ޓޫރިޒަމް މިނިސްޓަރު އިބްރާހިމް ފައިސަލް އެ މަގާމުން ވަކިކުރައްވައިފި އެވެ.
ރައީސް އޮފީހުން މިއަދު ބުނީ ރައީސް ޑރ. މުހައްމަދު މުއިއްޒު ވަނީ ފައިސަލް ޓޫރިޒަމް މިނިސްޓަރުގެ މަގާމުން ވަކިކުރައްވާފައި ކަމަށެވެ. އަދި އެ މިނިސްޓްރީގެ ހިންގުން ވަގުތީ ގޮތުން ހަވާލުކޮށްފައި ވަނީ އިކޮނޮމިކް މިނިސްޓަރު މުހައްމަދު ސައީދުއާ ކަމަށް ވެސް ރައީސް އޮފީހުން ބުންޏެވެ.
ފައިސަލް މަގާމުން ވަކިކުރެއްވި ސަބަބެއް އަދި ނޭނގެ އެވެ.
ޓޫރިޒަމް ދާއިރާގެ މާބޮޑު ތަޖުރިބާއެއް ފައިސަލްގެ ނެތް ނަމަވެސް ބިޒްނަސް މެނޭޖްމެންޓުން ފަސްޓް ޑިގްރީ ހާސިލުކުރެއްވި އިރު ތީސިސް ހާއްސަކުރީ ޓޫރިޒަމް ދާއިރާއަށެވެ.
އޭނާއަކީ މި ސަރުކާރުގެ ކެބިނެޓަށް އައްޔަންކުރެއްވި މިނިސްޓަރުންގެ ތެރެއިން ގާބިލްކަމާ ދޭތެރޭ ސުވާލު އުފައްދައި ފުރަތަމަކޮޅުގައި އެންމެ ބޮޑު ފާޑުކިއުމެއް އަމާޒުވި ބޭފުޅާ އެވެ. އެ މަގާމަށް އޭނާ އައްޔަންކުރެއްވީ ރައީސް މުއިއްޒުގެ ކެމްޕޭންގައި އެންމެ އަރިހުގައި އުޅުއްވި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ދަރިކަލުންނަށް ވީތީ ކަމުގެ ތުހުމަތު ކުރި އެވެ.
އެކަމަކު ފައިސަލް ވިދާޅުވެފައި ވަނީ އޭނާ ޓޫރިޒަމް މިނިސްޓަރުގެ މަގާމަށް އައްޔަންކުރީ އަބްދުއްރަހީމުގެ ދަރިއަކަށް ވެގެން ނޫން ކަމަށެވެ. ޓޫރިޒަމް ކަހަލަ، ދައުލަތަށް މުހިއްމު މިނިސްޓްރީއެއްގެ ޒިންމާ ރައީސް ހަވާލު ކުރެއްވީ އެކަން ކުރެވޭނެ ކަމުގެ ގާބިލުކަމާއި ޒިންމާ އުފުލޭނެ ކަމުގެ ޔަގީންކަން އޭނާގެ ކިބައިގައި ހުރިކަން އޮވެގެން ކަމަށް އޭނާ ވިދާޅުވި އެވެ.
ވޭތުވެދިޔަ 10 ވަރަކަށް އަހަރު ސިޔާސީ މަސައްކަތުގައި އުޅުއްވި ފައިސަލް ވަނީ ރައީސް ޑރ. މުހައްމަދު މުއިއްޒުގެ ރިޔާސީ ކެމްޕެއިންގައި ވެސް ގިނަ މަސައްކަތްތަކެއް ކުރައްވައިފަ އެވެ.
ފައިސަލް ވިދާޅުވެފައިވާ ގޮތުގައި އޭނާގެ ވަޒީރު ކަމުގައި އެންމެ ބޮޑު އިސްކަމެއް ދެއްވާނީ، ދިވެހި ޒުވާނުން ޓޫރިޒަމް ދާއިރާ އަށް ވައްދައި އެ ދާއިރާއިން ކާމިޔާބު ވިޔަފާރިވެރިން އުފެއްދުމަށެވެ.