ވަފާތެރިކަމާ އެކު ދެމިހުންނާނީ ކުރީގެ ރައީސް އަބްދުﷲ ޔާމީނާ އެކުގައި ކަމަށާއި އެ މަނިކުފާނަށް ބޭވަފާތެރިވުމުގެ ވިސްނުމެއް އެއްއިރަކު ވެސް ނުގެންގުޅުއްވާ ކަމަށް ވިދާޅުވެ، މާލޭގެ މޭޔަރު އަދި ޕީޕީއެމްގެ ނައިބު ރައީސް ޑރ. މުހައްމަދު މުއިއްޒު އޭނާ އަށް ކުރެވޭ ތުހުމަތުތައް މިރޭ ދޮގުކުރައްވައިފި އެވެ.
މިއަދު މެންދުރު ފަހު މުއިއްޒު ބާއްވަން އުޅުއްވި ޕްރެސް ކޮންފަރެންސް ކުއްލި ގޮތަކަށް ކެންސަލް ކުރެއްވުމަށް ފަހު، ޗެނަލް 13 މެދުވެރިކޮށް ދެއްވި މެސެޖެއްގައި ވިދާޅުވީ، އޭނާގެ މައްޗަށް އެކި ކަހަލަ ތުހުމަތުތައް ކުރަމުންދާ ކަމަށެވެ. އެ ތުހުމަތުތަކަށް މިހާތަނަށް އެއްވެސް ވަރަކަށް ސަމާލުކަން ނުދެއްވާ ކަމަށް ވެސް އޭނާ ވިދާޅުވި އެވެ.
މި ފަހުން އަޑު ފެތުރިފައިވާ ގޮތުގައި، މުއިއްޒު އުޅުއްވަނީ ޕީޕީއެމްގެ ތާއީދު ހޯދައި ރިޔާސީ އިންތިހާބުގައި ވާދަކުރައްވާށެވެ. އެކަމަކު، އެކަމުގައި ޕާޓީގެ ތެރޭގައި ހިޔާލު ތަފާތުވުންތައް އުފެދިފައިވެ އެވެ. އަދި މުއިއްޒަށް ކެމްޕެއިން ކުރާ ކަމުގެ ތުހުމަތު ވެސް ޕާޓީގެ ބައެއް މެމްބަރުންނަށް ކުރި އެވެ.
މުއިއްޒު ވިދާޅުވީ އެ ތުހުމަތުތަކަށް ޖަވާބު ދެއްވަން އޭނާ ކުރިން ނޫޅުއްވާ ކަމަށެވެ.
އެހެން ނަމަވެސް މާ ގިނަ ދުވަހު މި ވާހަކަ މިގޮތަށް، އަޅުގަނޑު އެއްވެސް ވަރަކަށް ނުދައްކާ ހުރުމުން ޕާޓީގެ ބައެއް މެމްބަރުންގެ ތެރޭގައި، ހިތްނުތަނަވަސްކަން އުފެދޭކަން ގަބޫލުކުރެވޭ. އެހެންވެ އަޅުގަނޑު ގަބޫލުކުރަނީ ކޮންމެވެސް ހިސާބަކުން މި ވާހަކަތައް ދައްކަން ޖެހޭ: މުއިއްޒު
"އެހެން ނަމަވެސް މާ ގިނަ ދުވަހު މި ވާހަކަ މިގޮތަށް، އަޅުގަނޑު އެއްވެސް ވަރަކަށް ނުދައްކައި ހުރުމުން ޕާޓީގެ ބައެއް މެމްބަރުންގެ ތެރޭގައި، ހިތްނުތަނަވަސްކަން އުފެދޭކަން ގަބޫލުކުރެވޭ. އެހެންވެ އަޅުގަނޑު ގަބޫލުކުރަނީ ކޮންމެވެސް ހިސާބަކުން މި ވާހަކަތައް ދައްކަން ޖެހޭ،" މުއިއްޒު ވިދާޅުވި އެވެ.
މުއިއްޒު ވިދާޅުވި ގޮތުގައި، މިއަދު ރާއްޖެ މިއޮތް ހާލަތުން އަރައިގަތުމަށް ބޭނުންވަނީ، ޕީޕީއެމްގެ ރިޔާސީ ޓިކެޓް އަރުއްވާފައިވާ ޔާމީންގެ ލީޑާޝިޕެވެ. އެހެންވެ، މިހާރު ޖަލު ހުކުމެއްގައި ހުންނެވި ޔާމީން މިނިވަންކުރުމަށް އެކި ގޮތްގޮތުން މުއިއްޒު ވެސް އަންނަނީ މަސައްކަތްކުރައްވަމުންނެވެ. އަދި އެކަމުގައި ދެމިހުންނަވާނެ އެވެ.
"އެމަނިކުފާނަށް އަޅުގަނޑުމެންގެ ހިތުގެ އަޑިން، ހަމަ އެންމެން ބޭނުންވެގެން އިއްތިފާގުން ހަވާލުކޮށްފައިވާ ޒިންމާ، އެއީ ރިޔާސީ އިންތިހާބުގެ ޓިކެޓް، ރިޔާސީ އިންތިހާބުގައި އަޅުގަނޑުމެންގެ ފަރާތުން ވާދަކުރުމުގެ ޒިންމާ، އެ ޒިންމާ އަދާކުރުމަށް އެމަނިކުފާނަށް އަޅުގަނޑުމެން ދޭންޖެހޭ ހުރިހާ ސަޕޯޓެއް ދިނުމުގައި،" މުއިއްޒު ވިދާޅުވި އެވެ
"އަޅުގަނޑުމެން އެމަނިކުފާނަށް ހަވާލުކޮށްފައިވާ މި ބޮޑު ޒިންމާ [ރިޔާސީ ޓިކެޓް]ގެ ސަބަބުން އަދިވެސް ޖަލުގައި އެ ހުންނަވަނީ."
މި ވަގުތު ގައުމަށާއި ޕާޓީއަށް ވެސް އެންމެ ފައިދާ ހުރި ގޮތަކީ ޔާމީނަށް އަރުއްވާފައިވާ ރިޔާސީ ޓިކެޓަށް ޗެލެންޖު ނުކުރެއްވުން ކަމަށް މުއިއްޒު ވިދާޅުވި އެވެ.
ވިދާޅުވީ، ޕާޓީގެ އަޒުމަކަށް ހަދަންވީ ޔާމީން މިނިވަންކުރުމަށް ކުރާ މަސައްކަތް އިތުރަށް ފުޅާކޮށް، ރިޔާސީ އިންތިހާބުގައި އެ މަނިކުފާނަށް ވާދަކުރެވޭނެ ފުރުސަތު ހޯދައިދިނުމަށް ކަމަށެވެ. ޔާމީން ޖަލަށް ލާފައި ވަނީ މި ސަރުކާރުގެ ރޭވުމެއްގެ ތެރެއިން ވާދަކުރެވޭނެ ފުރުސަތު ނުދިނުމަށް ކަމަށާއި އެ މަނިކުފާނާށް އަނިޔާކުރުން ހުއްޓާލައި ޖަލުން މިނިވަންކުރަން ގޮވާލާ ކަމަށް ވެސް މުއިއްޒު ވިދާޅުވި އެވެ.
ވ. އާރަށުގެ މައްސަލާގައި މަނީ ލޯންޑަރިންނާއި ރިޝްވަތު ހިފުމުގެ ކުށް ސާބިތުވެ، ޔާމީން ދަނީ 13 އަހަރުގެ ޖަލު ހުކުމެއް ތަންފީޒުކުރަމުންނެވެ. އެ މައްސަލައިގެ އިސްތިއުނާފުގެ އަޑުއެހުންތައް ފެށިޔަސް، ޝަރީއަތުގެ މުއްދަތު ދިގުލައިގެން ދާތީ ރިޔާސީ އިންތިހާބަށް ކުރިމަތިލެވޭ މުއްދަތުގެ ކުރިން ޔާމީން މިނިވަންވާނެ ކަމާ މެދު ވަނީ ސުވާލު އުފެދިފަ އެވެ.
ރިޔާސީ އިންތިހާބަށް ކުރިމަތިލުމުގެ މުއްދަތު އަންނަ މަހުގެ ހަތަރަކަށް ހަމަވާއިރު، ޕީޕީއެމުން ވަނީ ކަރެންޝަންސް މެދުވެރިކޮށް ކެންޑިޑެސީ ފޯމަށް ޔާމީންގެ ސޮއި ހޯދައިފަ އެވެ.