ލަންޑަން (މެއި 31) - އެމެރިކާގެ ބިލިއަނަރު ޓޮޑް ބޯލީ އިސްކޮށް ހުރެގެން ހިންގާ ކޮންސޯޓިއަމުން ޗެލްސީ ގަތުމަށް ހުށަހެޅި 5.4 ބިލިއަން ޑޮލަރަށް ކުލަބު ގަތުމުގެ މަސައްކަތް ނިންމާލައިފިކަން އެ ކުލަބުން ކަށަވަރުކޮށް ދީފި އެވެ.
ޗެލްސީގެ ކުރީގެ ވެރިޔާ ރަޝިއާގެ ރޯމަން އަބްރަމޮވިޗު ކުލަބު ވިއްކާލަން މީގެ ތިން މަސް ކުރިން، ކުރި މަސައްކަތް ރޭ ވަނީ މުޅިން ފުރިހަމަ ވެފަ އެވެ. ޗެލްސީން ނެރުނު ބަޔާނުގައި ބޯލީ ބުނެފައި ވަނީ، ޗެލްސީގެ ބެލެނިވެރިކަމާ ހަވާލުވުމަކީ ޝަރަފެއް ކަމަށެވެ. އަދި އޭނާ ހުރީ ސަޕޯޓަރުން އަލުން ފަހުރުވެރިވާފަދަ ނަތީޖާތަކެއް ހޯދައިދޭން ކްލަބްގެ ވެރިޔާގެ ހައިސިއްޔަތުން ކުރަންޖެހޭ ކޮންމެ މަސައްކަތެއް ކުރުމުގެ އަމާޒުގައި ކަމަށް ވެސް އޭނާ ބުނެފައި ވެއެވެ.
"އަހަރެމެންގެ ތަސައްވުރު ވަރަށް ސާފު. ބޭނުންވަނީ ސަޕޯޓަރުން ފަހުރުވެރި ކޮށްދޭން. ޒުވާން ސްކޮޑު ތަރައްގީކޮށް، ކުލަބަށް ހުނަރުވެރި ކުޅުންތެރިން ހޯދުމަށް ކުރާ މަސައްކަތުގެ އިތުރަށް، ދިގު މުއްދަތަކަށް އިންވެސްޓް ކޮށްގެން ކުލަބުގެ ފަހުރުވެރި ތާރީހާ އެކު އިތުރު ކާމިޔާބީތަކެއް ހޯދަން ބޭނުންވޭ،" ޗެލްސީން ނެރުނު ބަޔާނުގައި ބޯލީއާ ހަވާލާދީ ބުނެފައިވެ އެވެ.
"ކުލަބު ގަތުމުގެ މަސައްކަތް ނިންމާލެވުމުން، އަހަރެން ބޭނުން އިނގިރޭސި ސަރުކާރުގެ މިނިސްޓަރުންނާއި އޮފިޝަލުން އަދި ޕްރިމިއާ ލީގުގެ ބޯޑުން ވެސް ކުރި މަސައްކަތްތަކަށް ޝުކުރު އަދާކުރަން."
ބޯލީ އިސްކޮށް ހުރެ ހިންގި ކޮންސޯޓިއަމުން ކުލަބް ސޭލް ނިމުމަށް ފަހު ކުލަބު ހިއްސާގެ ބޮޑު ބައެއް ކެލިފޯނިއާގެ ޕްރައިވެޓް އިންވެސްޓްމެންޓް ކުންފުންޏެއް ކަމަށްވާ ކްލިއާލޭކް ކެޕިޓަލް އަށް ލިބޭނެ ކަމަށް ބެލެވުނު ނަމަވެސް ޗެލްސީގެ ބަޔާނުގައިވެ ގޮތުން ކްލިއާލޭކާއި ބޯލީ އަށް ވެސް ޗެލްސީގެ ހިއްސާ އެއްވަރަކަށް ލިބޭނެ އެވެ. އަދި އެއްބަސްވުމުގައިވާ ގޮތުން ކްލިއާލޭކްގެ ޗެއާމަންކަން ކުރާނީ ބޯލީ އެވެ.
ކްލިއާލޭކް ކުންފުންޏާއި އެމެރިކާގެ އެލްއޭ ޑޮޖާސްގެ ކޯ-އޯނަރުކަން ވެސް ކުރާ ބޯލީގެ އިތުރުން ދެން މި ކޮންސޯޓިއަމްގައި ހިމެނެނީ އެމެރިކާގެ ބިލިއަނަރު މާކް ވޯލްޓާ އާއި ސްވިޒަލެންޑުގެ ބިލިއަނަރު ހަންސްޔޯގް ވީސް އެވެ.
ޗެލްސީ ގަންނަން ހުށަހެޅި ފަރާތްތަކުގެ ތެރެއިން ޝޯޓްލިސްޓްކޮށް، ބޯލީގެ ކޮންސޯޓިއަމަށް ކުލަބް ވިއްކާލަން ޗެލްސީން ވަނީ މި މަހުގެ ކުރީކޮޅު ނިންމައިފަ އެވެ. ނަމަވެސް އޭގެ ފަހުން އަބްރަމޮވިޗް އޭނާ ޗެލްސީ ވިއްކާލަން ކުރި ޝަރުތުތަކާ ދެކޮޅު ހަދާކަމަށް އިނގިރޭސި ސަރުކާރުން ބުނި ނަމަވެސް އޭނާ ވަނީ އެކަން ދޮގު ކޮށްފަ އެވެ. އަދި ބޯލީ އަށް ކުލަބު ހަވާލުކުރަން ޕްރިމިއާ ލީގުން މިދިޔަ ހަފްތާގައި ހުއްދަ ލިބުނު އިރު، ޖެހިގެން އައި ދުވަހު އިނގިރޭސި ސަރުކާރުން ވެސް ވަނީ އެކަމަށް ހުއްދަ ދީފަ އެވެ.
ރަޝިއާގެ ރައީސް ލަޑިމިއާ ޕުޓިންއާ ގާތް ގުޅުމެއް އަބްރަމޮވިޗް ބާއްވާ ކަމަށް ބުނެ އިނގިރޭސި ސަރުކާރުން އަބްރަމޮވިޗަށް ދަތިކުރުމުގެ ފިޔަވަޅު އެޅި އެވެ. ރަޝިއާއިން ޔޫކްރޭނާ ދެކޮޅަށް ހަނގުރާމަ ފެށުމުން ޗެލްސީ ހިންގުމަށް ވެސް އިނގިރޭސި ސަރުކާރުން ހުރަސްތައް ކުރިމަތި ކުރި އެވެ. މިހާތަނަށް ޗެލްސީ ވެސް ހިންގީ، ކުޅުންތެރިންގެ ކޮންޓްރެކްޓްތައް އާ ނުކުރެވި އެވެ. އެ މުއްދަތުގައި ޗެލްސީ އޮޕަރޭޓް ކުރީ ހާއްސަ ލައިސެންސެއްގެ ދަށުންނެވެ.
ކުލަބު ގަތުމަށް ފަހު ލިބޭ ހުރިހާ ފައިދާއެއް ޖަމާކުރަން ހަމަޖެހިފައި ވަނީ ޗެލްސީގެ ފްރީޒް ކޮށްފައިވާ ބޭންކް އެކައުންޓަށެވެ. އަދި ރަޝިއާ އާއި ޔޫކްރޭނާ ދެމެދު ހިނގަމުންދާ ހަނގުރާމައިގައި ގެއްލުންވި ޔޫކްރޭނުގެ ފަރާތްތަކަށް ޗެރިޓީގެ ގޮތުގައި އެ ފައިސާ ފޯރުކޮށްދޭން ހަމަޖެހިފައި ވަނީ އިނގިރޭސި ސަރުކާރުގެ ބެލުމުގެ ދަށުންނެވެ.
އަބްރަމޮވިޗް 2003 ވަނަ އަހަރު ޗެލްސީ ގަތީ 140 މިލިއަން ޕައުންޑަށެވެ. އެއީ އޭރު ގާތްގަނޑަކަށް 233 މިލިއަން ޔޫއެސް ޑޮލަރެވެ. އޭނާގެ ޗެއާމަން ކަމުގައ ހޭދަވި 19 އަހަރު ވަނީ ޓްރާންސްފާ މާކެޓުގައި ގާތްގަނޑަކަށް 2.1 ބިލިއަން ޕައުންޑު ހޭދަކޮށްފަ އެވެ.
މި މުއްދަތުގައި ކުލަބުގައި 13 ކޯޗުންނާ އެކު ފުޓުބޯޅައިގެ ހުރިހާ ކާމިޔާބީއެއް ޗެލްސީން ހޯދި އެވެ. ޕްރިމިއާ ލީގުގެ ފަސް ތައްޓާއި އެފްއޭ ކަޕު ވެސް ފަސް ފަހަރު ހޯދި އެވެ އޭގެ އިތުރުން ލީގު ކަޕް ވަނީ ތިން ފަހަރު ހޯދައިފަ އެވެ. އަދި އިނގިރޭސި ކޮމިއުނިޓީ ޝީލްޑާއި ޔޫއެފާ ޗެމްޕިއަންސް ލީގާއި ޔޫރޮޕާ ލީގު ދެ ފަހަރު ކާމިޔާބުކުރި އިރު، ޔޫއެފާ ސުޕަ ކަޕާއި ފީފާ ކްލަބް ވޯލްޑް ކަޕް ވެސް ވަނީ ހޯދައިފަ އެވެ.
އަބްރަމޮވިޗުގެ ބެލެނިވެރި ކަމުގައި ޗެލްސީން ސުޕަ ކަޕާއި ކްލަބް ވޯލްޑް ކަޕް ހޯދީ މި ސީޒަނުގަ އެވެ. މި ސީޒަނުގައި ޗެލްސީން ޕްރިމިއާ ލީގުގެ ތިންވަނަ ހޯދި އިރު، އެފްއޭ ކަޕާއި ލީގު ކަޕް ފައިނަލުން ބަލިވީ ޕެނަލްޓީ ޖަހައިގެންނެވެ. އަދި ޗެމްޕިއަންސް ލީގުގައި އެޓީމު ވަނީ ކުއާޓާ ފައިނަލާ ހަމައަށް ދަތުރުކޮށްފަ އެވެ.
ޗެލްސީއާ ވަކިވުމުގެ ކުރިން އަބްރަމޮވިޗް މިދިޔަ ހޮނިހިރު ދުވަހު ނެރުނު އަބަޔާނުގައި ވަނީ، ކުލަބާ އެކު ހޯދުނު ކާމިޔާބީތަކާ މެދު އުފާކުރާ ކަމަށް ބުނެފަ އެވެ. ކްލަބްގެ ކާމިޔާބީތަކުގައި ހިއްސާވުމަކީ މުޅި އުމުރަށް ވެސް އޭނާ އަށް ލިބޭ ފަހުރަކަށް ވާނެ ކަމަށް ބުނެފައު ވެއެވެ. އަދި މާޒީވެ ދިޔަތަނުގައި ކްލަބްގެ ހުރިހާ ކުޅުންތެރިންނާއި އޮފިޝަލުންގެ އިތުރުން، މިހާރު ތިބި ކުޅުންތެރިންނާއި ސްޓާފުން އަދި ސަޕޯޓަރުންނަށް ވެސް ވަރަށް ހާއްސަ ޝުކުރެއް އަދާ ކޮށްފައި ވެއެވެ.
"މި ކުލަބުގެ މިލްކުވެރިކަން އަންނަނީ ވަރަށް ބޮޑު ޒިންމާ އަކާ އެކު. އަހަރެންގެ އެންމެ ބޮޑު އަމާޒަކީ، ޗެލްސީގެ ފިރިހެން އަދި އަންހެން ޓީމުތަކަށް ކާމިޔާބު ހޯދައި، ކުލަބުގެ އެކަޑަމީ އަދި ކްލަބް ފައުންޑޭޝަން ހިންގުން ފަދަ މުހިއްމު މަސައްކަތްތައް ފުރިހަމަ ގޮތުގައި ކުރިއަށް ގެންދިއުން،" އަބްރަމޮވިޗުގެ ބަޔާނުގައި ބުނެފައި ވެއެވެ.
"އަހަރެން ވަރަށް އުފާވޭ މިހާރު މިކަން ފައިނަލްވީމަ، ޗެލްސީގެ އާ ވެރިންނާ ކުލަބް ހަވާލު ކުރާއިރު ދަނޑުމަތީގައި އަދި ދަނޑުން ބޭރުގައި ވެސް ކުލަބަށް ކާމިޔާބަށް އެދެން."
އަބްރަމޮވިޗް ޗެލްސީ ވިއްކާލަން ނިންމި އިރު އޭނާ ވަނީ ޗެލްސީގެ 1.6 ބިލިއަން ޕައުންޑުގެ ލޯނު މާފް ކޮށްދިނުމުގެ އިތުރުން، އޭނާއާ ނުލައި ވެސް ކުލަބް އެންމެ މަތީ ފަންތީގައި އޮޕަރޭޓް ކުރަން އާ ވެރިންނަށް މުހިއްމު ޝަރުތުތަކެއް ވެސް ކޮށްފަ އެވެ. އޭގެ ތެރޭގައި ކުލަބަށް 1.75 ބިލިއަން ޕައުންޑް އިނެވެސްޓް ކުރުމާ އެކު، ކުރިއަށް އޮތް 10 އަހަރު ވަންދެން މެނޭޖްމަންޓް ފީ ނެގުން މަނާކޮށް މި މުއްދަތުގައި ކުލަބުގެ އެއްވެސް ހިއްސާއެއް ނުވިއްކަން އޭނާ ޝަރުތު ކޮށްފައިވެ އެވެ.