ސޯލް، ދެކުނު ކޮރެއާ (ޖުލައި 30) - ބޮޑު ހަރަދުކޮށް ފުޓްބޯޅައިގެ މަގުބޫލުކަން ހޯދަމުން އަންނަ ސައުދީ ޕްރޯ ލީގުން ޓްރާންސްފާ މާކެޓްގެ މަންޒަރު ބަދަލުކޮށްލައިފި ކަމަށާއި، އެއީ ޔޫރަޕްގެ ބޮޑެތި ކްލަބްތަކުން ސަމާލުވާންޖެހޭ ކަމެއްކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
މިދިޔަ ޑިސެމްބަރު މަހު ކްރިސްޓިއާނޯ ރޮނާލްޑޯ، އަލް ނަސްރަށް ބަދަލުވި ޓްރާންސްފާ އަށް ފަހު އެ ލީގަށް މަޝްހޫރު އެތައް ކުޅުންތެރިންނެއް މިފަހަރުގެ ޓްރާންސްފާ ބާޒާރުގައި ވަނީ ބަދަލުވެފަ އެވެ. އޭގެތެރެއިން އެއް ކުޅުންތެރިއަކީ ގާޑިއޯލާގެ ކޯޗުކޮށްދޭ ސިޓީގައި ހުރީ އަލްޖީރިއާގެ ވިންގާ، ރިޔާދު މާރޭޒް އެވެ.
"ސައުދީ ލީގުން ޓްރާންސްފާ މާކެޓް ބަދަލުކޮށްލައިފި. މީގެ ހަ މަސް ކުރިން ރޮނާލްޑޯ އެ ލީގަށް ދިޔައިރު އެއްވެސް މީހަކު ހިއެއް ނުކުރޭ މަތީ ފެންވަރުގެ ގިނަ ކުޅުންތެރިންތަކެއް އެ ލީގާ ގުޅޭނެކަމަށް،" ސައުދީ ލީގާ ގުޅޭގޮތުން ގާޑިއޯލާ ބުންޏެވެ.
"ކުރިއަށް އޮތް ތަނުގައި މަޝްހޫރު ކުޅުންތެރިން ސައުދީ ލީގަށް ދާނެ. އެކަން ހިނގާގޮތާ މެދު ކްލަބްތަކުން ސަމާލުވާންޖެހޭނެ."
ގާޑިއޯލާ ބުނީ އެޓީމުން އަލް އަހްލީ އަށް މާރޭޒް ވިއްކާލީ، ދެކޮޅު ނުހެދޭ ވަރުގެ ހުށަހެޅުމެއް ލިބުމުން ކަމަށެވެ. މާރޭޒް އަހްލީ އަށް ބަދަލުވީ 40 މިލިއަން ޑޮލަރަށެވެ.
ސައުދީ ލީގަށް ދެން އެންމެ އަވަހަށް ބަދަލުވާނީ ބެޔާން މިއުނިކްގައި ހުރި ސެނެގޯލްގެ ކެޕްޓަން ސަޑިއޯ މާނޭ އެވެ. މާނޭ ބަދަލުވާނީ ރޮނާލްޑޯ ކުޅެމުން އަންނަ އަލް ނަސްރަށެވެ. މީގެކުރިން ކަރީމް ބެންޒެމާ ވެސް ވަނީ ސައުދީ ލީގުގެ ޗެމްޕިއަން އަލް އިއްތިހާދަށް ބަދަލުވެފަ އެވެ.
ޕްރިމިއާ ލީގުގެ ޗީފް އެގްޒެކެޓިވް ރިޗާޑް މާސްޓާސް މިދިޔަ ހަފްތާ ބުނީ ސައުދީ އިން ފުޓްބޯޅައިގައި ނުފޫޒު ގަދަވިޔަސް ޕްރިމިއާ ލީގުން ކަންބޮޑު ނުވާނެ ކަމަށެވެ.
"ސައުދީ ލީގުން އެ ހަރަދު ކުރުމަކީ ބިރެއް ނޫން. އެއީ މިއަދު ފެންނަން އޮތް ހަގީގަތް. އެމީހުން ބޭނުންވީ ވަރުގަދަ ލީގެއް ހަދަން. އެކަން ކުރެވެން އޮތީ ސައުދީ އަށް،" ގާޑިއޯލާ ބުންޏެވެ.
ގާޑިއޯލާ ބުނީ ސައުދީ އިން ކުރަމުން އަންނަ ހަރަދު އެގޮތުގައި ދެމެހެއްޓޭނީ ކިހާ މުއްދަތެއްގައި ކަމަށް ބުނަން ނޭނގޭ ކަމަށާއި، އެކަމަކު އޭނާ ގަބޫލުކުރާ ގޮތުގައި އެ ގައުމުން ލީގު ފެންވަރު ދަމަހައްޓާނެ ކަމަށެވެ.
