ސިޔާސަތުތައް ކަނޑައެޅުމާއި ގައުމީ ތަރައްގީގެ ކަންކަމުގައި މިންތީގެ ހަމަހަމަ ކަމަށް، ލިބެން ހުރި މައުލޫމާތުގެ ބޭނުން ހިފުމަކީ އިހްތިޔާރެއް ނޫން ކަމަށާއި ކޮންމެހެން ކުރަން ޖެހޭ ކަމެއް ކަމަށް ފަސްޓް ލޭޑީ ސާޖިދާ މުހައްމަދު މިއަދު ވިދާޅުވެއްޖެ އެވެ.
"ޖެންޑާ ޑާޓާ ޔޫސް އިން ޕޮލިސީ މޭކިން ވެލިޑޭޝަން އެންޑް އެޑްވޮކަސީ" ވޯކްޝޮޕް ފައްޓަވައި ދެއްވަމުން ފަސްޓް ލޭޑީ ވިދާޅުވީ އަންހެނުންގެ ބައިވެރިވުން މިހާރަށް ވުރެން އިތުރުކުރަން ޖެހޭ ކަމަށެވެ. ރައީސް ޑރ. މުހައްމަދު މުއިއްޒުގެ މި ސަރުކާރުގެ އެންމެ ބޮޑު އެއް އަމާޒަކީ ގައުމީ ތަރައްގީގެ ހުރިހާ ކަމެއްގައި ވެސް މިންތީގެ ހަމަހަމަކަން ނުވަތަ އަންހެނުންގެ ބައިވެރިވުން އިތުރުކުރު ކަމަށެވެ.
ސިޔާސަތުތަކާއި ގަވާއިދުތަކާއި ގާނޫނުތައް އެކުލަވައިލާއިރު ރައްޔިތުންގެ އުންމީދުތަކާ މެދު ވިސްނުމަށް ވެސް އެކަމަނާ ވަނީ ކަމާބެހޭ ފަރާތްތަކަށް ގޮވާލައްވައިފަ އެވެ.
އެ ވޯކްޝޮޕަކީ ނިންމުންތައް ނިންމުމުގައި ޖެންޑާ ޑާޓާ ބޭނުން ކުރެވޭ މިންވަރު ދެނެގަތުމަށް ކުރެވުނު ދިރާސާގެ ހޯދުންތަކުގެ ސައްހަކަން ޔަގީންކުރުމުގެ މަގުސަދުގައި ބާއްވާ ދެ ދުވަހުގެ ވޯކްޝޮޕެކެވެ. މި ވޯކްޝޮޕް ކުރިއަށް ގެންދަނީ މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އާއި ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން ޕެރިސް21އާ ގުޅިގެންނެވެ.
ފަސްޓް ލޭޑީ ވިދާޅުވި ގޮތުގައި މިންތީގެ ހަމަހަމަ ކަމުގެ އިތުރުން އަންހެނުން ކުރިއަރުވަން މި ސަރުކާރުން މަސައްކަތް ކުރާނެ އެވެ.
"އަންހެނުންގެ އިގްތިސާދީ ހިއްސާ އިތުރުކުރުމާއި، ސިޔާސީ އަދި އާންމު ދިރިއުޅުމުގައި ބައިވެރިވުން އިތުރުކުރުމަކީ މި ސަރުކާރުން އަހަންމިއްޔަތުކަން ދެއްވާނެ ދާއިރާތައް،" އެކަމަނާ ވިދާޅުވި އެވެ.
މީގެ އިތުރުން މިހާރު ލިބެން ހުރި ޑޭޓާތައް ފުޅާ ދާއިރާއެއްގައި ދިރާސާކުރެއްވުމުގެ މުހިންމުކަމަށް ވެސް އެކަމަނާ ވާހަކަ ދެއްކެވި އެވެ.
ސިޔާސަތުތައް ބައްޓަން ކުރުމަށް ރާއްޖޭގައި ހުރި ޑާޓާގެ މައްޗަށް ބިނާކޮށް ސިޔާސަތުތައް އެކުލަވާލުމަކީ ވެސް މުހިއްމު ކަމެއްގެ ގޮތުގައި އެކަމަނާ ފާހަގަކުރެއްވި އެވެ.