ދައުލަތަށް އަނބުރާ ހޯދަން އެންގި 50،370،521ރ. މިލިއަން ރުފިޔާގެ ތެރެއިން މިދިޔަ އަހަރު ހޯދުނީ 234,531ރ. ކަމަށް އޭސީސީން މިއަދު ބުނެފި އެވެ.
އެ ކޮމިޝަންގެ މިދިޔަ އަހަރުގެ އަހަރީ ރިޕޯޓުގައިވާ ގޮތުން، ސަރުކާރު ހިއްސާވާ ކުންފުނިތަކުން، ދައުލަތަށް އަނބުރާ 50،342،542ރ. ހޯދަން މިދިޔަ އަހަރު އެންގި އެވެ. އެކަމަކު، އޭގެ ތެރެއިން ހޯދިފައިވަނީ 181،352ރ. އެވެ. ދެ ވަނައަށް އެންމެ ގިނަ ފައިސާ ހޯދާފައި ވަނީ އެޑިއުކޭޝަން މިނިސްޓްރީންނެވެ. އެއީ 29،120ރ. އެވެ. ރަށު ކައުންސިލްތަކުން ވެސް 13،559ރ. އަނބުރާ ހޯދާފައިވެ އެވެ.
އޭސީސީ އަށް މިދިޔަ އަހަރު 1،151 މައްސަލަ ހުށަހެޅި އެވެ. އޭގެ ތެރެއިން 650 މައްސަލައެއް ރަޖިސްޓްރީކުރިއިރު، ރަޖިސްޓްރީނުކޮށް 501 މައްސަލަ ދޫކޮށްލި އެވެ. އޭގެ ތެރެއިން ދައުވާކޮށް، ޕީޖީ އޮފީހަށް ފޮނުވާފައިވަނީ 16 މައްސަލައެކެވެ. އެ މައްސަލަތައް 29 ފަރާތަކަށް ރައްދުވެ އެވެ.
ޕީޖީ އޮފީހަށް ފޮނުވި މައްސަލަތަކުގައި 4.7 މިލިއަން ރުފިޔާ ހިމެނެ އެވެ. އޭގެ ތެރެއިން ދައުލަތަށް 4.5 މިލިއަން ރުފިޔާ ލިބެންޖެހެ އެވެ.
މިދިޔަ އަހަރު އެންމެ ގިނައިން ހުށަހަޅާފައި ވަނީ ސަރުކާރު ހިއްސާވާ ކުންފުނިތަކާއި މުއައްސަސާތަކަށް ރައްދުވާ މައްސަލަތަކެވެ. އެ ތަންތަނަށް 209 މައްސަލަ ހުށަހެޅި އެވެ. ދެ ވަނައަށް އެންމެ ގިނައިން ހުށަހަޅާފައިވަނީ ނޭޝަނަލް ޕްލޭނިން ހައުސިން އެންޑް އިންފްރަކްސްޓްރަކްޗާއާ ގުޅޭ މައްސަލަތަކެވެ. އެ މިނިސްޓްރީއާ ގުޅޭގޮތުން 190 މައްސަލައެއް ހުށަހެޅި އެވެ.
ޑިއުޓީ ޕްރޮސެކިއުޝަނަށް 61 މައްސަލައެއް ހުށަހެޅި އެވެ. އެ މައްސަލަތަކުގައި 446,300,754 މިލިއަން ރުފިޔާ ހިމެނޭ ކަމަށް ވެސް އެ ކޮމިޝަނުން ބުންޏެވެ.