ބޮލީވުޑްގެ ޚަބަރުތައް ކުރުކޮށް

ދާދި ފަހުން އަމީތާބް ބައްޗަންއާ އެކު ފިލްމެއް ކުޅެން ސޮއިކުރި އެކްޓަރު އިމްރާން ހާޝިމީ އަނެއްކާ ވެސް އާ ފިލްމަކަށް ސޮއިކޮށްފި އެވެ.

އޭނާ މި ފަހަރު ސޮއިކުރީ 2017 ގައި ރިލީޒްކުރި މަލަޔާޅަމް ސުޕަނެޗްރަލް ތުރިލާ "އެޒްރާ" ގެ ހިންދީ ރިމެކަށެވެ. އޮރިޖިނަލް ފިލްމު ވެސް ޑައިރެކްޓް ކުރި ޖޭ ކްރިޝްނަން (ޖޭ ކޭ) ޑައިރެކްޓް ކުރާ ހިންދީ ރިމެކްގެ ޕްރޮޑިއުސަރަކީ ކުމާރު މަންގަތެވެ.

މުމްބާއީ އާއި މޮރިޝަސްގައި މަންޒަރުތައް ނަގާ މި ފިލްމުގެ އިތުރު ކާސްޓުން އަދި އިއުލާނެއް ނުކުރެ އެވެ.

"އެޒްރާ" އަކީ ބޮކްސް އޮފީހުގައި 50 ކްރޯޑް ރުޕީސްގެ އާމްދަނީއެއް ހޯދި ފިލްމެކެވެ. އެ ފިލްމުގެ ލީޑް ބަތަލަކީ ބޮލީވުޑްގެ ބައެެއް ފިލްމުތަކުން ވެސް ފެނިފައިވާ ޕްރިތުވީރާޖް ސުކްމަރަން އެވެ.

ޖެނުއަރީގައި ރިލީޒް ކުރި "ވާއި ޗީޓް އިންޑިއާ" ގެ އެކްޓަރު އިމްރާން މިހާރު އަންނަނީ ޝާހްރުކް ހާންގެ ފިލްމު ކުންފުނި ރެޑް ޗިލިޒާއި ނެޓްފްލިކްސް އިން ހަދާ ވެބް ސީރީޒް "ބާޑް އޮފް ބްލަޑް" ގެ މަސައްކަތް ކުރަމުންނެވެ.

ޕަރިނީތީ ޗޯޕްޅާ އާއި ސިދާތު މަލްއުރާގެ ޖޯޑު އެކީގައި ފެނިގެންދާ ދެވަނަ ފިލްމު "ޖަބަރިޔާ ޖޯޅީ" ގެ ޝޫޓިން ނިންމާލައިފި އެވެ.

ފިލްމުގެ ޝޫޓިން ނިންމައިލިކަން ޓީމުން ވަނީ ޓްވިޓާގައި ވެސް ހިއްސާކޮށްފަ އެވެ. "ޖަބަރިޔާ ޖޯޅީ" އަކީ ޕްރަޝާންތު ސިންގް ޑައިރެކްޓް ކުރާ ފިލްމެކެވެ. މީގެ އިތުރު ކާސްޓުންގެ ތެރޭގައި ޖާވިދު ޖެފްރީ، އަޕަރްޝަކްރީ ކުރާނާ، ރުސްލާން މުމްތާޒް އަދި ސަންޖޭ މިޝްރާ ހިމެނެ އެވެ.

އެކްތާ ކަޕޫރް ޕްރޮޑިއުސް ކުރާ މި ފިލްމު ސިނަމާތަކަށް އަންނާނީ އަންނަ ޖުލައި މަހުގެ 12 ގަ އެވެ.

ޕަރިނީތި އާއި ސިދާތު އެކީގައި ކުޅުނު ފުރަތަމަ ފިލްމަކީ 2014 ގެ "ހަސީ ތޯ ޕަސީ" އެވެ.

އެކްޝަން ހީރޯއެއްގެ ގޮތުގައި ކުރިއަރަމުން އަންނަ ޒުވާން އެކްޓަރު ވިދުޔަތު ޖަމްވަލް ގޭންގްސްޓާރުންގެ ވާހަކަ ކިޔައިދޭ ފިލްމަކަށް ސޮއިކޮށްފި އެވެ.

މި ހަފުތާހައި "ހުދާހާފިޒް" ކިޔާ ރޮމޭންޓިކް އެކްޝަން ތުރިލާއަކަށް ވެސް ސޮއި ކުރި އެކްޓަރުގެ ގޭންގްސްޓާ ފިލްމަކީ އެކްޓަރު މަހޭޝް މަންޖްރޭކަރް ޑައިރެކްޓް ކުރާ "ޕަވާ" އެވެ. ރިޕޯޓްތައް ބުނާ ގޮތުން މި ފިލްމަކީ ހޮލީވުޑްގެ މަޝްހޫރު ފިލްމު "ގޯޑްފާދާ" އާ ވައްތަރުކޮށް ހަދާ ފިލްމެކެވެ.

މި މަހު ރިލީޒް ކުރި "ޖަންގްލީ" ގެ ބަތަލު ވިދުޔަތު ދޭވީ ދާސް ތާކޫރް ކިޔާ ކެރެކްޓާއެއް ކުޅޭ ފިލްމުގެ ޝޫޓިން އަންނަ މަހު ފަށަން ނިންމާފައިވާ އިރު މީގެ ބަތަލާއަކީ ޝްރޫތީ ހަސަނެވެ. އަދި ވިޖޭ ގަލާނީ ޕްރޮޑިއުސް ކުރާ ފިލްމުގެ ޝޫޓިން މި އަހަރުގެ ޑިސެމްބަރުގެ ތެރޭގައި ނިންމައިލާނެ އެވެ.

"ޕަވާ" ގެ ޑައިރެކްޓަރު މަހޭޝް ފިލްމުން ފެނިގެން ދާނީ ވިދުޔަތުގެ ބައްޕަގެ ރޯލުންނެވެ.

އިންޑިއާގެ ހަނގުރާމައިގެ ކުރީގެ ބަތަލު ވިކްރަމް ބަޓްރާގެ ވާހަކަ ކިޔައިދޭ ފިލްމު "ޝޭރް ޝާހް" އަށް އެކްޓަރު ސިދާތު މަލްއުތުރާ ތައްޔާރު ވާން ފަށައިފި އެވެ.

އެކަން އިންސްޓަގްރާމް ސްޓޯރީގައި ހިއްސާ ކުރަމުން ސުދާތު ވަނީ ފިލްމުގެ ޓްރޭނިންތަކުގެ ތެރެއިން އޭނާ ބަޑި ޖަހާ މަންޒަރު ފެންނަ ފޮޓޯއެއް ވެސް ހިއްސާކޮށްފަ އެވެ. "ޝޭރު ޝާހް" އަކީ ކަރަން ޖޯހަރު ޕްރޮޑިއުސް ކުރާ ފިލްމެކެވެ.

ކަރްގިލް ހަނގުރާމައިގެ ތެރޭގައި މަރުވި ވިކްރަމްގެ ފިލްމާ ބެހޭ އެއްވެސް މައުލޫމާތެއް ރަސްމީކޮށް އަދި ހިއްސާއެއް ނުކުރެ އެވެ. އެކަމަކު ރިޕޯޓްތައް ބުނާ ގޮތުން މި ފިލްމުގެ ޝޫޓިން މި މަހު ފަށާނެ އެވެ. އަދި އަންނަ އަހަރު ކުރީކޮޅު ރިލީޒް ކުރާ ފިލްމުގެ ބަތަލާއަކީ ކިއާރާ އަދުވާނީ ކަމަށްވެ އެވެ.

ސިދާތުގެ ކުރިއަށް ހުރި ފިލްމުތަކުގެ ތެރޭގައި "ޖަބަރިޔާ ޖޯޅީ" އާއި "މަރުޖާވާ" ހިމެނެ އެވެ.