަލާގެ ތެރެއިން ގާނޫނީ ގޮތުން އޭނާ ކުރަން ތައްޔާރަށް ހުރި ކަންތައްތައް ލަސްވަމުންދާތީ ސަރުކާރުގެތެރޭގައި ކަންބޮޑުވުން އެބައޮތް،" ސަރުކާރުގެ އޮފިޝަލަކު ބުންޏެވެ.
"މި ހަފުތާގައި ކަންކަން ނިންމަންޖެހޭ ޑެޑްލައިންތަކެއް އެބަހުރި. އަދި ކުރިއެރުމެއް ނުލިބިއްޖެ ނަމަ، ޗެލްސީ ވިއްކާލުގެ ކަންކަން ކަނޑައެޅިފައިވާ މުއްދަތުގެ ތެރޭގައި ނުކުރެވިދާނެ ކަމުގެ ކަންބޮޑުވުން އެބައޮތް."
އަބްރޮމޮވިޗް ކުރިން ބުނެފައި ވަނީ ޗެލްސީން ދައްކަން ޖެހޭ 1,9 ބިލިއަން ޑޮލަރު ދައްކަން ކްލަބްގެ އާވެރިން ކައިރީގައި ނާހެނެ ކަމަށެވެ. އެކަމަކު ސްކައި ނިއުސް އިން ބުނެފައި ވަނީ އެޑިމާންޑް ވެސް މިހާރު އޭނާ ކުރަމުންދާ ކަމަށެވެ. އެހެންވެ އެޑީލް ފައިނަލު ކުރުމަށް ލަސްވަމުންދާ ކަމަށް އިނގިރޭސި ސަރުކާރުން ބުނެ އެވެ.
ޗެލްސީ ވިއްކާލަން އަބްރޮމިވިޗް އަށް މަޖުބޫރުވީ، އޭނާގެ އަމިއްލަ ގައުމު، ރަޝިއާއިން ޔޫކްރޭނާ ދެކޮޅަށް ހަނގުރާމަ ފެށުމުންނެވެ. އަބްރޮމޮވިޗަކީ ރަޝިއާގެ ރައީސް ލަޑިމިއާ ޕުޓިން އާ ގާތްގުޅުމެއް ބާއްވާ މީހަކަށް ވާތީ އޭނާ އާ ދެކޮޅަށް އިނގިރޭސި ސަރުކާރުން ވަނީ ދަތިކުރުމުގެ ފިޔވަޅު އަޅައިފަ އެވެ. އަބްރޮމޮވިޗް ޗެލްސީ ގަތީ 2003 ވަނަ އަހަރު އެވެ. އޭނާގެ ލީޑާޝިޕްގައި 19 އަހަރު ވަންދެން އޭނާ ވަނީ ކްލަބަށް ގިނަ އިންވެސްޓްތަކެއް ކޮށްފަ އެވެ.