ރިޔާސީ އިންތިހާބުގައި ޖޭޕީން ވަކިން ވާދަކުރަން ނިންމައިފި

ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީގެ ކެންޑިޑޭޓަކު ނެރެ، އެ ޕާޓީން އިސްވެ އޮވެ ޕާޓީތަކާ އެކު ކޯލިޝަނަކުން ވާދަކުރަން ކައުންސިލްގެ އިއްތިފާގުން ދެންމެ ފާސްކޮށްފި އެވެ.

ޖުމްހޫރީ ޕާޓީގެ ރިޔާސީ ކެންޑިޑޭޓަކީ ޕާޓީގެ ލީޑަރު، މާމިގިލީ ދާއިރާގެ މެމްބަރު ގާސިމް އިބްރާހިމް އެވެ.

ކައުންސިލްގެ އިއްތިފާގުން ފާސްކުރީ ރިޔާސީ އިންތިހާބުގައި ގާސިމް ވަކިން ވާދަކުރެއްވުމަށާއި ކޯލިޝަން ހަދަން ބޭނުންވާ ޕާޓީތަކާ އެކު އިންތިހާބު ކާމިޔާބުކުރުމަށެވެ.

ގާސިމް ވެސް ބައިވެރިވެވަޑައިގަތް ކައުންސިލް ބައްދަލުވުމުގައި މިގޮތަށް ނިންމި އިރު ސަރުކާރު ކޯލިޝަންގައި މިވަގުތު އޮތް ޖުމްހޫރީ ޕާޓީއަށް އެމްޑީޕީން ވަނީ ރިޔާސީ އިންތިހާބުގައި އަނެއްކާވެސް އިއްތިހާދުވެ ކުރިއަށް ދިއުމަށް ދައުވަތު ދީފަ އެވެ. އެ ދައުވަތު ދީފައި ވަނިކޮށް ޖުމްހޫރީ ޕާޓީން ހުށަހެޅި ގަރާރުތަކުގައި އެ ޕާޓީން އިންތިހާބުގެ ފުރަތަމަ ބުރުގައި ވާދަކުރަން ހުށަހަޅާފައި ވިޔަސް މިހާތަނަށް ގާސިމް ގޮތެއް ނުނިންމަވާތީ ޖޭޕީގެ ނިންމުން އޮތީ ކަށަވަރު ނުވެ އެވެ.

ކައުންސިލްގެ މިއަދުގެ ނިންމުމާ އެކު ޖުމްހޫރީ ޕާޓީގެ ފަހަތަށް އަރައި އިންތިހާބަށް ކޯލިޝަން ހަދަން ބޭނުންވާ ޕާޓީތަކަށް އެ ފުރުސަތު އޮތީ ހުޅުވާލައިފަ އެވެ.

ގާސިމް މި ފަހުން ގެންދެވީ މިި ސަރުކާރު ހިންގަން އެކުލަވާލި ކޯލިޝަން އެއްބަސްވުމާ އެއްގޮތަށް ކަންކަން ނުހިނގާ ކަމުގެ ހިތްހަމަނުޖެހުންތަކާ އެކު އިންތިހާބުގެ ފުރަތަމަ ބުރުގައި ކޯލިޝަން ހެދުމާ ދުރު ވިސްނުމެއް ނެރުއްވަމުންނެވެ.

ޖުމްހޫރީ ޕާޓީގެ ކެމްޕޭން "ތައްޔާރު" ޖަލްސާގައި ގާސިމް ވިދާޅުވެފައި ވަނީ އަބަދު "ދަލު ބޭރުގައި" ތިބޭ ވަރަށް ވުރެން އެ ޕާޓީގެ ސައިޒާއި މަގްބޫލުކަން ވެސް މާ ބޮޑު ކަމަށެވެ. ރައްޔިތުންނަށް އެ ޕާޓީން ބޭނުންވާ ގޮތަށް ހިދުމަތް ކޮށްދެވެން އޮތީ ޖޭޕީގެ ވެރިކަމެއްގައި ކަމަށް ވިދާޅުވެފައިވެ އެވެ.

ގާސިމް ވިދާޅުވެފައިވާ ގޮތުގައި އެ ޕާޓީގެ ބައިވެރިވުން ނެތި މިހާތަނަށް އެއްވެސް ބަޔަކަށް ވެރިކަމަކަށް ނާދެވެ އެވެ. އެމްޑީޕީން 2008 ގައި ވެރިކަމަށް އަދި 2013 ގައި ޕީޕީއެމާއި 2018 ގައި މި ވެރިކަން އުފެދުނީ ވެސް ޖުމްހޫރީ ޕާޓީއާ އެކު ކޯލިޝަން ހަދައިގެންނެވެ.

އާ ގާނޫނުއަސާސީއަށް ފަހު މިހާތަނަށް ބޭއްވި ހުރިހާ ރިޔާސީ އިންތިހާބެއްގައި ވެސް ޖޭޕީ ރިޔާސީ ކެންޑިޑޭޓެއްގެ ގޮތުގައި ގާސިމް ނުކުންނަވަ އެވެ. އެންމެ ފަހުން 2018 ގައި ބޭއްވި ރިޔާސީ އިންތިހާބުގައި ވެސް ޖޭޕީގެ ކެންޑިޑޭޓަކަށް ގާސިމް ހަމަޖައްސާފައި ވަނިކޮށް އޭރުގެ ސިޔާސީ މަސްރަހު އޮތް ގޮތުން ޕާޓީތައް އިއްތިހާދުވެ ފުރަތަމަ ބުރުން ވަނީ ރައީސް އިބްރާހިމް މުހައްމަދު ސޯލިހް ވެރިކަމަށް އިންތިހާބުކޮށްފަ އެވެ.

އެ ނޫން އިންތިހާބުތަކުގައި ޖޭޕީއަކީ ތިން ވަނަ އަށް އެންމެ ގިނަ ވޯޓު ލިބޭ ޕާޓީ އެވެ. އެންމެ ގިނަ ވޯޓު ހޯދަނީ އެމްޑީޕީ އާއި ޕީޕީއެމުން ނެރޭ ކެންޑިޑޭޓުންނެވެ.

ޖޭޕީން މި ފަހަރު އިންތިހާބުގައި އެކަނި ވާދަކުރަން ޖެހޭ ސަބަބެއް ކަމަށް އެ ޕާޓީގެ ކައުންސިލް މެމްބަރުން ހިސާބު ޖަހަމުން ދިޔައީ، އެމްޑީޕީ އެކުގައި ނުނިކުމެވޭ ވަރަށް ދެބައިވެފައި އޮތުމާއި ޕީޕީއެމްގެ ރިޔާސީ ކެންޑިޑޭޓް ކުރީގެ ރައީސް އަބްދުﷲ ޔާމީންގެ ޖަލު ހުކުމާ ހެދި ޖުމްހޫރީ ޕާޓީއަށް ކުރިއަށް ވުރެން ފުރުސަތު ބޮޑު ކަމަށް ފެންނާތީ އެވެ.