ކުރީގެ ރައީސް އަބްދުﷲ ޔާމީންގެ ވެރިކަމުގައި ހުޅުމާލެ ދެވަނަ ފިޔަވަހީގައި ހަދަން ފެށި ވިނަރެސް ފްލެޓްތައް ދޭން ސަރުކާރުން އޭރު ނިންމާފައި އޮތީ އަގަކީ މަހަކު 7،000ރ. ކަމަށް އޭރުގެ ހައުސިން މިނިސްޓަރު އަދި މިހާރު މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އެޗްޑީސީން "ވިނަރެސް" ފްލެޓްތައް ހެދީ މެދުފަންތީގެ މީހުންނަށް ހާއްސަކޮށްގެންނެވެ. ދާދިފަހުން އެ ކުންފުނިން ވަނީ އެތަން އާންމުންނަށް ބަލައިލުމުގެ ފުރުސަތު ވެސް ދީފަ އެވެ. އަދި އެ ތަނުގެ އަގުތަކާއި ފައިސާ ދައްކަން ޖެހޭ އުސޫލުތައް އާންމުކުރުމުން ގިނަ ބަޔަކު ވަނީ އެ އަގުތަކާ ގުޅޭ ގޮތުން އެތައް ކަންބޮޑުވުންތަކެއް ފާޅުކޮށްފަ އެވެ؛ ގިނަ މީހުން ބުނަނީ މާ އަގުބޮޑު ކަމަށެވެ.
އެކަމާ ގުޅޭ ގޮތުން މުއިއްޒު ވެސް ހިތްހަމަނުޖެހުން ފާޅުކުރައްވާ މިރޭ ކުރެއްވި ޓުވީޓެއްގައި ވިދާޅުވީ، ޔާމީންގެ ސަރުކާރުން ފެށި 1،530 ޔުނިޓުގެ ހައުސިން މަޝްރޫއު، މި ސަރުކާރުން 1،340 ޔުނިޓަށް ކުޑަކޮށް، "ވިނަރެސް"ގެ ނަންދީ އަތްނުފޯރާހާ އަގުބޮޑުކޮށް ވިއްކަމުންދާ ދިއުން ބަދަލުކުރަންޖެހޭ ކަމަށެވެ.
"ރައީސް ޔާމީންގެ ސަރުކާރުގައި މި ފްލެޓްތައް ދިނުމަށް ނިންމާފައި ވަނީ މަހަކު 7،000ރ. އަށް،" އޭނާ ވިދާޅުވި އެވެ.
މުއިއްޒު ވަނީ، މީގެ ކުރިން، ޔާމީންގެ ސަރުކާރުގައި ހިންގި އެންމެ ބޮޑު ހައުސިން މަޝްރޫއު "ހިޔާ"ގެ ފްލެޓްތައް ވެސް މި ސަރުކާރުން އަގުބޮޑުކޮށް ވިއްކި ކަމަށް ވިދާޅުވެ، ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ. އޭނާ ވިދާޅުވި ގޮތުގައި، ހިޔާ ފްލެޓްތައް ކުއްޔަށް ދޭން ޔާމީންގެ ސަރުކާރުން ނިންމީ މަހަކު 5،000ރ. އަށެވެ. އެ އަގަށް ބަދަލުކުރުމަށް ގޮވާލައި، ހިޔާގައި ދިރިއުޅޭ މީހުން މުޒާހަރާ ވެސް ކޮށްފައިވެ އެވެ.
ވިނަރެސްގެ ތިން ކޮޓަރީގެ 1،344 އެޕާޓްމެންޓްގެ ތެރެއިން ގާތްގަނޑަކަށް 1،000 ފްލެޓް ހުޅުވާލަނީ މާލޭގެ ރަށްވެހިންނަށެވެ. ދެން ގުޅިފަޅާއި ސީ ލައިފުން ފްލެޓް ގަތް މީހުންނަށާއި ހިޔާ ފްލެޓް ދޫކޮށްލި މީހުންނަށް ވެސް ވިނަރެސް އިން ފްލެޓް ދޭނެ އެވެ. އަދި މާލޭގައި ދިރިއުޅޭތާ 15 އަހަރު ވެފައިވާ މީހުންނަށް ހާއްސަކޮށް 100 ފްލެޓް ވަނީ ހާއްސަކޮށްފަ އެވެ.
ގާތްގަނޑަކަށް 800-900 އަކަފޫޓު ބޮޑުމިނުގެ އެ ފްލެޓްތައް ތަފާތު ދެ ގޮތަކަށް ގަތުމުގެ ފުރުސަތު އެބައޮތެވެ. އެއް އޮޕްޝަނަކީ ފްލެޓްގެ އަގުގެ 15 ޕަސެންޓް ޑައުންޕޭމެންޓްގެ ގޮތުގައި ދައްކައިގެން 20 އަހަރުގެ ތެރޭގައި ތަނުގެ އަގު އަދާކުރުމެވެ. ދެވަނަ އޮޕްޝަނަކީ 20 ޕަސެންޓް ދައްކައިގެން އެޕާޓްމެންޓްގެ ކުލި 25 އަހަރަށް ބަހާލައިގެން ދެއްކުމެވެ.
ފުރަތަމަ އޮޕްޝަނުގައިވާ ގޮތަށް ކުލި 20 އަހަރަށް ބަހާލުމުން ކޮންމެ އެޕާޓްމެންޓަކަށް ވެސް 19،000ރ. - 23،000ރ. އާ ދެމެދުގެ އަގެއް ދައްކަން ޖެހެ އެވެ. އެގޮތަށް ކުލި ބަހައިލުމުން ފްލެޓްގެ ޖުމްލަ އަގު 4.9 - 6 މިލިއަން ރުފިޔާ އަށް ބޮޑުވެ އެވެ.
ދެވަނަ އޮޕްޝަނުގައިވާ ގޮތަށް ޑައުންޕޭމެންޓްގެ ގޮތުގައި 20 ޕަސެންޓް، 25 އަހަރަށް ބަހާލައިގެން ދެއްކުމުން އެވްރެޖުކޮށް މަހަކު 16،700ރ. - 20،500ރ. އާ ދެމެދުގެ އަދަދެއް ދައްކަން ޖެހެ އެވެ. އެހެން ހެދުމުން ތަނުގެ ޖުމްލަ އަގު 5.5 - 7.3 މިލިއަން ރުފިޔާ އަށް ބޮޑުވެ އެވެ.
އެޗްޑީސީން އާންމުކޮށްފައިވާ ގޮތުން ވިނަރެސް ފްލެޓް އެއްފަހަރާ ދެއްކުމުން ނުވަތަ ބޭންކުން ލޯނެއް ނަގައިގެން ދައްކާ ނަމަ އެޕާޓްމެންޓްތައް އުޅޭނީ 2.5 މިލިއަން ރުފިޔާ އާއި ތިން މިލިއަން ރުފިޔާއާ ދެމެދުގެ އަގުތަކެއްގަ އެވެ. އެހެންވެ އެ ކުންފުނި މެދުވެރިވެގެން އިންސްޓޯލްމެންޓަށް މަހު ކުލި ދައްކާ މީހުން ދައްކަން ޖެހެނީ ގާތްގަނޑަކަށް ދެ ގުނަ ނުވަތަ ތިން ގުނަ ބޮޑު އަދަދެކެވެ.