އެންސްޕާގެ ސީއީއޯކަމުން މުޖުތަބާ ޖަލީލް މިއަދު މަގާމުން ވަކިކޮށް، އިކޮނޮމިކް މިނިސްޓްރީގެ ނައިބު ކަމަށް ބަދަލުކޮށްފި އެވެ.
ދައުލަތުގެ އެހީއަށް ބޭނުންވާ ފަރާތްތަކަށް އެހީ ފޯރުކޮށްދިނުމަށް އުފައްދާފައިވާ އިދާރާގެ ސީއީއޯ ކަމަށް މުޖުތަބާ 2014 ވަނަ އަހަރު ސެޕްޓެމްބަރު މަހު އައްޔަން ކުރީ، އޭރު އެ މަގާމުގައި ހުންނެވި އަބްދުﷲ މުހައްމަދު ދީދީ ވަކިކުރުމަށް ފަހު އެވެ.
ރައީސް އޮފީހުން ބުނީ އެންސްޕާގެ ސީއީއޯކަމުން މުޖުތަބާ ވަކިކުރުމަށްފަހު އެ މަގާމަށް އިސްމާއިލް އައްޒާމް ވަޖީހު އައްޔަންކޮށްފައިވާ ކަމަށެވެ.
މުޖުތަބާ މަގާމުން ވަކިކުރިއިރު، ލޯކަލް ކައުންސިލްގެ އިންތިހާބުގެ ވޯޓު ނެގިތާ މާގިނައިރެއް ނުވަނީސް އާސަންދައިގެ ހިދުމަތް އަމިއްލަ ތަންތަނުން ކުއްލި ގޮތަކަށް މެދުކަނޑާލި އެވެ. ނަމަވެސް އޭގެ އެއް ދުވަސް ފަހުން އަލުން އެ ހިދުމަތް ކުރިއެކޭ އެއްގޮތަށް ލިބެމުންދާނެ ކަމަށް ރައީސް އޮފީހުން އެންގި އެވެ.
އެކަމާ ގުޅިގެން ރައީސް އޮފީހުންގެ ނެރުނު ނޫސްބަޔާނެއްގައި ބުނެފައި ވަނީ އާސަންދައިގެ ޚިދުމަތުގެ ނިޒާމުގެ ކަންކަން ހަރުދަނާ ކުރުމަށްޓަކައި ސަރުކާރުން އެންސްޕާ އަށް ކުުރިން ހުށަހަޅާފައިވާނެ ކަމަށެވެ. އަދި ސިއްހީ ޚިދުމަތް ދޭ އަމިއްލަ ތަންތަނުން ދެމުން ގެންދިޔަ، އިންޕޭޝަންޓް، އައުޓްޕޭޝަންޓް، ލެބޯޓަރީ އަދި ސްކޭން ކުރުމުގެ ޚިދުމަތްތައް އާސަންދަ އިން އުނިކުރުމަށް މިދިޔަ ބުދަދުވަހު އެންސްޕާގެ ބޯޑުން ނިންމާފައިވާ ކަމަށް ރައީސް އޮފީހުން ބުނެފައިވެ އެވެ.
އާސަންދަ ހިދުމަތް ކުއްލި ގޮތަކަށް މެދުކަނޑާލުމާ ގުޅިގެން ގިނަ އަދަދެއްގެ ބަޔަކު ސަރުކާރަށް ފާޑުކިޔާފައިވެ އެވެ. އަދި އެ ހިދުމަތް މެދުކަނޑާލީ ސަރުކާރު ހިންގާ ޕީޕީއެމް އަށް ކުރިމަތިވި ނާކާމިޔާބާ ގުޅިގެން ކަމަށް ގިނަ ބަޔަކު ތުހުމަތުކުރެ އެވެ. އެކަމަކު ސަރުކާރުން އެކަން ދޮގުކުރެ އެވެ.