ބާލިން (މާޗް 26) - ކެޓަލޯނިއާގެ ކުރީގެ ލީޑަރު ކާލްސް ޕުޖްޑެމޮންގެ ބަންދާ މެދު ގޮތެއް ނިންމަން ޖަރުމަނުގެ ކޯޓަކަށް މިއަދު ހާޒިރު ކުރަން ނިންމައިފި އެވެ.
ޖަރުމަން ފުލުހުން ޕުޖްޑެމޮން އިއްޔެ ހައްޔަރު ކުރީ ޑެންމާކުން ޖަރުމަނަށް ވަދެ އެ ގައުމުގެ ހައިވޭއެއްގައި ދަތުރު ކުރައްވާފައި ވަޑައިގަންނަވަނިކޮށެވެ. ޕުޖްޑެމޮން ހައްޔަރު ކުރީ ޔޫރަޕިއަން އެރެސްޓް ވޮރެންޓެއްގެ ދަށުންނެވެ.
ޕުޖްޑެމޮން ހައްޔަރު ކުރީ އޭނާއާ ދެކޮޅަށް ސްޕޭނުގެ ޕްރޮސެކިއުޓަރުން އަމުރު ނެރުނުތާ ފަސް މަސް ފަހުންނެވެ. ޕުޖްޑެމޮން ހައްޔަރުކޮށްފައި ވަނީ ބެލްޖިއަމަށް ވަޑައިގަތުމުގެ ދަތުރުގައި އުޅުއްވަނިކޮށެވެ. މިދިޔަ ހުކުރު ދުވަހު އޭނާ ވަނީ ފިންލޭންޑަށް ވަޑައިގެންފަ އެވެ. އެއީ ޔުނިވާސިޓީއެއްގައި ތަގްރީރު ކުރެއްވުމަށާއި ވަކީލުންނާ ބައްދަލު ކުރެއްވުމަށެވެ.
ޖަރުމަނުގެ ކޯޓަކަށް ޕުޖްޑެމޮން ހާޒިރު ކުރަނީ އޭނާގެ އައިޑެންޓިޓީ ޔަގީން ކުރުމަށާއި އޭނާ ބަންދުގައި ބެހެއްޓުމާ މެދު ގޮތެއް ނިންމުމަށެވެ.
ޕުޖްޑެމޮން ހައްޔަރު ކުރުމާ ގުޅިގެން ކެޓަލޯނިއާގައި ވަނީ ހަމަނުޖެހުންތައް ވަރަށް ބޮޑަށް އިތުރުވެފަ އެވެ. ހަމަނުޖެހުން ހިންގި މީހުން މައިތިރި ކުރުމަށް ސްޕޭން ފުލުހުން ރޭ ވަނީ ބާރުގެ ބޭނުން ކޮށްފަ އެވެ. ބާސެލޯނާގެ ހަމަނުޖެހުންތަކުގައި ވަނީ 90 މީހުން ޒަޚަމްވެފަ އެވެ. އޭގެ ތެރޭގައި 22 ފުލުހުން ވެސް ހިމެނެ އެވެ.
ޕުޖްޑެމޮން ހައްޔަރު ކުރަން ކުރިން ނެރުނު އަމުރު ސްޕޭނުގެ ފަނޑިޔާރަކު ޑިސެމްބަރު މަހު ވަނީ އުވާލައިފަ އެވެ. އެއީ ޕުޖްޑެމޮން އަނބުރާ ސްޕޭނަށް ވަޑައިގަންނަވަން ބޭނުންކަން އޭނާ ހާމަކުރައްވާފައިވާތީ އެވެ. އެކަމަކު ސްޕޭނުގެ ކޯޓަކުން މީގެ ތިން ދުވަސް ކުރިން ވަނީ އެ އަމުރު އަލުން ނެރެފަ އެވެ.