ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ވެބްސައިޓް ހެކްކޮށް ސަރުކާރަށް އިންޒާރުގެ މެސެޖެއް ދީފި އެވެ.
ވެބްސައިޓް ހެކްކޮށް އިންޒާރުގެ ވީޑިއޯއެއް ޕޯސްޓްކުރި ފަހުން ވެބްސައިޓް މިހާރު ވަނީ ޑައުންކޮށްފަ އެވެ. ނަމަވެސް އެ ވީޑިއޯ ޔޫޓިއުބްގައި ވެސް ވަނީ އާންމުކޮށްފަ އެވެ. ހެކްކުރި ވެބްސައިޓަކީ އެޗްޕީއޭގެ ރަސްމީ ވެބްސައިޓެވެ. ކޮވިޑް-19 އާ ބެހޭ ގޮތުން މައުލޫމާތު ހާމަކުރަން ހަދާފައިވާ ހެލްތު މިނިސްޓްރީގެ ޕޯޓަލް އަށް މިކަމުގެ އަސަރެއް ނުކުރެ އެވެ.
ވީޑިއޯގައި ބުނަނީ އެ މީހުންނަނީ ވެބްސައިޓްތައް ހެކްކުރުމާއި ސިއްރުތައް ހާމަކުރުމުގައި މަޝްހޫރު "އެނޮނިމަސް" ކަމަށެވެ. ނަމަވެސް މިކަން ކަށަވަރުވާނެ އެއްވެސް ގޮތެއް ނެވެތެ.
އިންޒާރުގެ މެސެޖުގައި ބުނެފައިވަނީ ކޮވިޑް-19 ފެތުރިފައިވާ މި ހާލަތުގައި ސަރުކާރުން "ކުޅެނީ ޕޮލިޓިކްސް" ކަމަށެވެ. އަދި ދިވެހި ސަރުކާރަށް އިންޑިއާ އިން ނުފޫޒު ފޯރުވާ ކަމަށް ބުނެ ރިޝްވަތުގެ ތުހުމަތުތައް ވެސް ކޮށްފައިވެ އެވެ.
ކުރިމަތިވެފައިވާ ހާލަތުގައި ގައުމުގެ 99 ޕަސެންޓް އާމްދަނީ އަށް ނޭދެވޭ އަސަރުކޮށްފައިވާ ކަމަށާއި އެ މީހުން ތިބީ ދިރިއުޅޭ ތަންތަނުގެ ކުލި ވެސް ނުދެއްކިފައި ކަމަށް، އިނގިރޭސި ބަހުން އޮތް އަޑު އަޅައި، އެނަނިމަސްގެ ލޯގޯ ފެންނަ ގޮތަށް ހަދާފައިވާ ވީޑިއޯގައި ބުނެ އެވެ. އަދި ކޮވިޑް-19ގެ ސަބަބުން ކުރިމަތިވި އިގްތިސާދީ ދަތިކަމުގައި ހާލުގައި ޖެހިފައިވާ އެތައް ބަޔަކަށް ސަރުކާރުގެ އެހީތެރިކަން ނުލިބޭ ކަމަށް ވެސް އޭގައި ބުނެ އެވެ.
މި ކަންކަން އިސްލާހު ނުކުރާ ނަމަ ސިއްރުތައް ހާމަކުރާނެ ކަމުގެ އިންޒާރު ދީ ބުނެފައި ވަނީ އަސާސީ ހިދުމަތްތަކުގެ އަގު ހެޔޮކޮށް ހާލުގައި ޖެހިފައިވާ މީހުންނަށް އެހީތެރިކަން ދޭންޖެހޭނެ ކަމަށެވެ.
ފުލުހުން ބުނީ އެޗްޕީއޭގެ ވެބްސައިޓް ހެކްކުރި މައްސަލަލާގައި ބަލަންޖެހޭ ކަންކަން ބަލަމުން އަންނަ ކަމަށެވެ.
މީގެ ކުރިން ވެސް ސަރުކާރުގެ އެކި އިދާރާތަކުގެ ވެބްސައިޓްތައް ހެކްކޮށްފައިވެ އެވެ.
