އިންޑިއާ ސަރުކާރުގެ އެހީގައި އައްޑޫގައި އަޅާ ޕޮލިސް އެކެޑަމީގެ މަސައްކަތަށް މި މަހު އެ ގައުމުން އައި ބައެއް މީހުންގެ ކަރަންޓީނު ނިންމައި ދޫކޮށްލުމުގެ ކުރިން ކޮވިޑް-19 އަށް ކުރި ޓެސްޓްތައް ޕޮޒިޓިވް ވެއްޖެ އެވެ.
ޕޮލިސް އެކެޑަމީގެ މަސައްކަތަށް އިންޑިއާގެ 128 މީހުން ވެސް އައީ އެ ގައުމުން ޓެސްޓުކޮށް ނަތީޖާ ނެގެޓިވްވުމުންނެވެ. ނަމަވެސް ޗާޓަރު ފްލައިޓެއްގައި ސީދާ އައްޑޫ އަށް ގެންގޮސް އެ އެންމެން ވެސް ތިބީ ކަރަންޓީންކޮށްފަ އެވެ.
އެޗްޕީއޭ އިން ބުނީ އެމީހުންގެ ކަރަންޓީނަށް ފަހު ނެގި ސާމްޕަލްތަކުގެ ތެރެއިން ބައެއް މީހުން ޕޮޒިޓިވްވެފައިވާ ކަމަށެވެ. ނަމަވެސް އެންމެންގެ ސާމްޕަލް ނަގައި އަދި ޓެސްޓުކޮށް ނުނިމޭތީ އޭގެ ތެރެއިން ޕޮޒިޓިވީ ކިތަން މީހުން ކަމެއް އަދި ކަނޑައެޅިގެން ބުނަން ނޭނގޭ ކަމަށް އެޗްޕީއޭ އިން ބުންޏެވެ.
އެޗްޕީއޭއިން ބުނީ ސާމްޕަލް ނެގުމާއި ޓެސްޓުކުރުމުގެ މަސައްކަތްތައް އަދިވެސް ދަނީ ކުރިއަށް ކަމަށެވެ.
އިންޑިއާ އަކީ މިހާރު މުޅި ދުނިޔޭގައި ވެސް ދެ ވަނަ އެންމެ ގިނަ މީހުންނަށް ކޮވިޑް ޖެހުނު ގައުމެވެ. އެ ގައުމުން މިހާތަނަށް ހަ މިލިއަނަށް ވުރެ ގިނަ މީހުން ޕޮޒިޓިވްވެފައިވާއިރު 97،000 އަށް ވުރެ ގިނަ މީހުން ވަނީ މި ބަލީގައި މަރުވެފަ އެވެ.
ރާއްޖޭން މިހާތަނަށް 10،000 އަށް ވުރެ ގިނަ މީހުން ކޮވިޑަށް ޕޮޒިޓިވް ވެފައި ވާއިރު 34 މީހަކު ވަނީ މަރުވެފަ އެވެ. ޕޮޒިޓިވްވި ގިނަ ބަޔަކު ރަނގަޅުވެ މިހާރުގެ އެކްޓިވް ކޭސްތަކުގެ އަދަދަކީ 1,123 އެވެ.
