އެޗުޕީއޭގެ އެންގުމާ އެކު ރެސްޓޯރެންޓު ޖަމިއްޔާ އަށް ފާޑުކިޔުން

ރަޖިސްޓްރީ ނުކޮށް ގޭގައި ކާބޯތަކެތި ހަދައިގެން ވިއްކާ މީހުންނާ ދޭތެރޭ ފިޔަވަޅު އަޅާނެކަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިއްޔެ އެންގުމާ ގުޅިގެން އެ އޭޖެންސީ އަށާއި ރެސްޓޯރެންޓްތަކުގެ ޖަމިއްޔާ އަށް އާއްމުންގެ ފާޑުކިޔުންތައް ކުރިމަތިވެއްޖެ އެވެ.

ރެސްޓޯރެންޓް އެސޯސިއޭޝަން އޮފް މޯލްޑިވްސް (ރޭމް) އިން ރޭ ނެރުނު ބަޔާނެއްގައި ވަނީ އެޗްޕީއޭގެ އިއުލާނަކީ އެ ޖަމިއްޔާ އިން ކުރި މަސައްކަތުގެ ނަތީޖާ ކަމަށް ބުނެފަ އެވެ. އެޗްޕީއޭއާ އެކު މިދިޔަ މަހު 22ގައި ބޭއްވި ބައްދަލުވުމެއްގައި އެ ޖަމިއްޔާ އިން މި ކަމުގެ ޝަކުވާ ހުށަހެޅިކަން ރޭމްގެ އިސް ބޭފުޅަކު "މިހާރު" އަށް ކަށަވަރުކޮށްދެއްވި އެވެ.

ކޮވިޑާ ގުޅިގެން އައިސްފައިވާ އިގްތިސޯދީ ހީނަރުކަމުގައި އާމްދަނީ ހޯދަން ގޭގައި ކާބޯތަކެތި ހަދައިގެން ވިއްކާ މީހުން ވަނީ އިތުރުވެފަ އެވެ. ހެލްތު އިމަޖެންސީ އޮޕަރޭޝަންސް ސެންޓަރުން ރޭ ނޫސްވެރިންނަށް ބުނީ ގަވާއިދާ ހިލާފަށް ކާބޯތަކެތި ވިއްކާ މީހުން ވަރަށް ބޮޑަށް އިތުރުވެފައިވާ ކަމަށެވެ. އެފަދަ މީހުންނަށް އެއްޗެހި ވިއްކޭނީ ހުއްދަ ނަގައިގެން ކަމަށާއި ރަޖިސްޓްރީކުރަން އެދި ހެލްތު މިނިސްޓްރީގެ އޮންލައިން ޕޯޓަލް މެދުވެރިކޮށް ހުށަހަޅަން އެޗްޕީއޭ އިން ވަނީ އަންގައިފަ އެވެ.

އެޗްޕީއޭގެ އިއުލާނާ ގުޅިގެން ރޭމްގެ ވައިބާ ގްރޫޕުގައި ދައްކާފައި ހުރި ވާހަކަތަކެއް ސޯޝަލް މީޑިއާގައި ރޭ ލީކުކޮށްލާފައިވެ އެވެ. ރޭމްގެ ރައީސް އިބްރާހީމް އާމިރު (ސަލްސާ އާމިރު) އެ އިއުލާން ވައިބަ ގްރޫޕުގައި ހިއްސާކުރެއްވުމުން ބައެއް މީހުން އުފާފާޅުކުރި އިރު އެކަކު ވަނީ، ރަޖިސްޓްރީ ނުކޮށް އޮންލައިންކޮށް ކާބޯތަކެތި ވިއްކާ މީހުންނާއި ފިހާރަތަކަށް ކާބޯތަކެތި ލައިގެން ވިއްކުން "ނައްތާލަން" ރޭމް އިން އެޗްޕީއޭ އަށް ބާރުއެޅުން ކުރިއަށް ގެންދަން ޖެހޭނެ ކަމަށް ބުނެފަ އެވެ.

އާއްމުންގެ ބައެއް މީހުން މިކަން ސިފަކުރަނީ މި ދަތި ހާލަތުގައި ދެކޮޅުނުޖެއްސިގެން އުޅޭ އާދައިގެ މީހުންނާ ދެކޮޅަށް ރެސްޓޯރެންޓް ވިޔަފާރިވެރިންގެ ލޮބީ ގްރޫޕުން ނުކުތުމުގެ ގޮތުގަ އެވެ. މި ގޮތަށް ގޭގައި ތަކެތި ތައްޔާރުކޮށްގެން ވިއްކަނީ މައިގަނޑު ގޮތެއްގައި އަންހެނުންނެވެ.

ކޮވިޑްގެ ހާލަތުގައި ގޭގޭގައި ކާބޯތަކެތި ތައްޔާރުކޮށްގެން ވިއްކުން އިތުރުވުމާ ގުޅިގެން ކެފޭ/ރެސްޓޯރެންޓުތަކުގެ ވިޔަފާރި އަށް ވަރަށް ބޮޑަށް ނޭދެވޭ އަސަރުކޮށްފައިވާ ކަމަށް "މިހާރު"އާ ވާހަކަ ދެއްކެވި ރޭމްގެ އިސް ބޭފުޅާ އެއްބަސްވެވަޑައިގެންނެވި އެވެ. އެކަމަކު އޭނާ ވިދާޅުވީ އެ ޖަމިއްޔާގެ މަގްސަދަކީ އެފަދަ މީހުން ހުއްޓުވުން ނޫން ކަމަށާއި ރެސްޓޯރެންޓުތަކުން ބޯލަނބަން ޖެހޭ ގަވާއިދުތަކަށް އެ މީހުން ވެސް އަމަލުކުރަން ބާރު އެޅުން ކަމަށެވެ.

"އަޅުގަނޑުމެން ނުބުނަން އެ މީހުން ހުއްޓުވާށެކޭއެއް. އެޗްޕީއޭގައި ވެސް އަޅުގަނޑުމެން ބުނީ އެ މީހުން ގަވާއިދަށް ފައްތާށޭ. އަޅުގަނޑުމެން މި ބުނަނީ އަޅުގަނޑުމެންނަށް އޮންނަ ގަވާއިދެއް އެ މީހުންނަށް ވެސް އޮންނަން ވާނެއޭ،" ނަން ނުޖަހަން ޝަރުތުކޮށް އޭނާ ވިދާޅުވި އެވެ.

"އިލީގަލް ވިޔަފާރިކުރާތީ އަސްލު މައްސަލައަކީ. އުސޫލާއި ހަމައިން ބޭރުވަނީ. މިސާލަކަށް [ގަވާއިދުގައި] މި ބުނަނީ ބަދިގޭގައި އަންގި ލައްވަން ޖެހޭނެއޭ، މާސްކު އަޅަން ޖެހޭނެއޭ، ތެޔޮ ހިންދާ ވަޅު ހުންނަން ޖެހޭނެއޭ، ކަޓިން ބޯޑު މިހެން ހުންނަން ޖެހޭނެއޭ. މި ހުރިހާ ކަމެއް އަޅުގަނޑުމެން ކުރަން ޖެހޭ އިރު ގޭގޭގައި އެ ގޮތަށް ނުކުރީމަ ކޮން ތާކުތޯ ޖެހެނީ؟ ދެ ބައި މީހުން ކައްކާފައި ކާންދޭ އެއްޗެހި ވެސް ކަނީ އާއްމުން."

ގާނޫނީ ވަކީލު ޝަފީއާ ރިޒާ ޓްވިޓާގައި ވިދާޅުވިގޮ ތުގައި އަލަށް ވިޔަފާރި ފެށި މީހުން ވެސް ހިމެނޭ ގޮތަށް، މި ދަތި ދަނޑިވަޅުގައި ގެއިން ކާބޯތަކެތި ވިއްކަމުންދާ މީހުންނަށް، އެޗްޕީއޭގެ އެންގުމުގެ ސަބަބުން ނޭދެވޭ އަސަރުކުރާނެ އެވެ. އަދި މީހުންނަށް ވަގުތު ނުދީ މިފަދަ އަމުރެއް ނެރުމުން، ލިބޭ ކުޑަ އާމްދަނީކޮޅު ވެސް ހުއްޓޭނީ ކަމަށް އޭނާ ވިދާޅުވި އެވެ. އެހެން މީހަކު ބުނީ މި ފެންނަނީ "މި ހާލަތުގައި އަމިއްލަ ޖީބު ބޮޑުކުރަން އުޅޭ މީހުން" ކަމަށެވެ. ރޭމްއާ މެދު ހިތްހަމަނުޖެހިގެން ބައެއް މީހުން ވަނީ ރެސްޓޯރެންޓުތައް ބޮއިކޮޓްކުރާނެ ކަމުގެ އިންޒާރު ވެސް ދީފަ އެވެ.

ރަޖިސްޓްރީ ނުކޮށް އޮންލައިންކޮށް އެއްޗެހި ވިއްކާ މީހުން "ނައްތާލަން" ޖެހޭނެ ކަމަށް ބުނީ ޕިއްޒާ ބޯނާގެ ވެރިއެއް ކަމަށް އަޑުއަރާފައި އޮއްވާ އެ ރެސްޓޯރެންޓުން ކުރި ޓްވީޓްތަކަކުން އެއީ ތެދެއްކަން ވަނީ އެނގިފަ އެވެ. ޕިއްޒާ ބޯނާ އިން ބުނީ އެއީ އެ ތަނުގެ ހަތަރު ހިއްސާދާރުންގެ ތެރެއިން އެކެއްގެ އަމިއްލަ ހިޔާލު ކަމަށާއި އޭނާ އެފަދަ ވާހަކަތަކެއް ދެއްކީތީ ހިތާމަކޮށް މައާފަށް އެދޭ ކަމަށެވެ. އަދި ގޭތެރެއިން ހިންގާ ކުދި ވިޔަފާރިތަކަށް ޕިއްޒާ ބޯނާ އިން އަބަދުވެސް ސަޕޯޓް ދޭ ކަމަށާއި އެފަދަ ވިޔަފާރިތަކަށް ސަޕޯޓްކުރާކަން ރޭމް ތެރޭގައި ވެސް ދައްކައިދޭނެ ކަމަށް އެ ރެސްޓޯރެންޓުން ބުންޏެވެ.

ރޭމްގެ އިސް ބޭފުޅާ ވިދާޅުވީ ގޭގެއިން ކާބޯތަކެތި ވިއްކާ މީހުން ރަޖިސްޓްރީކުރަން އެޗްޕީއޭ އިން އެންގީ ރަނގަޅު އެންގުމެއް ކަމަށާއި އެފަދަ މީހުން އަމަލުކުރަން ޖެހެނީ ކޮން އުސޫލުތަކަކަށްތޯ ވެސް އެ ޖަމިއްޔާ އިން ބަލާނެ ކަމަށެވެ.

"ދެން އަޅުގަނޑުމެން ބަލަން ޖެހޭނީ ހަދާފައި ހުރި ގަވާއިދުތައް ކިހިނެއްތޯ ހުރީ. އެޗްޕީއޭގައި އަޅުގަނޑުމެން ސުވާލުކޮށްފައި އޮންނާނީ އެ މީހުންނަށް ހުއްދަ ދޭ ގަވާއިދުތަކަކީ ކޮބައިތޯ،" އޭނާ ވިދާޅުވި އެވެ.

އެޗްޕީއޭގެ އިއުލާނުގައި އޮތީ ރަޖިސްޓްރީ ނުކުރާ ބަދިގެތަކުގައި ކާބޯތަކެތި ތައްޔާރުކޮށް ވިއްކުމާއި ފިހާރަތަކާއި ގޭގޭގައި ކާބޯތަކެތީގެ ބާވަތްތަކާއި ދުންފަތުގެ ބާވަތްތައް އޮންލައިން ޕްލެޓްފޯމްތަކުގަ އާއި އެހެން ގޮތްގޮތަށް އިޝްތިހާރުކޮށް ޑެލިވެރީގެ ހިދުމަތް ދެމުންގެންދާ ކަމުގެ މައުލޫމާތާއި ޝަކުވާ އެ ތަނަށް ލިބެމުންދާ ކަމަށެވެ.

އެޗްޕީއޭ އިން ބުނީ އެއްވެސް ފަރާތަކުން ވިޔަފާރީގެ އުސޫލުން ކާބޯތަކެތީގެ ހިދުމަތް ފޯރުކޮށްދޭ ނަމަ ކާބޯތަކެތީގެ ހިދުމަތް ދިނުމުގައި ހުންނަން ޖެހޭ ސާފުތާހިރުކަމުގެ މިންގަނޑުތައް ބަޔާންކުރާ ގަވާއިދާއި ކަމާ ގުޅޭ އެހެން ގަވާއިދުތަކާ އެއްގޮތަށް ހުއްދަ ނަގަން ޖެހޭނެ ކަމަށާއި ރަޖިސްޓްރީ ނުކުރާ ތަންތަނުން ހިދުމަތް ނުހޯދަން އާއްމުންނަށް އިލްތިމާސްކުރާ ކަމަށެވެ.