އެއްވެސް ސިޓީއެއް އަނބުރާ ނުގެންނަން: އެފްއައިޔޫ

ތަހުގީގީ އެކި އިދާރާތަކަށް ފޮނުވި އެއްވެސް ސިޓީއެއް، ރިޕޯޓެއް އަނބުރާ ގެނެސްފައި ނުވާނެ ކަމަށް، އެމްއެމްއޭގައި އުފައްދާފައި އޮންނަ، ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) އިން ދެންމެ ބުނެފި އެވެ.

މަނީ ލޯންޑަރިން އާއި ޓެރަރިޒަމަށް މާލީ ގޮތުން ވާ އެހީތައް ބަލަން އުފައްދާފައިވާ މިނިވަން މި ޔުނިޓުން މިހެން ބުނި އިރު، ރައީސް އަބްދުﷲ ޔާމީންގެ އެކައުންޓަކަށް 22.5 މިލިއަން ރުފިޔާ ޖަމާކޮށްފައިވާ ވާތީ، އެކަން ބަލަން ފުލުހުންނަށް ފޮނުވި މައްސަލައެއް ވަނީ ފެންމަތިވެފަ އެވެ. އެކަމަކު އެ މައްސަލަ ބަލަން އެފްއައިޔޫ އިން ފުލުހުންނަށް ފޮނުވި ސިޓީ، އެމްއެމްއޭ އިން އަނބުރާ ގެންގޮސްފައިވާ ކަމަށް، ރައީސް އޮފީހުގެ ތަރުޖަމާން އިބްރާހިމް މުއާޒު އަލީ މިއަދު ވިދާޅުވި އެވެ.

ނަމަވެސް އެމްއެމްއޭގެ ތަރުޖަމާން މުހައްމަދު ނާސިހު މެދުވެރިކޮށް އެފްއައިޔޫން ނެރުނު ބަޔާނެއްގައި ބުނީ އެ ޔުނިޓުން މިހާތަނަށް ތަހުގީގީ އިދާރާއަކާ ހިއްސާކުރި "އެއްވެސް ސިޓީއެއް، ރިޕޯޓެއް އަދި މިފަދަ އެއްވެސް މައުލޫމާތެއް އަނބުރާ ގެނެސްފައި ނުވާނެ" ކަމަށެވެ.

އެފްއައިޔޫގެ ބަޔާނުގައި ބުނެފައިވާ ގޮތުގައި މަނީ ލޯންޑަރިން އާއި ޓެރަރިޒަމަށް މާލީ ގޮތުން ވާ އެހީތަކާއި ކުށް ކޮށްގެން ހޯދާ މުދަލާ ބެހޭ މައުލޫމާތު ރާއްޖޭގެ ތަހުގީގީ އިދާރާތަކަށް ހިއްސާކުރުމުން، އެ މައުލޫމާތު ބޭނުންކުރުމަކީ، ގާނޫނުން އެ ފަރާތްތަކަށް ލާޒިމް ކަމެކެވެ. އެ ގޮތަށް އެ ބުނީ، ބެލެވޭ ގޮތުގައި، ފުލުހުންނަށް އެ ޔުނިޓުން ފޮނުވާ މައުލޫމާތުތައް ވެސް ތަހުގީގުކުރަން ޖެހޭނެކަން، ހަނދާންކޮށްދިނުމަށެވެ.

ރައީސް ޔާމީންގެ އެކައުންޓަށް ސެޕްޓެމްބަރު 5 ގައި 10 މިލިއަން ރުފިޔާ އަދި ސެޕްޓެމްބަރު 10 ގައި 12.5 މިލިއަން ރުފިޔާ ޖަމާކުރުމުން، އެކަން ބަލައިދިނުމަށް އެފްއައިޓީން ފުލުހުންނަށް ހުށަހެޅީ އިންތިހާބުގެ ކުރިންނެވެ. އެކަމަކު ރައީސް ދިފާއުކުރައްވައި މުއާޒް "މިހާރު" އަށް މިއަދު ވިދާޅުވީ އެ މައްސަލައިގެ މައުލޫމާތު ލިބިވަޑައިގަތުމާ އެކު ތަފްސީލް ހޯއްދަވަން އެމްއެމްއޭގެ ގަވަރުނަރު އަހްމަދު ނަސީރަށް، ރައީސް ޔާމީން ގުޅުއްވި ކަމަށެވެ. އެފްއައިޔޫ އިން ފުލުހުންނަށް ސިޓީއެއް ފޮނުވި ނަމަވެސް އެއީ އޭނާ އަށް އެނގިވަޑައިގެން ހިނގާފައި އޮތް ކަމެއް ނޫން ކަމަށް ގަވަރުނަރު ރައީސަށް ދެންނެވި ކަމަށް ވެސް މުއާޒް ވިދާޅުވި އެވެ.

އެކަމަކު "މިހާރު"ން ނަސީރާ ގުޅުމުން އޭނާ ވިދާޅުވީ އެފްއައިޔޫއިން ބަލާ އެއްވެސް މައްސަލައެއްގެ މައުލޫމާތު ހާމަނުކުރާތީ ވަކި އެއްޗެއް ވިދާޅުވެވެން ނެތް ކަމަށެވެ.

ރައީސް ޔާމީންގެ އެކައުންޓަށް އެވަރުގެ އަދަދެއް ޖަމާކުރީ، ޕީޕީއެމުން މިހާރު ބުނާ ގޮތުގައި، ރިޔާސީ އިންތިހާބަށް ހޭދަކުރުމަށެވެ. އިންތިހާބުތަކާ ބެހޭ ގާނޫނު ބުނާ ގޮތުން ރިޔާސީ ކެންޑިޑޭޓުން، ކެމްޕޭނަށް ހޭދަކުރާ ފައިސާ އެ ކެންޑިޑޭޓެއްގެ ނަމުގައި ވަކި އެކައުންޓެއް ހުޅުވާ އެއަށް ޖަމާކުރަން ޖެހެ އެވެ.

ނަމަވެސް ރައީސް ޔާމީން، މޯލްޑިވްސް އިސްލާމިކް ބޭންކްގައި ހުޅުވާފައިވާ އެކައުންޓަށް 22 މިލިއަން ރުފިޔާ ޖަމާކުރިކަން މީޑިއާގައި ރިޕޯޓްކުރަމުން ދާތާ ހަފުތާއަކަށް ވުރެ ގިނަ ދުވަސް ވީ އިރު ވެސް، ރައީސްގެ ފަރާތްޕުޅުން ވެސް އަދި ޕީޕީއެމަކުން ވެސް، އެއީ ކެމްޕޭނަށް ހުޅުއްވި އެކައުންޓެއް ކަމަކަށް ބުނެފައެއް ނުވެ އެވެ.

ނަސީހު މެދުވެރިކޮށް އެމްއެމްއޭ އިން ވެސް ވަނީ ބަޔާނެއް ނެރެފަ އެވެ. އެ ބަޔާނުގައި، މަނީ ލޯންޑަރިންއާ ބެހޭ ގާނޫނާ ހަވާލާދީ، ބުނީ އެފްއައިޔޫގެ މަސްއޫލިއްޔަތުތަކުގެ ތެރޭގައި ހިމެނޭ ކަންކަން ނިންމާނީ ސީދާ އެ ޔުނިޓުން ކަމަށެވެ.

"މިހެންކަމުން އެ ޔުނިޓުން ކަމާ ބެހޭ ފަރާތްތަކަށް ފޮނުވާ ރިޕޯޓްތައް ފޮނުވަނީ ސީދާ އެ ޔުނިޓުންނެވެ. އެކަމުގައި މި އޮތޯރިޓީގެ އެއްވެސް ދައުރެއް ނޯވެ އެވެ،" އެމްއެމްއޭގެ ބަޔާނުގައި ބުނެފައިވެ އެވެ.