އެހެން ޕާޓީތަކުގެ އެތެރޭގެ އިންތިހާބުތަކުގައި ބައިވެރިވުމަށް މޯލްޑިވްސް ރިފޯމް މޫވްމަންޓް (އެމްއާރުއެމް) އިން ވަކިނުވުމަށް އެ ޕާޓީން މިރޭ އެދިއްޖެ އެވެ.
ކުރީގެ ރައީސް މައުމޫން އަބްދުލްގައްޔޫމްގެ ޕާޓީން ނެރުނު ބަޔާނެއްގައި ބުނީ އެހެން ޕާޓީތަކުގެ އެތެރޭގެ އިންތިހާބުތަކުގައި ބައިވެރިވުމުގެ ބޭނުމުގައި އެމްއާރުއެމުން މެމްބަރުން ވަކިވަމުންދާކަން ފާހަގަކުރެވޭ ކަމަށެވެ.
ނަމަވެސް އެހެން ޕާޓީއެއްގެ އެތެރޭގެ އިންތިހާބުގައި ބައިވެރިވުމަށް ވަގުތީ ގޮތުން ޕާޓީން ވަކިވުމަކީ ގަބޫލުކުރާ އުސޫލަކަށް ނުވާތީ، އެމްއާރުއެމްގެ މެމްބަރުން ޕާޓީން ވަކިނުވުމަށް އެދުނެވެ.
އެމްއާރުއެމަށް އިތުރު މެމްބަރުން ގުޅުމަކީ އަބަދު ވެސް މަރުހަބާ ކިޔާނެ ކަމެއް ކަމަށް ބަޔާނުގައި ބުންޏެވެ.
ޕާޓީތަކުގެ އެތެރޭގެ އިންތިހާބުތަކުގައި ބައިވެރިވުމަށް އެއް ޕާޓީން އަނެއް ޕާޓީއަށް ބަދަލުވުމަކީ އަބަދުވެސް ހިނގާ ކަމެކެވެ. އޭގެ ތެރޭގައި އެ މެމްބަރުންނަށް ނޭނގި ޕާޓީތަކަށް ވެއްދުން ވެސް ހިމެނެ އެވެ. އެ މައްސަލައިގައި ބައެއް ޕާޓީތަކުން މީގެ ކުރިން ވެސް ޝަކުވާ ކޮށްފައިވެ އެވެ.
އެތެރޭގެ އިންތިހާބު އެންމެ އަވަހަށް މޯލްޑިވްސް ނެޝަނަލް ޕާޓީ (އެމްއެންޕީ) އާއި ޖުމްހޫރީ ޕާޓީގެ އެވެ. އެމްއެންޕީގެ ކޮންގްރެސް އޮންނާނީ ކުރިއަށް އޮތް ހަފުތާ ބަންދުގަ އެވެ. ޖުމްހޫރީ ޕާޓީގެ ކޮންގްރެސް ތާވަލު ކޮށްފައި ވަނީ އަންނަ ޑިސެމްބަރު މަހަށެވެ.
ނޮވެމްބަރު 20، 2019 ގައި އުފެއްދި އެމްއާރުއެމްގައި މި ވަގުތު ތިބީ 3،155 މެމްބަރުންނެވެ.
