ރާއްޖޭގައި ބާއްވާ އޭޝިއާގެ ބޮޑީ ބިލްޑިން އަދި ފިޒިކް ސްޕޯޓްސް ޗެމްޕިއަންޝިޕް، ރައީސް އިބްރާހިމް މުހައްމަދު ސޯލިހް ރަސްމީކޮށް މިރޭ އިފްތިތާހު ކޮށްދެއްވައިފި އެވެ.
މުބާރާތުގެ މައި އިވެންޓްތައް ބާއްވާ ކ. މާފުށީގެ ބީޗް ސަރަހައްދުގައި ބޭއްވި ހަފުލާއެއްގައި، ރާއްޖޭގެ ބޮޑީ ބިލްޑިން އިތުރަށް ތަރައްގީ ކުރުމަށް ސަރުކާރުން ކޮށްފައިވާ މަސައްކަތް އަގުވަޒަން ކުރުމުގެ ގޮތުން އޭޝިއަން ބޮޑީ ބިލްޑިން ފެޑެރޭޝަން (އޭބީބީއެފް) އިން ރައީސަށް އެވޯޑެއް އެރުވި އެވެ. އެ އެވޯޑް އެ މަނިކުފާނަށް އެރުވީ އޭޝިއަން ބޮޑީ ބިލްޑިން ފެޑެރޭޝަން ރައީސް ދާތުކް ޕޯލް ޗުއާ އެވެ.
ސްޕޯޓްސް މިނިސްޓަރު އަހުމަދު މަހްލޫފަށް ވެސް އަގުވަޒަން ކުރުމުގެ ގޮތުން އޭބީބީއެފުން އެވޯޑެއް ދިނެވެ.
މުބާރާތުގެ އޮގަނައިޒިން ކޮމިޓީގެ ޗެއާމަންގެ ދައުރު ވެސް އަދާކުރައްވާ މަހުލޫފް މިރޭ ވިދާޅުވީ، ކުޅިވަރުތަކުގެ މަގުބޫލު ކަމާއި ކުޑަބޮޑުމިނަށް ނުބަލައި ހުރިހާ ކުޅިވަރެއްގެ މެދުގައި ހަމަހަމަކަން ގާއިމު ކުރުމަށް ސަރުކާރުން މަސައްކަތް ކޮށްފައި ވާނެ ކަމަށެވެ. އަދި އެކި ކުޅިވަރުތަކުން ބައިނަލްއަގްވާމީ މުބާރާތްތައް މި އަހަރު ވެސް ރާއްޖޭގައި ބާއްވާނެ ކަމަށް އޭނާ ވިދާޅުވި އެވެ.
ރާއްޖޭގެ ގައުމީ ބޮޑީ ބިލްޑިން ޓީމުގެ ތަމްރީނުތަކަށް ހާއްސަކޮށް ހަދާ ފުރަތަމަ ގައުމީ ޖިމް ފެސިލިޓީގެ މަސައްކަތް ވެސް ކުރިއަށް ގެންދާ ކަމަށް މިނިސްޓަރު ވިދާޅުވި އެވެ. އަދި ވިދާޅުވީ އަށް ރަށެެއްގައި އިންޑޯ ޖިމް ފެސިލިޓީ މި އަހަރު ގާއިމު ކުރައްވާނެ ކަމަށާއި އަންނަ އަހަރު ވެސް އިތުރު ރަށްރަށުގައި އިންޑޯ ޖިމް ފެސިލިޓީ ގާއިމު ކުރުމުގެ މަސައްކަތް ކުރިއަށް ގެންދާނެ ކަމަށެވެ.
އޭބީއެފްގެ ރައީސް ޕޯލް ޗުއާ ވިދާޅުވިގޮތުގައި ކޮވިޑްގެ ބަލިމަޑު ކަމާ ހެދި މިދިޔަ ދެ އަހަރު މުބާރާތް ނުބޭއްވި ދިއުމަށް ފަހު، މި އަހަރު މުބާރާތް ބޭއްވޭ ގޮތް ވުމަކީ ދިވެހި ސަރުކާރާށާއި ބޮޑީ ބިލްޑިން އެސޯސިއޭޝަނަށް އޭބީއެފުން ޝުކުރު އަދާކުރާ ކަމެކެވެ.
މުބާރާތުގައި އޭޝިއާގެ 26 ގައުމަކުން ވާދަކުރެ އެވެ. މުބާރާތުގައި އެތުލީޓުންގެ ރަސްމީ އިވެންޓްތައް ފަށާނީ މާދާމާ ހަވީރު އެވެ. ރާއްޖޭގެ އެތުލީޓުން ތަމްސީލު ކުރާ އިވެންޓްތައް ވެސް މާދަމާ އޮންނާނެ އެވެ. މުބާރާތުގައި ރާއްޖެއިން 20 އެތުލީޓުން ވާދަކުރެ އެވެ.