ޕީޕީއެމް/ޕީއެންސީގެ ލީޑަރު އަދި ކުރީގެ ރައީސް އަބްދުﷲ ޔާމީން ރިޔާސީ އިންތިޚާބު ބޮއިކޮޓު ކުރަން އެދިވަޑައިގެންފައިވަނިކޮށް، އެހެން ކެންޑިޑޭޓަކު ނެރުމާ މެދު ކޯޅުން ބޮޑުވެ، ދެ ޕާޓީގެ ރަސްމީ ތައްގަނޑު ފޮރުވާފައިވާ ކަން އެނގިއްޖެ އެވެ.
ޔާމީންގެ ކެންޑިޑެސީ ބަލައިނުގަންނަން އިލެކްޝަންސް ކޮމިޝަން (އީސީ) އިން ނިންމީ ރަނގަޅަށް ކަމަށް ސުޕްރީމް ކޯޓުން މިއަދު ނިންމުމާ އެކު، އެމަނިކުފާނު ވަނީ ޕީޕީއެމް/ޕީއެންސީން އިންތިޚާބު ބޮއިކޮޓު ކުރުމަށް އެދިވަޑައިގަންނަވާފަ އެވެ.
ޔާމީންގެ އެދިވަޑައިގެންނެވުމާ މެދު މަޝްވަރާ ކުރުމަށްފަހު، އެ ދެ ޕާޓީގެ ޖޮއިންޓު ސެނެޓުގެ އަގުލަބިއްޔަތުން ވަނީ އިންތިޚާބުގައި ވާދަކުރަން ނިންމައިފަ އެވެ.
އެކަމަކު ޔާމީން ވަނީ އެ ނިންމުން ގަބޫލު ނުކުރައްވާ ކަމަށް އަންގަވައިފަ އެވެ. އެއާ އެކު ޕީޕީއެމް/ޕީއެންސީގެ ލީޑަޝިޕުން ވަނީ އިތުރު ބައްދަލުވުމެއް ބާއްވައި، އެކަމާ އިތުރަށް މަޝްވަރާކޮށްފަ އެވެ.
އެނގިފައިވާ ގޮތުގައި، އެ ބައްދަލުވުމުގައި ވެސް އަގުލަބިއްޔަތުން ނިމުނީ އިންތިޚާބު ބޮއިކޮޓު ނުކުރާ ގޮތަށެވެ.
އެކަމާ ލީޑަޝިޕުގެ ތެރޭގައި ކޯޅުން ބޮޑުވެ، ޔާމީންގެ ބަދަލުގައި އެހެން ކެންޑިޑޭޓަކު ނެރުމަށް ހުރަސް އެޅުމުގެ ގޮތުން، ލީޑަޝިޕުގެ ބައެއް ބޭފުޅުން ވަނީ ދެ ޕާޓީގެ ރަސްމީ ތައްގަނޑު ފޮރުވައިފަ އެވެ.
އެކަމަކު ތައްގަނޑު ފޮރުވުމުގެ ކުރިން ޔާމީންގެ ބަދަލުގައި ޕީއެންސީގެ ފަރާތުން ރިޔާސީ ރޭހަށް ނެރެން ކުރިން ނިންމާފައިވާ މާލޭގެ މޭޔަރު ޑރ. މުހައްމަދު މުއިއްޒުގެ ކެންޑިޑެސީ ފޯމުގައި ތައްގަނޑު ޖަހާފައިވާ ކަން އެނގިފައި ވެ އެވެ.
އަދި މާދަމާ ފޯމު ހުށަހެޅުމުގެ ސުންގަނޑި ހަމަވުމުގެ ކުރިން، މުއިއްޒުގެ ފޯމު އީސީއަށް ވައްދާނެ ކަން ވެސް ވަނީ އެނގިފަ އެވެ.