ރާއްޖޭގައި ވަޒީފާ އަދާކުރާ މީހުންނަށް ދޭ އެންމެ ކުޑަ އުޖޫރަ ކަނޑައެޅުމުގެ ބާރު އިކޮނޮމިކް މިނިސްޓަރަށް ދޭ ގޮތަށް، ވަޒީފާއާ ބެހޭ ގާނޫނަަށް ސަރުކާރުން އިސްލާހު މިއަދު ހުށަހަޅައިފި އެވެ.
އެމްޑީޕީގެ ކެނދިކުޅުދޫ ދާއިރާގެ މެމްބަރު އަހުމަދު އީސާ ހުށަހެޅުއްވި އިސްލާހުގައި ބުނެފައި ވަނީ ރާއްޖޭގައި ވަޒީފާ އަދާކުރާ މީހުންނަށް ދެވޭނެ އެންމެ ކުޑަ އުޖޫރަ ކަނޑައަޅާނީ އެކަމަށް ލަފާދޭން އެކުލަވައިލާ ބޯޑެއްގެ ލަފަޔާ އެކު އިކޮނޮމިކް މިނިސްޓަރު ކަމަށެވެ. އެގޮތުން އުފައްދާ ބޯޑަށް ކިޔާނީ "މިނިމަމް ވޭޖް އެޑްވައިޒަރީ ބޯޑް" އެވެ.
އިސްލާހު ފާސްވާތާ އެއް މަސްދުވަހުގެ ތެރޭގައި އެކުލަވާލަން ޖެހޭ އެ ބޯޑުން ކުރަން ލާޒިމްކުރާ ކަންތައްތަކުގެ ތެރޭގައި އެންމެ ކުޑަ އުޖޫރަ ދޭނެ ސިޔާސަތުތަކާއި މިންގަނޑުތަކާއި ހަމަތައް ދިރާސާކޮށް މިނިސްޓަރަށް ލަފާ ދިނުން ހިމެނެ އެވެ. ބޯޑުން ކުރާނެ އަނެއް ކަމަކީ އެންމެ ކުޑަ އުޖޫރައިގެ ގޮތުގައި ދޭނެ އަދަދު ކޮންމެ ދެ އަހަރަކުން ރިވައިސްކުރުމެވެ. އެގޮތުން އެ އަދަދަށް ބަދަލެއް ގެންނަން ފެނިއްޖެ ނަމަ ބޯޑުން އެ ލަފާ މިނިސްޓަރަށް ދޭ ގޮތަށް ވެސް ބިލުގައި ވެ އެވެ.
މި ސަރުކާރުގެ އިކޮނޮމިކް މިނިސްޓަރަކީ ފައްޔާޒު އިސްމާއިލް އެވެ.
އެންމެ ކުޑަ އުޖޫރަ ދޭ ދާއިރާތައް
- ޓޫރިޒަމް
- އިމާރާތްކުރުމުގެ ދާއިރާ
- މަސްވެރިކަން
- ދަނޑުވެރިކަން
- ތައުލީމީ ދާއިރާ
- ކުދި އަދި މެދު ފަންތީގެ ވިޔަފާރި
އިގުތިސާދީ ހާއްސަ ހާލަތެއް ދިމާވެއްޖެ ނަމަ އެންމެ ކުޑަ އުޖޫރައިގެ ގޮތުގައި ދޭނެ އަދަދު، ދެ އަހަރުގެ ކުރިން ވެސް ރިވައިސް ކުރެވޭނެ ކަމަށް، ބިލްގައިވެ އެވެ.
އެންމެ ކުޑަ އުޖޫރަ ކަނޑައެޅުމާ ބެހޭ ގޮތުން ކަމާ ބެހޭ އިދާރާތަކުން އެންމެ ފަހުން މަޝްވަރާކުރީ ޖެނުއަރީ މަހުގެ ފަހުކޮޅު ރައީސް އޮފީހުގައި ބޭއްވި ބައްދަލުވުމެއްގަ އެވެ.
ރައީސް އޮފީހުން އޭރު ބުނީ އެ ބައްދަލުވުމުގައި މައިގަނޑު ގޮތެއްގައި މަޝްވަރާކުރީ އެންމެ އެކަށޭނަ އަދި ފުރިހަމަ މިނިމަން ވޭޖް ކަނޑައެޅުމަށް ކުރަން ޖެހޭ ކަންތައްތަކުގެ މައްޗަށް ކަމަށެވެ. އެ ކަންތައްތަކުގެ ތެރޭގައި، އެންމެ ކުޑަ އުޖޫރަ ކަނޑައެޅުމުން އެކި ދާއިރާތަކަށް އޭގެ ސަބަބުން ކުރާނެ އަސަރާއި އަންނާނެ ކަމަށް އަންދާޒާކުރެވޭ ބަދަލުތައް ވެސް ހިމެނެ އެވެ.
އެގޮތުން ދައުލަތުގެ ބަޖެޓާއި އިންފްލޭޝަން ރޭޓާއި ރާއްޖޭގެ އުފެއްދުންތެރިކަމުގެ ނިސްބަތާއި ބޭރު ފައިސާގެ ރިޒާވާއި ކުދި އަދި މެދު ފަންތީގެ ވިޔަފާރިތަކާއި ސަރުކާރު ހިއްސާވާ އަދި އަމިއްލަ ކުންފުނިތަކުގެ އިތުރުން ޖުމްލަ ގޮތެއްގައި އިގްތިސާދަށް ކުރާނެ އަސަރުތަކާ މެދު މަޝްވަރާކުރި ކަމަށް އޭރު ބުންޏެވެ.
އެންމެ ކުޑަ އުޖޫރަ ކަނޑައެޅުމާ ބެހޭ ގޮތުން ލަފާ ދޭން މިހާރު ވެސް ބޯޑެއް އޮވެ އެވެ. އެބޯޑް އެކުލަވައިލީ މިދިޔަ އަހަރުގެ މޭމަހު އެވެ.