ކ. ފުށިދިއްގަރުފަޅު ހިއްކައިގެން އެތަނުގައި ރަސްމާލެ ގެ ނަމުގައި ސިޓީއެއް ތަރައްގީކުރަން މިދިޔަ އަންގާރަ ދުވަހު ފެށި ބިން ހިއްކުމުގެ މަޝްރޫއު އާ ގުޅޭ މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅައިފި އެވެ.
ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކުންފުންޏާ ހަވާލުކޮށްގެން ހިންގާ އެ މަޝްރޫއުގައި 1،153 ހެކްޓަރުގެ ބިން ހިއްކާނެ ކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފަ އެވެ.
އެކަމަކު އެ މަޝްރޫއުގެ މާ ގިނަ ތަފްސީލެއް ސަރުކާރުން ހާމަކޮށްފައިވާ ނުވާ އިރު، އެ މަޝްރޫއުއާ ގުޅޭ މައްސަލައެއް އޭސީސީއަށް ހުށަހަޅާފައިވާ ކަމަށް އެ ކޮމިޝަނުގެ އޮފިޝަލަކު ވިދާޅުވި އެވެ.
އެ މައްސަލަ ކޮމިޝަނުން މިހާރު ދިރާސާކުރަމުންދާ ކަން ފިޔަވައި އިތުރު ތަފްސީލެއް އޭނާ ނުދެއްވި އެވެ.
ނަމަވެސް، "މިހާރު"އަށް އެނގިފައިވާ ގޮތުގައި އެ މައްސަލާގައި ބަލަން އެދިފައި ވަނީ ދައުލަތުގެ ބަޖެޓު ނުހިމަނައި އެ މަޝްރޫއު ފެއްޓުމުގެ އިތުރުން އިއުލާނުނުކޮށް ހަވާލުކުރުމެވެ.
ފުށިދިއްގަރުފަޅު ހިއްކަން އަންނަ އަހަރުގެ ބަޖެޓުގައި 400 މިލިއަން ރުފިޔާ ހިމެނި އެވެ. އެކަމަކު އިދިކޮޅު އެމްޑީޕީގެ އަޣުލަބިއްޔަތު އޮތް މަޖިލީހުން ބަޖެޓު ފާސްކުރީ އެ މަޝްރޫއު އުނިކޮށް އެ ފައިސާ ޕީއެސްއައިޕީގެ އެހެން މަޝްރޫއުތަކަށް ބަހާލައިފަ އެވެ.
އޭގެފަހުން، ކުއްލި ގޮތަކަށް އެ މަޝްރޫއު ލަންކާގެ ކުންފުންޏަކާ ހަވާލުކޮށްގެން ބިން ހިއްކަން ފެށީ އެ މަޝްރޫއުގެ ފައިސާ ހޯދާނެ ގޮތެއް ވެސް ހާމަނުކޮށެވެ. އަދި އެ މަޝްރޫއު އެ ކުންފުންޏާ ހަވާލުކުރި ގޮތުގެ އެއްވެސް ތަފްސީލެއް ވެސް ހާމަކޮށްފައެއް ނުވެ އެވެ.
އެކަމުގައި ރައީސް މުއިއްޒު ގާނޫނާ ހިލާފުވެވަޑައިގެންފައިވާ ކަމަށް ސަރުކާރާ އިދިކޮޅު ފަރާތްތަކުން ދަނީ ބުނަމުންނެވެ.