މި އަހަރުގެ ބޮޑު އީދު ނިމި، އެންމެން ވެސް އަލުން މަސައްކަތަށް މިއަދު ނުކުތީ އެވެ. ކޮވިޑްގެ ބަލިމަޑުކަމުގައި ހޭދަކުރި ދެ އަހަރަށް ފަހު މި އަހަރުގެ ބޮޑު އީދު މުޅި ރާއްޖޭގައި ވެސް ފޯރިގަދަ އެވެ. ހާއްސަކޮށް ކ. މާފުށީގައި މި ފަހަރު ފާހަގަކުރި ބޮޑު އީދު އެހެން ހުރިހާ އަހަރުތަކަށް ވުރެ މާ ހާއްސަ އެވެ.
މި ރަށު ކައުންސިލްގެ ރައީސް ހުސައިން ސޮލާހު ވިދާޅުވި ގޮތުގައި މިދިޔަ ބޮޑު އީދަކީ މާފުށީގެ ފަހުގެ ތާރީހުގައި އެންމެ ކުލަގަދަކޮށް ފާހަގަ ކުރި އީދެވެ.
ދެން އޮތީ މާފުށީގައި ރޭ ރަސްމީކޮށް ފެށި އޭޝިއާގެ ބޮޑީ ބިލްޑިން އަދި ފިޒިކް ސްޕޯޓްސް ޗެމްޕިއަންޝިޕެވެ. މިއީ ބޮޑު އީދުގެ ފަހުން އަނެއްކާ ވެސް މާފުއްޓަށް އައި ދެވަނަ އީދުގެ ގޮތުގައި އޭނާ ފާހަގަ ކުރި އެވެ.
"އެހެންވެ އަޅުގަނޑުމެން ކުރިން ވެސް ކިޔަމުން ދިޔައީ މާފުއްޓަށް މިއޮތީ ދެ އީދު އައިސްފައޭ،" ސޮލާ ވިދާޅުވި އެވެ.
ރާއްޖޭގައި މިހާތަނަށް ބާއްވާ ބައިނަލްއަގްވާމީ އެންމެ ބޮޑު ކުޅިވަރު މުބާރާތް މާލެ އިން ބޭރުގައި ބޭއްވުމުގެ ވިސްނުމަކީ، ބޮޑީ ބިލްޑިން އެސޯސިއޭޝަނުން ކުރިން ވެސް ވިސްނުން ގެންގުޅެމުން ދިޔަ ކަމެއް ކަމަށް އެ އެސޯސިއޭޝަންގެ ރައީސް އިބްރާހިމް ހަމީދު ވިދާޅުވި އެވެ.
"މާލޭގައި ހުރިހާ ކުޅިވަރުތައް ނުކުޅުން އެއީ އަބަދުވެސް އޮންނަ ވިސްނުމެއް. އަނެއްކާ އަޅުގަނޑުމެން ބީބީއޭއެމުން ދައްކާ ވާހަކައެއް ރަށްރަށަށް ވެސް މި ކުޅިވަރު ޕްރަމޯޓް ކުރުން،" އޭނާ ވިދާޅުވި އެވެ.
އިބްރާހިމް ވިދާޅުވީ، މާފުށީގައި މުބާރާތް ބާއްވަން ނިންމި ސަބަބަކީ ވަސީލަތްތައް ގާއިމުވެފައި ހުރުމުގެ އިތުރަށް، މި ރަށުގައި ކަމެއް ކުރާ ނަމަ ކުދި ބޮޑު އެންމެން އެ ކަމެއްގައި ބައިވެރިވެގެން އުޅޭތީ ކަމަށެވެ.
ކައުންސިލްގެ ރައީސް ސޮލާ ވެސް ވިދާޅުވިގޮތުގައި މާފުށީގެ ބޮޑެތި އަދި ކުދި ވިޔަފާރިތަކާއި ރަށުގެ ރައްޔިތުންގެ ބައިވެރިވުން ވެސް މި ކަމުގައި އެބައޮތެވެ.
"ތިބޭފުޅުންނަށް ފެންނާނެ ރޭ ބޭއްވި އޯޕަނިން ސެރޮމަނީ ވެސް. އެ ތާނގައި ގިނައިން ތިބޭނީ މާފުށީގެ ރައްޔިތުން،" އޭނާ ވިދާޅުވި އެވެ.
ކޮވިޑްގައި މިދިޔަ ދެ އަހަރަކީ މާފުއްޓަށް ވެސް އުނދަގޫ ދެ އަހަރެވެ. މާލެ ފިޔަވައި އެންމެ ބޮޑު އާމްދަނީއެއް ވައްދާ އެއް ރަށަކީ މާފުއްޓެވެ. އެކަމަކު ކޮވިޑްގައި ޖެހި މި ރަށަށް ވަންނަ އާމްދަނީ ބޮޑުތަނުން ދަށަށް ދިޔަ އެވެ.
ސޮލާ ވިދާޅުވި ގޮތުގައި އެ ހާލަތުން މަޑުމަޑުން އަރައި ގަނެވި ކޮވިޑްގެ ކުރިން އޮތް ހާލަތަށް އިޔާދަ ވުމަށް ކައުންސިލާއި ރަށުގެ ކުދިބޮޑު ވިޔަފާރިތައް ގުޅިގެން އަންނަނީ މަސައްކަތް ކުރަމުންނެވެ.
ކޮވިޑާ ގުޅިގެން މާފުއްޓަށް އައި އެންމެ ބޮޑު ލޮޅުމެއް އައީ ވެސް ސޮލާހާއި އޭނާގެ ކައުންސިލް މެންބަރުން މަގާމާ ހަވާލުވިތާ ކައިރީގަ އެވެ. މިދިޔަ އަހަރު މުޅި ރަށުގައި ކޮވިޑް ފެތުރި ގިނަ ބަޔަކަށް ބަލި ޖެހުމުން މާފުށި ލޮކްޑައުން ކުރަން މަޖުބޫރުވި އެވެ. ސޮލާ އާއި އޭނާގެ ކައުންސިލްގެ ޓީމަށް ކުރިމަތިލާން ޖެހުނީ ފަސޭހަ ކަމަކާ ނޫނެވެ.
"ކޮވިޑްގެ އެންމެ އުނދަގޫ ހާލަތު މާފުއްޓަށް ކުރިމަތިވީ މިދިޔަ އަހަރު ހަމަ އަޅުގަނޑުމެން ކައުންސިލާ ހަވާލުވި ތަނުން. އެތައް ބަޔަކަށް ކޮވިޑް ޖެހި މުޅި ރަށް ލޮކްޑައުން ކުރަން ޖެހުނު،" ކޮވިޑް ޖެހިގެން އޭނާގެ ހުވާ ކުރުން ވެސް ވީޑިއޯ މެދުވެރިކޮށް ކުރިއަށް ގެންދިޔަ ސޮލާ ވިދާޅުވި އެވެ.
"އެކަމަކު އެ ހާލަތުން އަރައިގަނެ އަނެއްކާ ވެސް ރަނގަޅު ހާލަތަކަށް މި ދަނީ. މުޅި ރަށުގެ ރައްޔިތުން ގުޅިގެން ކުރި މަސައްކަތުން އެ ހާލަތުން އަރައި ގަނެވުނީ. އެ ހުރިހާ ކަމެއްގެ ތެރެއިން މި ކަހަލަ ބޮޑު މުބާރާތެއް މާފުށީގައި ހޯސްޓް ކުރުމަކީ ވަރަށް ބޮޑު ހިތްހަމަޖެހުމެއް."
އޭޝިއާގެ 24 ގައުމަކުން އެތުލީތުން ވާދަކުރާ މުބާރާތް ސޮލާ ދެކެވަޑައިގަތީ ހަމައެކަނި މާފުއްޓަށް ލިބޭ ފުރުސަތެއްގެ ގޮތުގައެއް ވެސް ނޫނެވެ. މުޅި ރާއްޖެ އަށް ހުޅުވޭ ފުރުސަތެއްގެ ގޮތުގައި އޭނާ ދެކެވޑައިގަންނަވަ އެވެ.
އެކަމަކު ސޮލާ ދެކެވަޑައިގަންނަވާ ގޮތުގައި މި މުބާރަތަށް ހުރިހާ ގޮތަކުން ވެސް މާފުށި ހާއްސަ އެވެ. ރާއްޖޭގެ މީހުން ދިރިއުޅޭ ރަށްތަކުގެ ތެރެއިން ޓޫރިސްޓް އެނދު އެންމެ ގިނަ ރަށަކީ މާފުއްޓެވެ. މި ރަށުގައި މިހާރު ޓޫރިޒަމަށް ހާއްސަކޮށް 800 ކޮޓަރި އަދި 1،600 އެއްހާ އެނދު ހުންނާނެ ކަމަށް ސޮލާ ވިދާޅުވި އެވެ.
"މި މުބާރާތުގެ ސަބަބުން އަނެއްކާ ވެސް އިތުރު ބަޔަކަށް މާފުށި އިޝްތިހާރު ވަނީ. ރޭގައި މިނިސްޓަރު [އަހްމަދު މަހްލޫފް] ވެސް ވިދާޅުވިހެން މުބާރާތުގެ ކޮންމެ ބައިވެރިޔަކު އެންމެ ފޮޓޯއެއް ސޯޝަލް މީޑިއާގައި ހިއްސާ ކޮށްލިޔަސް އެތައް ބައިވަރު ބަޔަކަށް އަނެއްކާ ވެސް މާފުއްޓާއި ރާއްޖެ އިޝްތިހާރު ވެގެން އެ ދަނީ،" އޭނާ ވިދާޅުވި އެވެ.
ބީބީއޭމުން ވެސް ބުނެފައި ވަނީ ރާއްޖޭގައި ބާއްވާ ކުޅިވަރުގެ އިވެންޓަކާ ގުޅިގެން އެންމެ ބޮޑަށް ރާއްޖެ އިޝްތިހާރު ވާނެ އިވެންޓަކީ މި މުބާރާތް ކަމަށެވެ.
އެސޯސިއޭޝަންގެ ރައީސް އިބްރާހިމް ވިދާޅުވީ ރާއްޖޭގެ ޓޫރިޒަމަށް 50 އަހަރު ފުރުމުގެ މުބާސަބަތާ ދިމާކޮށް މުބާރާތް ރާއްޖޭގައި ބޭއްވުމަކީ ވެސް ލިބުނު ހާއްސަ ކަމެކެވެ.
މާފުށީގެ އަތިރިމަތީގައި ހަދައިފައިވާ ސްޓޭޖަކީ، ދިގު ތާރީހެއް އޮތް އޭޝިއާގެ ބޮޑީ ބިލްޑިން މުބާރާތުގައި ވެސް ހެދި އެންމެ ހާއްސަ ސްޓޭޖް ކަމަށް އޭބީބީއެފުން ބުނެ އެވެ.
މުބާރާތް ހުޅުވުމަށް ރޭ ބޭއްވި ރަސްމިއްޔާތު މޮޑަރޭޓް ކުރި އޭބީބީއެފްގެ އޮފިޝަލް ވެސް ބުނީ މުބާރާތުގެ ސްޓޭޖު، އޯޕަން އޭރިއާއެއްގައި ހެދި ފުރަތަމަ މުބާރަތަކީ މިއީ ކަމަށެވެ.
އޭބީބީއެފްގެ ރައީސް ދާތުކް ޕޯލް ޗުއާ "މިހާރު" އަށް ވިދާޅުވީ އޭނާގެ 50 އަހަރުވީ ކެރިއާގައި އޭޝިއާގެ ބޮޑީ ބިލްޑިން މުބާރާތުގައި މި ވަރުގެ ފުރިހަމަ ސްޓޭޖެއް ކުރީގެ އެއްވެސް މުބާރަތަކުން ނުފެންނަ ކަމަށެވެ.
"މުބާރާތަށް ހާއްސަކޮށް ހަދައިފައިވާ ސްޓޭޖާއި ލައިޓިން އަކީ އަހަރެންގެ ކެރިއަރުގައި މި ހޭދަކުރި 50 އަހަރުގެ ތެރޭގައި އޭޝިއާގެ މުބާރާތަކުން ފެންނާނެ އެންމެ ފުރިހަމަ އެއް ކަންތައް،" ކުރިން ބޮޑީ ބިލްޑިން އެތުލީޓެއްގެ ގޮތުގައި ކާމިޔާބު ހޯދައިފައިވާ ޕޯޗް ޗުއާ ވިދާޅުވި އެވެ.
މުބާރާތުގައި އެތުލީޓުންގެ އިވެންޓްތައް މިއަދު ފަށާނެ އެވެ. އަންނަ ބުރާސްފަތި ދުވަހުގެ ނިޔަލަށް މުބާރާތް ކުރިއަށް ދާނެ އެވެ. ރާއްޖޭގެ އެތުލީޓުން ބައިވެރިވާ އިވެންޓްތައް ވެސް މިއަދު އޮންނާނެ އެވެ. މުބާރާތުގެ އަންހެން އިވެންޓްތައް ކުރިއަށް ގެންދާނީ ކްރޮސް ރޯޑްގަ އެވެ.
