ކޮލަމްބޯ އާއި އިންޑިއާގެ ކޮޗިން އިން ނާދެވި ތިބި ދިވެހިން ގެންނަން މޯލްޑިވިއަން އިން މާދަމާ އާއި އަނެއް ދުވަހު ދަތުރެއް ކުރަން ހަމަޖެހިފައިވާ ކަމަށް އެ އެއާލައިނުން މިއަދު ބުނެފި އެވެ.
ކޮލަމްބޯ އާއި ކޮޗިންގައި ރާއްޖެ އަށް ނާދެވި ތާށިވެފައި ގިނަ ބަޔަކު ތިބީ ކޮވިޑް-19 ފެތުރުން ހުއްޓުވުމަށް އެޅި ފިޔަވަޅުތަކެއްގެ ގޮތުގައި އިންޑިއާ އާއި ލަންކާ އަށް ވައިގެ ދަތުރުތައް ކުރުން ހުއްޓައިލުމުންނެވެ. މޯލްޑިވިއަން އިން މިއަދު ކުރި ޓްވީޓެއްގައި ބުނީ ކޮލަމްބޯ އަށް ދެ ދަތުރު އަދި ކޮޗިން އަށް ދަތުރެއް ކުރަން ހަމަ ޖެހިފައިވާ ކަމަށާއި އަންނަ ބޭނުންވާ ފަރާތްތަކުން ޕާސްޕޯޓް ކޮޕީ އާއި ނަމާއި އެޑްރެސް އަދި ގުޅޭނެ ނަމްބަރެއް ވައިބާ ޕޭޖަށް ފޮނުވަން އެދޭ ކަމަށެވެ.
ދަތުރުތައް ހަމަޖެހިފައިވާ ގޮތް
އާދީއްތަ - މާލެ-ކޮލަމްބޯ. ފުރާ ގަޑި: މެންދުރު ފަހު 3:00.
އާދީއްތަ- މާލެ-ކޮލަމްބޯ. ފުރާ ގަޑި: ރޭގަނޑު 6:56
ހޯމަ: މާލެ-ކޮޗިން. ފުރާ ގަޑި: ރޭގަނޑު، 7:00
ކޮވިޑް-19 ފެތުރޭތީ ލަންކާ އާއި އިންޑިއާއިން އެ ގައުމުގެ ވައިގެ ސަރަހައްދު ބަންދުވުމުން ގިނަ އަދަދެއްގެ ދިވެހިން އެ ދެ ގައުމުގައި ތާށިވުމުން ސަރުކާރުން އައީ މިހައިތަނަށް ވެސް އެ މީހުންނަށް އެހީތެރިވަމުންނެވެ. އެ މީހުންނަށް އާސަންދަ އާއި އެންސްޕާ މެދުވެރިކޮށް އެހީތެރިވެ ދިނުމުގެ އިތުރުން، ލަންކާގައި ތިބި މީހުންނަށް ރާއްޖޭގައި ތިބި އެ މީހުންގެ އާއިލާތަކު ފޮނުވަން ބޭނުންވާ ތަކެތި ފޮނުވައިދިނުމުގެ އިންތިޒާމް ވެސް ވަނީ ހަމަޖައްސައިދީފަ އެވެ.
ކޮރޯނާވައިރަސް އަށް ރާއްޖޭން މިހައިތަނަށް ޕޮޒިޓިވްވި މީހުންގެ އަދަދަކީ 19 އެވެ.
ދުނިޔޭގެ އެކި ކަންކޮޅުތަކުގައި އެ ވައިރަސް އަށް ޕޮޒިޓިވް ވި މީހުންގެ އަދަދަކީ 1,118,245 އެވެ. އޭގެ ތެރެއިން 59,220 މީހުން ވަނީ މަރުވެފަ އެވެ.
