(އާދިއްތަ ދުވަހާ ގުޅޭ)
"ތި ކުއްޖާ ގޮވައިގެން ކުރީ ސީޓަށް އާދޭ!" ކޮށި އިނގިރޭސިބަހަކުން ޒުލްފިގާރު އެދުނެވެ.
އެ ކަން ވިޔަދޭކަށް ނިޒާރު ބޭނުމެއް ނުވިއެވެ. އެ ކަން ކުރާކަށް އަންޖަލް ވެސް ބޭނުމެއް ނޫނެވެ. ވީމާ، ގުޑައިލަން ނޭނގިފައި އެންމެން ތިބީއެވެ. ޒުލްފިގާރު ފަހަތަށް އެނބުރި ބަލައިލައިފައި، ހަރުކަށި އަޑަކުން އެއްޗެއް ބުނެލިއެވެ. އޭނަ ވާހަކަ ދެއްކީ އޭނަގެ ބަހުންނެވެ. ކިއި އެއްޗެއް އެކަކަށް ވެސް ނޭނގުނެވެ.
"ކީކޭ އޭނަ އެ ކިޔަނީ؟" އަންޖަލް މަޑުމަޑުން ނިޒާރު ގާތުގައި އެހިއެވެ. "އަޑެއް ނީވޭހޭކަން ނޭނގެ. އަހަރެން ދަންތަ؟"
ނިޒާރު އެއްބަހެއް ނުވިއެވެ. ވޭން ދުއްވައެއް ނުލިއެވެ. ޒުލްފިގާރު ވޭނުން ފައިބައިފައި އަންޖަލް ފޭބުމަށް ޓަކައި ދޮރު ހުޅުވިއެވެ.
"ނޮޓް ކަމިން؟ ނޮޓް ގޮއިން." ޒުލްފިގާރު ބުންޏެވެ.
"ކާފަ ފައިބަބަލަ!" އަންޖަލް އެދުނެވެ. "އޭރުންނެއްނު އަހަންނަށް ފޭބޭނީ."
ނިޒާރެއް ނުފޭބިއެވެ. ޒުލްފިގާރު ދައްކާ ވާހަކަ އާއި އަންޖަލް ދެއްކި ވާހަކަ ވެސް ނީވޭ ކަމަށް ހަދައިގެން އިނީއެވެ. ރުޅި އައިސްފައި އިރުކޮޅަކު ބަލަން ހުރެފައި ޒުލްފިގާރު ހިނގައިގަތެވެ. މާ ދުރު ނޫން ހިސާބެއްގައި ސައިކަޑައެއް ހުއްޓެވެ. އެ ތަނުން ސައިތަށްޓެއް ގަނެގެން، އެ ދިމާގައި ހުރި ދިގުގޮނޑިއެއްގައި ޒުލްފިގާރު އިށީނެވެ. ކަމެއްވީހެން ވެސް އޭނައަކަށް ހިޔެއް ނުވެއެވެ. އޭރު ވެސް ސާރާގެ ރުއިމަކަށް ބަދަލެއް ނާދެއެވެ.
"އަހަރެން ދަންތަ ކުރިޔަށް؟" ޝާފިޔާ އެހިއެވެ.
"އެކަކަށް ވެސް ނުދެވޭނެ." ނިޒާރު ބުންޏެވެ.
ކުއްލިއަކަށް ސާރާ ރުއިން ހުއްޓާލައިފައި މަތި ބަލަން ފެށިއެވެ. އެ ވޭން ތެރެއަކު ސާރާ ބަލާނެ ކަހަލަ އެއްޗެއް ނެތެވެ. ސާރާ ވާހަކަ ދައްކަން ފެށިއެވެ. ނުވަތަ އަޑުތަކެއްލައްވަން ފެށިއެވެ.
"ނަސީބެއް އަބާޝާ އުރައިގެން އިންކަން،" ބަރުގާންގެ އަޑު އިވުނެވެ. "އެހެން ނޫން ނަމަ އަހަންނަކަށް ނޭނގޭނެ އަންޖޫ އިނީ ކޮން ދިމާއެއްގަ ކަމެއް ވެސް. އަޅެ ބުނެބަލަ! އަންޖޫއަށް ހީވޭތަ އަހަންނާ ނުލާ އަންޖޫއަށް އުޅެވޭނެހެން؟"
ބަރުގާންގެ އަޑު އަންޖަލްއަށް އިހުސާސް ކުރެވެއެވެ. އެކަމަކު ޖަވާބުގައި ބުނާނެ އެއްޗެއް އަންޖަލްއަކަށް ނޭނގެއެވެ.
"އިންސާނުންނާ އިންސާނުން އުޅޭ އެއްވެސް ތަނެއް އަންޖޫއަކަށް ރައްކާތެރިއެއް ނޫނެއްނު،" ބަރުގާން ބުންޏެވެ. "ކިތައް ފަހަރު ކިތައް ގޮތަށް ވިސްނައިދީފިން. މިހާރު އަހަންނަށް އަންޖޫ ނުފެނުނަސް އަންޖޫއަކީ ނުލާހިކު ރީތި ކުއްޖެއް. އަޅައިގަންނަ ކަހަލަ ކުއްޖެއް."
"އެހެންވެއެއްނު ބަރުގާން ވެސް އަހަންނާ އަޅައިގަތީ،" އެހެން މީހުންނަށް ނީވޭ ގޮތަށް އަންޖަލް ބުންޏެވެ. "އިންސާނުންގެ ވާހަކަ ދައްކާ އިރު ތިމާއާ ދޭތެރޭ ވިސްނާބަލަ! އިންސާނަކު ދުވަހަކު ވެސް ބަރުގާން ދިން ވަރުގެ ލަނޑެއް ނުދޭ! މޮޅު ވާހަކަ ނުދައްކާ އަހަރެން ހޮޓަލަށް ގެންގޮސްދީ!"
އަނެއްކާ ސާރާ ރޯން ފެށިއެވެ. އަންޖަލް ނިންމީ ބަރުގާން ރުޅި އައިސްގެން ދިޔައީ ކަމުގައެވެ. އޭރު ވެސް، ދެން ހަދާނެ ގޮތަކާ މެދު ވޭން ތެރޭގައި ދިޔައީ މަޝްވަރާ ކުރެވެމުންނެވެ. ކުއްލިއަކަށް ޒުލްފިގާރު ތެދުވި ތަން އަންޖަލްއަށް ފެނުނެވެ. ހީވީ މީހަކު ޒުލްފިގާރު ކޮޅަށް ނެގި ހެންނެވެ. އޭނަ ހިފާއްޓައިގެން ހުރި ސައިތަށި ދޫވިއެވެ. ވޭންއާ ދިމާއަށް އަންނަން ފެށިއެވެ. ޒުލްފިގާރު ބަލަނީ ކުރިޔަކަށް ނޫނެވެ. އޭނަ ހުރީ ވާނުވާ ނޭނގިފައެވެ. ސައިކަޑައަށް އޭނަ ހިނގައިފައި ދިޔައީ ބޮޑާ ބަނޑިތަކެއް ލައްވަމުންނެވެ. ވޭންއާ ދިމާއަށް އައި އިރު އަތެއް ނުހަލުވައެވެ. ފައި ވެސް ހަރަކާތްކުރީ ގަދަކަމުން ކުރުވާ ކަހަލަ ގޮތަކަށެވެ. އަންޖަލްއަށް އެ ހުރިހައި މަންޒަރެއް ފެނެއެވެ.
"މައްޔިތެއް ހިނގާފަ އަންނަ ހެން މީނަ މި އަންނަނީ ކީއްކުރަންބާ؟" ނިޒާރު މަޑުމަޑުން ބުންޏެވެ.
އައި ގޮތަށް ޑުރައިވަރު ގޮނޑީގައި އިށީނދެފައި ވޭން ދުއްވައިލިއެވެ. އިންސާނުންގެ ގައި ތެރެއަށް ވަދެގެން ކަންކަން ކުރުވުމަކީ ބަރުގާން އަލަށް ކުރާ ކަމެއް ނޫނެވެ. ރާއިފުއަށް ވެސް ހެދީ އެހެންނެވެ. ތަފާތަކީ ރާއިފުގެ ހަރަކާތްތަކުގައި އައިބު ކަމެއް ނެތް ކަމެވެ. އެއީ ކީއްވެގެން ކަމެއް އަންޖަލްއަކަށް ނޭނގެއެވެ. އަނެއްކާ ވެސް ސާރާ ރުއިން ހުއްޓައިލިއެވެ. އެ ހުއްޓައިލި ގޮތަކަށް ދެނެއް ނުރޮއެވެ.
ވޭން މަޑުކުރީ ހޮޓަލަކަށް ނޫނެވެ. ހަތަރު ބުރިއަށް ހުރި ގެއަކަށެވެ. އެންމެން ވޭނުން ފައިބައި، ފޮށިތައް ބޭލި އިރު ވެސް، ބުދެއް ހެން ޒުލްފިގާރު އިނެވެ. އެންމެ ފަހު ފޮށި ބޭލުމާ އެކު، ދޮރުނުލައްޕަނީސް ވޭން ނިކަން ބާރަށް ދުއްވައިލިއެވެ. ދިޔަ ގޮތަށް ގޮސް ގަހެއްގައި ޖެހުނެވެ. މީހުންތައް އެ ދިމާއަށް ދުއްވައިގަތެވެ.
"ހިނގާ އަވަހަށް އެތެރެއަށް." ނިޒާރު ބުންޏެވެ.
ގެއަށް ނުވަދެވެނީސް މީހަކު ނުކުތެވެ. ގެއަށް ވަންނަން ނިޒާރު ގާތުގައި ބުނެފައި އޭނަ ފުރަތަމަ ދިޔައީ ޒުލްފިގާރު އިން ވޭންއާ ދިމާއަށެވެ. ތިން ދަރިން ގޮވައިގެން ނިޒާރު އެތެރެއަށް ވަނެވެ. އެ ތަނަކީ ވަރަށް އާ ތަނެއް ނޫނެވެ. މާ ބާ ތަނެއް ވެސް ނޫނެވެ. ގެލެރީގައި ބުދެއް ބަހައްޓާފައި ހުއްޓެވެ. ތަނުގައި ލާފައި ހުރީ ފިޔާތޮށިކުލައެވެ. ފާރުތަކާއި ފަންގިފިލާގައި ރަންކުލައިން ބޯޑަރު އަޅާފައި ހުއްޓެވެ. ތަނުން ދުވަނީ ދުންދަނޑި ވަހެވެ. ކައުންޓަރަކު މީހަކު ނެތެވެ. އެހެންކަމުން ގޮނޑިތަކުގައި އެންމެން އިށީނެވެ.
"އަޅެ ސާރާ ގޮވައިގެން ކޮޓަރިއަށް ދެވޭނީ ކޮން އިރަކުންތަ؟" ހިތްނުތަނަވަސްވެފައިވާ ރާގެއްގައި އަންޖަލް ބުންޏެވެ.
މީހަކު އެ ތަނަށް ވަނެވެ. އެއީ ގޭގެ ދޮރުމަތިން ނިޒާރުއާ ބައްދަލުކުރި މީހާއެވެ. ކައުންޓަރު ކައިރިއަށް ހުއްޓިފައި، ޕާސްޕޯޓުތައް ދިނުމަށް އޭނަ އެދުނެވެ. ނިޒާރު އެ ކަން ކުރިއެވެ.
"ހާރަކަސް ތަރާވީހަކަސް ހުރި މީހަކީ މީ!" ނިޒާރު މަޑުމަޑުން ބުނެލިއެވެ. "މަ އަދި ހީކުރީ މި ތަނުން ތާމިރާ ދިމާވާނެ ކަމަށް."
"ވަރަށް ބޮޑަށް މާފުކުރާތި!" ފަރިތަ އިނގިރޭސިބަހުން އޭނަ ބުންޏެވެ. "ވޭން އެކްސިޑެންޓު ވެގެން އޭނަ ހޮސްޕިޓަލަށް ފޮނުވާލާފަ މި އައީ. އަހަންނަށް ކިޔަނީ އަރުން. ތާމިރުއަކީ އަހަރެންގެ ރައްޓެއްސެއް. އެއްވެސް ކަމަކަށް މި ތާނގަ ދައްޗެއް ނުވާނެ. ކަމެއް ބޭނުންވެއްޖެއްޔާ ސީދާ އަހަންނަށް ގުޅާނީ. ވަޓްސްއަޕް، ވައިބާއިން ވެސް ގުޅޭނެ. މި އޮތީ ވައިފައި ޕާސްވޯޑް."
އަރުން ކަރުދާސްކޮޅެއް ދިނެވެ. އެއާ ހަވާލުވީ ދިމްނާއެވެ. ވަގުތުން ފޯނުތަކުގައި ފާސްބަސް ޖަހައި ނިންމައިލިއެވެ.
"ފޯމުތައް ފުރާލަން އިރުކޮޅެއް ނަގާނެ،" އަރުން ބުންޏެވެ. "މިހެން ހަދަމާ! ދެ ކޮޓަރީގެ ތަޅުދަނޑި މި ދެނީ. ދޭ ކޮޓަރިއަށް. އަހަރެން ޕާސްޕޯޓުތަކާ ފޮށިތައް ގެންގޮސްދޭނަން."
އަރުން އެއް ތަޅުދަނޑި ނިޒާރަށް، އަނެއް ތަޅުދަނޑި ދިމްނާއަށް ދިނެވެ.
"އެއް ކޮޓަރީގައި ތިން އެނދު ހުންނާނެ،" ދިމްނާއަށް އިނގިލި ދިއްކޮށްލަމުން އަރުން ބުންޏެވެ. "އަނެއް ކޮޓަރީގަ ހުންނާނީ އެއް އެނދު."
ޕާސްޕޯޓުތައް ދޫކޮށްލާފައި ދާކަށް ނިޒާރު ބޭނުމެއް ނުވިއެވެ. ހަމަ އެހެންމެ، ދަރިން އެކަނި ދޫކޮށްލާކަށް ވެސް ހިތްހަމައެއް ނުޖެހުނެވެ. އެހެންވެ، ކުދިން ގެންގޮސް ކޮޓަރިއަށް ލާފައި އަނެއްކާ ވެސް ނިޒާރު ޕާސްޕޯޓުތައް ބަލައި ދިޔައެވެ. ދިޔަ މަގުމަތީގައި ތާމިރު ގުޅިއެވެ.
ސާރާ އިސާހިތަކު ނިދިއެވެ. ކޮޓަރި ތަނަވަހެވެ. ތިން އެނދޭ އަރުން ބުނި ނަމަވެސް ހުރީ ދެ އެނދެވެ. އެއް އެނދުގައި ދެ މީހަކަށް ހަމަޖެހިލައިގެން ނިދޭ ވަރުގެ ޖާގަ އޮތެވެ. އަނެއް އެނދު ވެސް އަންޖަލްއާއި ސާރާއަށް ފުދިފައި ބާކީ ވެސް ވެއެވެ. އިތުރު ދެ ގޮނޑި އާއި ކުޑަ މޭޒެއް ހުރި އިރު ވެސް ތަނުގެ ތަނަވަސްކަމަކަށް ބުރުލެއް ނާރައެވެ. ބައްތިރީސް އިންޗީގެ ޓީވީއެއް ހުއްޓެވެ. ބައްތިރީސް އިންޗިކަން އެނގެނީ ޓީވީގައި ހިއްޕާފައިވާ އިސްޓިކާ ނުނައްޓައި ހުރީމައެވެ. ފާހާނައިގައި ޖަހާފައި ހުރީ ކަޅު މުށްޓެކެވެ. އެހެނަސް ސާފުތާހިރެވެ. ހުރިހައި ކަމެއް ބަލައި ފާސްކުރުމަށް ފަހު ޝާފިޔާ އެނދުގައި ހަމަޖެހިލިއެވެ.
"އަހަރެން ދެން މާލެއަކަށް ނުދާނަން،" ޝާފިޔާ ބުނެލިއެވެ. "މި ތަން ކިހާ އަރާމު. ނޫންތަ ދޮންތާ؟"
"އެއްވެސް އަރާމެއް ނުވާނެ،" އަންޖަލް ޖަވާބު ދިނެވެ. "މާދަމާ އެއްކޮށް ހޮސްޕިޓަލުގަ އުޅެން ޖެހޭނީ. އަހަރުމެން މި އައީ ޗުއްޓީ ކުރާކަށް ނޫނޭ. ޝާފިޔާ މަޑުކޮށްލަބަލަ ސާރާ ކައިރީގަ. އަންނާނަން ފެންވަރާލައިގެން."
"ކޮބާ ލަގޭޖު؟" ދިމްނާ އެހިއެވެ.
"އާނ އެއީ ތެދެކޭ!" އަންޖަލް ފުން ނޭވައެއްލަމުން ބުންޏެވެ. "ސާރާއަކަށް ނުވެސް އެނގޭނެ ދޯ އޭނަ ކުޑައިރު އަހަރުމެން އިންޑިޔާއަށް އައި ކަމެއް."
"އެއީ ކީއްވެ؟ އަހަރުމެން ބުނާނެއްނު. ފޮޓޯ ވެސް ދައްކާނެއްނު،" ޝާފިޔާ އެނދުން ތެދުވެފައި ސާރާގެ ފޮޓޯއެއް ނަގަމުން ބުންޏެވެ. "އަހަރުމެންނަށް ފެންނަ ހިސާބުގައެއްނު ސާރާކޮއްކޮ ބޮޑުވާނީ."
"ކިހިނެއް އެނގެނީ؟" އަންޖަލް ދިނީ މާނައިން ފުރިގެންވީ ޖަވާބެކެވެ.
އަންޖަލްމެން ތިބި ގެ ހުންނަނީ މުސްލިމުން ގިނަ ހިސާބެއްގައެވެ. ގިނަ އަންހެނުން އުޅެނީ މޫނުބުރުގާ އަޅައިގެންނެވެ. ގޭގެ އެކި ކޮޓަރިތަކުން ނުކުންނަ އަންހެނުން ވެސް ތިބެނީ އެހެންނެވެ. އަންޖަލްގެ ތިންބެއިން ބުރުގާ ވެސް ނާޅައެވެ. ކާން އެންމެ ރަނގަޅު ތަނެއް ކަމަށް އަރުން ބުނި ތަނަށް ދިޔަ އިރު އެއީ "ހަލާލު" ޖަހާފައިވާ ތަނެކެވެ. އެ ތަނަށް ވަންނަނީ ހަމަ އެކަނި މުސްލިމުންނެއް ނޫނެވެ. އެ މީހުންގެ ކަޅިތައް އަންޖަލްމެންގެ ގައިން ނުނެއްޓިގެން އުޅޭ ތަން އަންޖަލްއަށް ފެނެއެވެ.
"ދަރިފުޅުމެން ދެން ތިބޭ ކޮޓަރީގަ،" ނިޒާރު އެހެން ބުނީ ސަބަބެއް ނެތިއެއް ނޫނެވެ. "މިހާރު ދެން ތަން ވެސް މި އެނގުނީ. ދުރެއް ވެސް ނޫން. ކާފަ ދާނަން ކާއެއްޗެހި ހިފައިގެން."
އެކަކު ވެސް ދެކޮޅަކަށް އެއްޗެއް ނުބުނެއެވެ. ނިޒާރު އެހެން ނިންމި ސަބަބެއް ވެސް ނާހައެވެ.
"މާދަމާ ހެނދުނު ޖެހޭ ހޮސްޕިޓަލަށް ދާން. ތާމިރު ބުނި މީހަކު ބަލާ އަންނާނޭ،" ނިޒާރު ބުންޏެވެ. "އެކަމަކު ތާމިރު ނުފެނި ފާޑުފާޑުގެ މީހުންނަށް އިތުބާރު ކުރަން ވާނެބާ؟"
"ކާފާ! ތާމިރަށް އިތުބާރު ކުރަން ވާނެބާ؟" އަންޖަލް ސުވާލު އުފެއްދިއެވެ. "އަހަންނެއް ނުކުރާނަން. އަހަންނަށް ރަނގަޅީ ވެސް އޭނަ ނުފެނުނިއްޔާ!"
އިންޑިޔާގައި ނިދަންޖެހުނު ފުރަތަމަ ރެޔެވެ. ކުދިން ކޮޓަރިއަށް ވައްދައި، ތަންޑު އަޅުވައިފައި ނިޒާރު ގޮސް ނިޒާރުގެ ކޮޓަރިއަށް ވަނެވެ. އެހެނަސް ހިތުގައި ހުންނަނީ ނުތަނަވަސްކަމެއް އުފެދިފައެވެ. ބޭރުން ކިރިޔާ އަޑެއް އިވުނަސް ދޮރު ހުޅުވާފައި ދަރިން ތިބި ކޮޓަރީގެ ދޮރުމަތި ބަލައިލެވެއެވެ. އެންމެ ފަހުން އެނދުގައި އިށީނދެލިއެވެ. މީހަކު ދުވެފައި ދިޔަ އަޑު ކަހަލަ އަޑެއް އިވުނެވެ. ކަރަންޓު ދިޔައެވެ. އެނދުން ނުތެދުވެވިގެން އުޅެނިކޮށް، އަންހެންކުއްޖަކު ހަޅޭއްލަވައިގަތް އަޑުއިވުނެވެ. (ނުނިމޭ)