އިދިކޮޅު ޕީޕިއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒުގެ ދެކަނބަލުންގެ ގޭގައި ގެންގުޅުއްވި މެއިޑް ދަންޖެހިގެން މަރުވުމުގައި މުއިއްޒަށް ކުރާ ތުހުމަތުތައް އަނބިކަނބަލުން ސާޖިދާ މުހައްމަދު ދޮގުކުރައްވައިފި އެވެ.
މުއިއްޒާއި ސާޖިދާ ދިރިއުޅުއްވި މ. ޗާންދަނީގޭގައި ގެންގުޅުއްވި ބިދޭސީ އަންހެން މީހާ ދަންޖެހި މަރުވި ހާދިސާ ހިނގާފައިވަނީ މުއިއްޒު ހައުސިން މިނިސްޓަރަކަށް ހުންނެވިއިރު، 2012 ވަނަ އަހަރުގެ ފަހުކޮޅު އެވެ.
މި އިންތިހާބުގެ ކެމްޕެއިނުގައި ވާދަވެރިން މެއިޑުގެ މަރާ ގުޅިގެން ދައްކާ ވާހަކަތައް ދޮގުކުރައްވައި ސާޖިދާ އިއްޔެ ވިދާޅުވީ، މުއިއްޒަކީ އެހެން އަންހެނަކަށް އިސްއުފުލާލައި ބަލައިލާ ބޭފުޅެއް ވެސް ނޫން ކަމަށާއި އެވަރުގެ މީހެއްގެ ބޮލުގައި އިދިކޮޅުން އެ އަޅުވަނީ ހަގީގަތެއް ނެތް ތުހުމަތެއް ކަމަށެވެ.
"މަރާލި ވާހަކަ އާއި ޒިނޭގެ ތުހުމަތު އަޅުވައި، މުޖުތަމައުގައި ވެސް ބަލާލަން ޖެހޭ. މީހެއްގެ އަބުރު ކަތިލުމުގައި ވެސް ހައްދެއް އޮވޭ. މި ލެވެލް އަށް ދިޔައީމާ މިއީ ދެން ވަރަށް ދެރަ ކަމެއް،" ދ. މީދޫގައި ބޭއްވި ޖަލްސާއެއްގައި ސާޖިދާ ވިދާޅުވި އެވެ.
ސާޖިދާ ވިދާޅުވީ، ބިދޭސީ އަންހެން މީހާ އެ ގޭގައި ދިރިއުޅެމުން ދިޔައީ އޭނާގެ ފިރިމީހާއާ ވެސް އެކުގައި ކަމަށާއި އެ ދުވަހު ކަން ހިނގި ގޮތް ފުލުހުންގެ ތަހުގީގު މިހާރު ބެލިޔަސް ފެންނާނެ ކަމަށެވެ.
"ހިތްދަތިވޭ އެކަހަލަ ވާހަކައެއް ދެކެވެމުންދާތީ މީހެއްގެ އަބުރު ކަތިލުމަށްޓަކައި،" ސާޖިދާ ވިދާޅުވި އެވެ.
ސާޖިދާ ވަނީ މުއިއްޒުގެ ދޮންމަންމައާ ގުޅޭ ގޮތުން ދެކެވެމުންދާ ވާހަކަތައް ވެސް ދޮގުކުރައްވައިފަ އެވެ. އޭނާ ވިދާޅުވީ، އާއިލީ ވާހަކަތަކެއް ކަމުން އެ ވާހަކަ ދައްކަން މުއިއްޒު ދެކޮޅު ހައްދަވާ ކަމަށާއި ނަމަވެސް ކަންކަން މިހާރު ގޮސްފައި އޮތް ހިސާބުން އެ ވާހަކަތައް ހިއްސާކުރަން އޭނާއަށް މަޖުބޫރު ވެފައިވާ ކަމަށެވެ.
އެ ވާހަކަތައް ކިޔައިދެެމުން ސާޖިދާ ވިދާޅުވީ، މުއިއްޒުގެ ބައްޕާފުޅުގެ މަރަށް ފަހު ކޯޓުން މައްސަލަ ނިންމިއިރު ދޮންމަންމަ އެދުނީ ލަންކާގައި ހުރި ހުރިހާ ގެދޮރަކާއި ބޭންކް އޮފް ސިލޯންގައި ހުރި ހުރިހާ ފައިސާއެއް ދިނުމަށް ކަމަށެވެ.
"ކެންޑީގައި ހުންނާނެ ގެސްޓު ހައުސްއެއް ބައްޕަގެ، ކޮލަމްބޯގައި ހުންނާނެ ގެސްޓުހައުސްއެއް. ދެން އަދި އޭގެ އިތުރުން ބައްޕަ ގަނޑުވަރެއްހެން ހަދާފައި ހުންނާނެ ގެއެއް. އަދި އޭގެ އިތުރުން އެކޮޅަށް ދިއުމަށްފަހު 8 ލައްކަ ހަރަދުކޮށްފައި ބައްޕަގެ ގޭގެ ޓެރަސްގައި އިތުރު ކޮޓަރިއެއް ހަދައިދިނީ މުއިއްޒު އަމިއްލަ ޖީބުން،" ސާޖިދާ ވިދާޅުވި އެވެ.