ރަައީސް ޑރ. މުހައްމަދު މުއިއްޒު ރ. އަދި ބ. އަތޮޅަށް ކުރައްވާ ރަސްމީ ދަތުރުފުޅެއްގައި މިއަދު ފުރާވަޑައިގެންފި އެވެ.
ހުރިހާ އަތޮޅަކަށް ދަތުރު ކުރެއްވުމަށް ރައީސް ފައްޓަވާފައިވާ ދަތުރުފުޅުގައި މިއަދު އެންމެ ފުރަތަމަ ވަޑައިގަންނަވަން ހަމަޖެހިފައިވަނީ ރ. އަލިފުއްޓަށެވެ.
ރައީސްއާ އެކު މި ދަތުރުފުޅުގައި މިނިސްޓަރުންނާއި ސަރުކާރުންގެ އިސްވެރިން ބައިވެރިވެވަޑައިގަންނަވަ އެވެ.
އަލިފުއްޓަށް ފަހު ރައީސް މިއަދު ދެން ވަޑައިގަންނަން ހަމަޖެހިފައިވަނީ ރ. މީދުއަށެވެ. އެ ރަށުގައި މިރޭ ޖަލްސާއެއް ބޭއްވުމަށް ވަނީ ހަމަޖެހިފަ އެވެ.
ރައީސް ކުރައްވާ މި ދަތުރުފުޅުތަކުގައި ރައްޔިތުންނާ ބައްދަލު ކުރެއްވުމުގެ އިތުރުން، ރަށު ކައުންސިލްތަކާ އެކު ވެސް ބައްދަލުވުންތައް ބާއްވަ އެވެ. މި ބައްދަލުވުންތަކުގައި، ސަރުކާރުން ރަށްތަކަށް ގެންގުޅުއްވާ ތަރައްގީގެ މަޝްރޫއުތަކާއި ކައުންސިލްގެ ހުށަހެޅުންތަކާ ގުޅޭ ވިސްނެވުން ކައުންސިލްތަކާ ހިއްސާކުރައްވަ އެވެ.
ތިން ދުވަހުގެ މި ދަތުރުގައި ރ. އަތޮޅުގެ ބައެއް ރަށްރަށުގެ އިތުރުން ބ. އަތޮޅަށް ވެސް ވަޑައިގަތުމަށް ހަމަޖެހިފަ އެވެ. އަތޮޅުގެ ވެރިކަން ކުރާ ރަށް، އޭދަފުށީގެ އިތުރުން ތުޅާދު އާއި ދަރަވަންދު އާއި ހިތާދޫ އަދި ކެންދުއަށް ވެސް ވަޑައިގަތުމަށް ހަމަޖެހިފައިވެ އެވެ.
މީގެކުރިން ރައީސް ވަނީ އައްޑޫ، ފުވައްމުލައް، ގދ. އަތޮޅާއި ގއ. އަތޮޅާއި ތ. އަތޮޅާއި ލ. އަތޮޅާއި ހއ. އަތޮޅާއި ހދ. އަތޮޅާއި ށ. އަތޮޅު އަދި ނ. އަތޮޅަށް ވަޑައިގެންފަ އެވެ.
ރައީސް މި ދަތުރުފުޅުތައް ކުރައްވަމުން ގެންދަވާއިރު އަންނަ އޭޕްރީލް މަހުގެ 21 ވަނަ ދުވަހަށް ރައްޔިތުންގެ މަޖިލީހުގެ އިންތިހާބު ބޭއްވުމަށް ވަނީ ނިންމައިފަ އެވެ.