ލަންޑަން (މެއި 18) - ޗެލްސީގެ ބެލެނިވެރި ކުންފުންޏަށް ދައްކަންޖެހޭ 1.9 ބިލިއަން ޑޮލަރުގެ ލޯނާ ގުޅޭ ގޮތުން ގާނޫނީ ގަރާރެއް ފާސްކޮށް، ކުލަބް ވިއްކާލަން އިނގިރޭސި ސަރުކާރުން ހުއްދަ ދޭން ނިންމާފައި ވާކަމަށް އެގައުމުގެ މިޑިއާތަކުން ރިޕޯޓް ކޮށްފި އެވެ.
ޗެލްސީ ވިއްކާލައިގެން އޭގެއިން އެއްވެސް ފައިދާއެއް އަބްރަމޮވިޗަށް ނުލިބުން އެއީ އިނގިރޭސި ސަރުކާރުގެ ޝަރުތެކެވެ. ކްލަބް ވިއްކާލައިގެން ލިބޭ ފައިދާ ހަދިޔާކުރަން ޔޫކްރޭނުގައި ފައުންޑޭޝަނެއް ގާއިމުކުރަން ހަވާލު ކޮށްފައި ވަނީ ޔުނިސެފް ޔޫކޭ އަދި ސޮކާ އެއިޑްގެ ކުރީގެ ޗީފް އެގްޒެކެޓިވް މައިކް ޕެންރޯސް އާއެވެ. އޭނާ ވެސް ވަނީ ޗެލްސީގެ ސޭލް އިން އެއްވެސް ފައިދާއެއް އަބްރަމޮވިޗަށް ނުލިބޭނެކަމުގެ ޔަގީންކަން އިނގިރޭސި ސަރުކާރަށް ދީފަ އެވެ.
އިނގިރޭސި ސަރުކާރުން ބޭނުން ވަނީ ޗެލްސީ ވިއްކާލައިގެން ލިބޭ ފައިދާ، އެ ކުލަބުގެ ފްރީޒް ކޮށްފައިވާ ހޯލްޑިން އެކައުންޓަށް ޖަމާ ކުރާށެވެ. ނަމަވެސް ފައިދާގެ އަދަދު އިނގިރޭސިވިލާތުގެ ކެމްބަލީ އިންޓަނޭޝަނަލް އިންވެސްޓްމަންޓް މެދުވެރިކޮށް ޗެރިޓީ އަށް ފޯރު ކޮށްދޭން އަބްރަމޮވިޗް ބޭނުންވާކަމަށް ބުނެ މީޑީއާގައި ރިޕޯޓް ކޮށްފައި ވިޔަސް، ޓޮޑް ބޯލީގެ ބިޑް ކާމިޔާބުކުރިކަން އަންގައި ޗެލްސީން ކުރި އިއުލާނުގައި، ފައިދާގެ ގޮތުގައި ލިބޭ ވަރު ޗެރިޓީއަށް ހަހދިޔާކުރަން ފްރީޒް ކޮށްފައިވާ އެކައުންޓަށް ޖަމާކުރަން ނިންމާފައި ވާކަމަށް ބުނެފައި ވެއެވެ.
އެހެން ނަމަވެސް އަބްރަމޮވިޗުގެ ވަކީލުންނާ އެކު އެކަމާ ގުޅޭގޮތުން އެއްބަސްވުމަކަށް އާދެވި، ޓޮޑް ބޯލީގެ ކޮންސޯޓިއަމާ އެކު ޑީލް ފައިނަލް ކުރަން ސަރުކާރުގެ ހުއްދަ ލިބިފައި ވާކަމަށް މީޑިއާތަކުން މިހާރު ހާމަ ކުރެ އެވެ. މިއާ އެކު 3.1 ބިލިއަން ޑޮލަރުގެ ފައިދާ އެޓީމުގެ ފްރީޒް ކޮށްފައިވާ ހޯލްޑިން އެކައުންޓަށް ޖަމާ ކުރެވޭނެ އެވެ. އަދި އެއަށް ފަހު ފައުންޑޭޝަނަށް އެ ފައިސާ ޓްރާންސްފާ ކުރާނީ ސަރުކާރުގެ ކޮންޓްރޯލުގަ އެވެ.
އެލްއޭ ޑޮޖާސްގެ ޓޮޑް ބޯލީ އިސްވެ ހުރެގެން ހިންގާ ކޮންސޯޓިއަމް އަށް ޗެލްސީ ވިއްކާލަން އެ ކުލަބުން ނިންމާފައި ވާއިރު، ލޯނާ ގުޅިގެން ރޯމަން އަބްރަމޮވިޗް އޭނާ ކުރިން އެއްބަސްވި ކަންކަމާ ދެކޮޅު ހަދައި، ޑީލް ފައިނަލް ކުރަން ހުރަސް އަޅާ ކަމަށް އިނގިރޭސި ސަރުކާރުން މިހަފްތާ ވަނީ ބުނެފަ އެވެ.
އާސެނަލްގެ ކުރީގެ ވައިސް ޗެއާމަން ޑޭވިޑް ޑެއިންގެ ލަފާގެ މަތިން އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވަނީ ޗެލްސީ ވިއްކާލައިގެން ލިބޭ ފައިދާއިން 750 މިލިއަން ޕައުންޑް އެގައުމުގެ ގްރާސްރޫޓު ފުޓުބޯޅައަށް ހަދިޔާކުރަން ވިސްނާކަމަށް ބުނެފަ އެވެ. އަދި ޗެލްސީގެ ސަޕޯޓަރުން ދަނޑުގައި ރޯމަން އަބްރަމޮވިޗުގެ ނަން ބޭނުންކުރާތީވެ އެކަމާ ވެސް އޭނާ ވަނީ ކަންބޮޑުވުން ފާޅު ކޮށް އެކަން ހުއްޓާލަން ގޮވާލައިފަ އެވެ. އެކަމަކު ކޯޗު ތޯމަސް ޓުޗެލް ވަނީ ސަޕޯޓަރުންގެ ދިފާއުގައި ވާހަކަ ދައްކައިފަ އެވެ.
ބޮރިސްގެ ވާހަކަތަކާ ގުޅިގެން ޓުޗެލް އަށް މީޑިއާ އިން ކުރިމަތިކުރުވި ސުވާލަކަށް ޖަވާބު ދެމުން އޭނާ ބުނީ، ޗެލްސީގެ ސަޕޯޓަރުންނާ އެމީހުން ސަޕޯޓުކުރާ ގޮތާ ގުޅޭގޮތުން މަޖިލީހުގައި މަޝްވަރާކުރަން ޖެހޭ ކަމެއް ކަމަށް ނުދެކޭ ކަމަށެވެ. ނަމަވެސް މިއީ މަޖިލީހުގައި މަޝްވަރާ ކުރެވެން ޖެހޭ މައުލޫއެއް ނަމަ އޭނާ ވެސް ކަންބޮޑުވާނެ ކަމަށާއި، އެއަށް ވުރެ ބޮޑަށް އިސްކަން ދޭން ޖެހޭ ކަންކަން އޭނާގެ އެބަހުރި ކަމަށެވެ.
މީގެ ދެ ހަފްތާ ކުރިން 5.2 ބިލިއަން ޑޮލަރަށް ޗެލްސީ ވިއްކާލަން ބޯލީގެ ކޮންސޯޓިއަމް އާއެކު އެއްބަސްވުމަކަށް އައުމުގެ ކުރިން ވެސް އިނގިރޭސި ސަރުކާރުން ވަނީ އަބްރަމޮވިޗް އެ ލޯނު އަނބުރާ ދައްކަން ޑިމާންޑް ކުރާކަމަށް ބުނެފަ އެވެ. ނަމަވެސް ޗެލްސީން ވަނީ އަބްރަމޮވިޗާ ހަވާލާދީ އެކަން ދޮގުކޮށް ބަޔާނެއް ނެރެފަ އެވެ.
ރަޝިއާ އިން ޔޫކެރޭނަށް އަރައި ހަނގުރާމަ ފެށުމާ އެކު އަބްރަމޮވިޗަށް ޗެލްސީ ވިއްކާލަން މަޖުބޫރުވީ، އޭނާ އަކީ ރަޝިއާގެ ރައީސް ވްލަޑިމިއާ ޕުޓިންއާ ގާތް ގުޅުމެއް އޮންނަ ފަރާތަކަށް ވާތީވެ އިނގިރޭސި ސަރުކާރުން އޭނާއާ ދެކޮޅަށް ދަތިކުރުމުގެ ފިޔަވަޅު އަޅަން އެގައުމުގެ ގާނޫނު ހަދާ މަޖިލީހުގައި ވާހަކަ ދައްކަން ފެށުމުންނެވެ.
މިދިޔަ މާޗް މަހުގެ ދެވަނަ ދުވަހު ކްލަބް ވިއްކާލަން އިއުލާން ކޮށް އޭނާ ވަނީ ބޮޑު ދަރަނި ވެސް އުވާލަން ނިންމައިފަ އެވެ. އޭނާ ނިންމީ، ކުލަބް ވިއްކާލުމަށް ފަހު ލިބޭ ހުރިާ ފައިދާއެއް ޔޫކްރޭނުގައި ހަނގުރާމައިގައި ހާލުގައި ޖެހުނު ފަރާތްތަކަށް ޗެރިޓީއަށް ހަދިޔާ ކުރާށެވެ. އެހެން ނަމަވެސް ދަތިކުރުމުގެ ފިޔަވަޅުތަކާ އެކު އޭނާގެ މުދާތައް ފްރީޒް ކުރުމުން ކުލަބް ވިއްކާލަން ކުރި މަސައްކަތް ވެސް ހުއްޓާލަން ޖެހުނީ އެވެ.
އަބްރަމޮވިޗަށް އެޅި ދަތިކުރުމުގެ ފިޔަވަޅުތަކާ އެކު މިހާތަނަށް ޗެލްސީ ހިންގަމުން އަންނަނީ އިނގިރޭސި ސަރުކާރުން ދީފައިވާ ހާއްސަ ލައިސެންސެއްގެ ދަށުންނެވެ. އެ ލައިސެންސްގެ މުއްދަތު މި މަހުގެ ނިޔަލަަށް ހަމަވާނެ އެވެ.
