މާލޭގައި ހުންނަ ހުޅުމާލޭ ފެރީ ޓާމިނަލް ކުރިމަތީގައި ހަދާފައިވާ، މަތީ ފެންވަރުގެ 52 ކޮޓަރި ހިމެނޭ "މާގިރި ހޮޓެލް" މިއަދު ހުޅުވައިފި އެވެ.
ގާތްގަނޑަކަށް ހަ މިލިއަން ޑޮލަރު (92.5 މިލިއަން ރުފިޔާ) ހޭދަކޮށްގެން ހެދި މާގިރި ހޮޓެލް ރަސްމީކޮށް ހުޅުވީ މިއަދު ހެނދުނު ބޭއްވި ރަސްމިއްޔާތެއްގައި، އެ ހޮޓާ ހިންގާ ރިޖެންޓް މޯލްޑިވްސްގެ އިސްވެރިންނެވެ. އެ ކުންފުނީގެ އިސްވެރިންގެ ގޮތުގައި ކްރައުން ކޮމްޕެނީގެ ޑިރެކްޓަރު އަހުމަދު ނަޒީރާއި ލިލީ ހޮޓެލްސްގެ ޑިރެކްޓަރު އަހުމަދު ހަފީޒާއި އަބްދުލް މުހުސިނާއި ކުރީގެ ރައީސް އިބްރާހިމް ނާސިރުގެ އަނބިކަނބަކަލެއް ކަމަށްވާ ނަސީމާ މުހައްމަދު ކަލޭފާނު ހިމެނިވަޑައިގަންނަވަ އެވެ.
އެ ހޮޓަލުގެ އިސް އޮފިޝަލަކު މިއަދު ވިދާޅުވީ އަލަށް ހެދި ނުވަ ބުރީގެ ހޮޓަލުގައި އެންމެ ޒަމާނީ ވަސީލަތްތަކާއެކު ހަތަރު ކެޓަގަރީއެއްގެ ކޮޓަރިތަކުގެ އިތުރުން 100 މީހުންގެ ޖާގައިގެ ރެސްޓޯރަންޓާއި 62 މީހުންގެ ޖާގައިގެ ރެސްޓޯރަންޓެއް އަދި ކެފޭއަކާއި ކޮންފަރެންސް ހޯލަކާއި މީޓިން ރޫމަކާއި ފިޓްނަސް ސެންޓަރެއް ވެސް ހިމެނޭ ކަމަށެވެ.
މާލޭގައި 1970ގެ އަހަރުތަކުގައި އެންމެ ފުރަތަމަ ހުޅުވި ގެސްޓްހައުސް ހިންގި ތަނުގައި ހެދި ހަތަރު ތަރީގެ ހޮޓަލުގެ ކޮޓަރީގެ އަގު ފެށެނީ ރެއަކަށް 120 ޑޮލަރުންނެވެ. އެތަނުގައި 50 އަކަމީޓަރުގެ ހަ އެގްޒެކެޓިވް ސުއިޓާއި 41 އަކަމީޓަރުގެ ހަ ޖޫނިއާ ސުއިޓް އަދި 22- 24 އަކަމީޓަރުގެ 20 ޕްރީމިއާ އޯޝަން ވިއު ރޫމް އަދި އެ ސައިޒުގެ 20 ޕްރިމިއާ ރޫމް ހުރެ އެވެ.
"މާލޭގައި މިހާރު ހުރި ހޮޓެލްތަކަށް ބަލާއިރު އެކަށީގެންވާ ރަނގަޅު އަގުތަކެއްގައި މިތަނުން ކޮޓަރި ލިބެން ހުންނާނެ. އަދި މިތަނުގެ ރެސްޓޯރަންޓުތަކުގައި ޕާޓީ ފަދަ ހަފުލާތައް ބޭއްވުމަށް ވެސް ދޫކުރަން ވަނީ ހަމަޖެހިފައި،" އެ އޮފިޝަލް ވިދާޅުވި އެވެ.
މާލޭގެ އެންމެ ހިތްގައިމު އެއް ސަރަހައްދުގައި ހަދާފައިވާ ހޮޓަލުގެ ޓެރަހުގައި ހުންނައިރު އިރު އަރާ މަންޒަރާއި ހުޅުލެއަށް މަތިންދާބޯޓު ޖައްސާ މަންޒަރު އަދި މާލެ އާއި ހުޅުލެއާ ގުޅުވައިދޭ ބްރިޖް ފަދަ ހިތްގައިމު މަންޒަރުތައް ވަރަށް ރީތިކޮށް ފެނެ އެވެ.