ލަންޑަން (މެއި 25) - އެމެރިކާގެ އެލްއޭ ޑޮޖާސްގެ ކޯއޯނަރު ޓޮޑް ބޯލީ އިސްކޮށް ހުރެ ހިންގި ކޮންސޯޓިއަމަށް އިންގްލެންޑުގެ ޗެލްސީ ފުޓުބޯޅަ ކުލަބް ވިއްކާލަން ޕްރިމިއާ ލީގުގެ ހުއްދަ ލިބިއްޖެ އެވެ.
ޗެލްސީ ގަންނަން ހުށަހެޅި ގިނަ ބިޑްތަކުގެ ތެރޭން ބޯލީގެ ކޮންސޯޓިއަމަށް ކުލަބް ވިއްކާލަން މި މަހުގެ 6 ވަނަ ދުވަހު ވަނީ ނިންމައިފަ އެވެ. އެ ކޮންސޯޓިއަމުން ވަނީ ކުލަބް ގަންނަން 4.25 ބިލިއަން ޕައުންޑް (5.2 ބިލިއަން ޑޮލަރު) ހުށަހަޅައިފަ އެވެ. ނަމަވެސް ކުލަބް ވިއްކާލުމުގެ ކަންކަން ފުރިހަމަ ވާން އޮތީ ޕްރިމިއާ ލީގުގެ ބޯޑުގެ އިތުރުން އިނގިރޭސި ސަރުކާރުގެ ވެސް ހުއްދަ ލިބިގެންނެވެ.
ކުލަބް އޯނަރުންނާއި ޑިރެކްޓަރުންގެ ޓެސްޓުން ބޮއެލީގެ ކޮންސޯޓިއަމް ފާސްވެފައިވާ ކަމަށް ޕްރިމިއާ ލީގުގެ ބޯޑުން ރޭ ވަނީ ނިންމައިފަ އެވެ. މިއާ އެކު އަންނަ އަންގާރަ ދުވަހުގެ ކުރިން ކްލަބް ސޭލް ފުރިހަމަ ކުރަން ސަރުކާރުގެ ވެސް ހުއްދަ ލިބޭނެ ކަމަށް ރިޕޯޓްތައް ބުނެ އެވެ.
ބޯލީ އިސްވެ ހުރެ ކޮންސޯޓިއަމް ހިންގި ނަމަވެސް ކުލަބުގެ ސޭލް ނިންމުމަށް ފަހު ޗެލްސީގެ ހިއްސާގެ ބޮޑު ބައެއްގެ ކޮންޓްރޯލް އޮންނާނީ ކެލިފޯނިއާގެ ޕްރައިވެޓް އިންވެސްޓްމެންޓް ކުންފުންޏެއް ކަމަށްވާ ކްލިއާލޭކް ކެޕިޓަލް އަށެވެ. މި ކޮންސޯޓިއަމަށް އިނެވެސްޓް ކުރި އިތުރު ފަރާތްތަކުގެ ތެރޭގައި އެމެރިކާގެ ބިލިއަނަރު މާކް ވޯލްޓާ އާއި ސްވިޒަލެންޑުގެ ބިލިއަނަރު ހަންސްޔޯގް ވީސް ހިމެނެ އެވެ.
ރަޝިއާގެ ރައީސް ވަޑިމިއާ ޕުޓިންއާ ގާތް ގުޅުމެއް ބާއްވާ ކަމަށް ބުނެ ޗެލްސީގެ ވެރިޔާ ރޯމަން އަބްރަމޮވިޗަށް ދަތިކުރުމުގެ ފިޔަވަޅު އެޅުމުގެ ކުރިން ކުލަބް ވިއްކާލަން ދިޔައީ މަސައްކަތް ކުރަމުންނެވެ. ނަމަވެސް ފިޔަވަޅުތަކާ އެކު ކްލަބު ވިއްކާލުމުގެ ކަންކަން މަޑުޖައްސާލައި، ޗެލްސީ ކުރިޔަށް ގެންދަން ޖެހިފައި ވަނީ އިނގިރޭސި ސަރުކާރުގެ ހާއްސަ ލައިސެންސެއްގެ ދަށުންނެވެ. އަދި މި ލައިސެންސް މި މަހުގެ 31 ގެ ނިޔަލަށް ހަމަވާނެ އެވެ.
ކްލަބް ވިއްކާލައިގެން ލިބޭ އެއްވެސް ފައިދާއެއް ކުލަބުގެ ވެރިޔާ ރޯމަން އަބްރަމޮވިޗަށް ނުލިބޭ ގޮތަށް ސަރުކާރުން ޝަރުތު ކުރެ އެވެ. ހަމަ އެއާ އެކު އަބްރަމޮވިޗް ވެސް ވަނީ ކުލަބް ވިއްކައިގެން ލިބޭ ފައިދާ އޭނާ ބޭނުން ނުވާ ކަމަށާއި، ކުލަބަށް އިންވެސްޓް ކޮށްފައިވާ 1.5 ބިލިއަން ޕައުންޑުގެ ލޯނު ވެސް މާފު ކޮށްދީފަ އެވެ.
އެހެން ނަމަވެސް ބޯލީ އަށް ޗެލްސީ ވިއްކާލަން ނިންމުމުގެ ފަހުން، އަބްރަމޮވިޗް އެ ޝަރުތުތަކަށް އެއްބަސްވާން ދެކޮޅު ހަދާ ކަމަށް އިނގިރޭސި ސަރުކާރުން މިމަހު ކުރީކޮޅު ބުނުމުން ކުލަބު ވިއްކާލުމުގެ ކަންކަން ހުއްޓާލާން ޖެހިދާނެކަމުގެ ބިރު ހީވި އެވެ. އެކަމަކު އަބްރަމޮވިޗާއި ޗެލްސީން ވެސް ވަނީ އިނގިރޭސި ސަރުކާރުގެ އެ ވާހަކަތައް ދޮގު ކޮށްފަ އެވެ. އަދި އޭގެ ފަހުން އިނގިރޭސި ސަރުކާރުން އަބްރަމޮވިޗާ އެކު މި މައްސަލައަށް ގާނޫނީ ހައްލެއް ވެސް ހޯދާފައިވާ ކަމަށްވެ އެވެ.