އިންޑިއާ ސަރުކާރުގެ އެހީގައި އައްޑޫގައި އަޅާ ޕޮލިސް އެކަޑަމީގައި މަސައްކަތްކުރަން އައި 53 މީހަކު ކޮވިޑް-19 އަށް ޕޮޒިޓިވްވެއްޖެ އެވެ.
އައްޑޫ އިކުއިޓޯރިއަލް ހޮސްޕިޓަލް (އައިއީއެޗް) އިން މިރޭ ބުނީ، ޕޮލިސް އެކަޑަމީގައި މަސައްކަތްކުރަން އައި 128 މީހުންގެ ތެރެއިން ޕޮޒިޓިވްވި އެއްވެސް މީހެއްގެ ފަރާތުން ކޮވިޑްގެ އަލާމާތެއް ނުފެންނަ ކަމަށެވެ. އެ މީހުން ކޮވިޑަށް ޓެސްޓުކުރީ އިންޑިއާ އިން ރާއްޖެ އައިސް ކަރަންޓީން ފުރިހަމަކުރުމަށް ފަހު އެވެ.
އެ ހުރިހާ އެންމެން ވެސް އިތުރު 14 ދުވަހެއް ކަރަންޓީނުގައި މަޑުކުރާނެ އެވެ. އެ މީހުން މިހާތަނަށް ތިބީ ސ. ގަމުގައި ހުންނަ ފުލުހުންގެ ހެޑްކުއަޓާސްގަ އެވެ. އެ އެންމެން ވެސް ރާއްޖެ އައީ ކޮވިޑަށް ޓެސްޓުކުރުމަށް ފަހު ނެގަޓިވްވުމުންނެވެ.
މިހާތަނަށް އައްޑޫން ޕޮޒިޓިވްވެފައި ވަނީ ޖުމްލަ 67 މީހެކެވެ. އޭގެ ތެރެއިން ދެ މީހަކު މިއަދު ރަނގަޅުވެފައި ވުމުން ބަލިން ރަނގަޅުވެފައިވާ މީހުން އަދަދު 14 އަށް މިހާރު ވަނީ އަރައިފަ އެވެ.
މިހާތަނަށް ރާއްޖެއިން 10،000 އަށް ވުރެ ގިނަ މީހުން ވަނީ ކޮވިޑް-19 އަށް ޕޮޒިޓިވްވެފަ އެވެ. އޭގެ ތެރެއިން 9،037 މީހުން ވަނީ ރަނގަޅުވެފަ އެވެ. މި ބަލި ޖެހިގެން މަރުވެފައި ވަނީ 34 މީހުންނެވެ.