އައްޑޫގައި ހިންގާ ޕޮލިސް ކޮލެޖުގައި ކާނާ ވިހަވެގެން ހާލު ސީރިއަސްވި ދެ މީހުންގެ ހާލު ވެސް މިހާރު ރަނގަޅު ވަމުން އަންނަ ކަމަށް ފުލުހުން މިއަދު ބުނެފި އެވެ.
ފުލުހުން ބުނީ އެ ހާދިސާގައި ހާލު ސީރިއަސްވެގެން އައިސީޔޫގައި ފަރުވާދިން ދެ ދަރިވަރުންގެ ތެރެއިން އެކަކު މިހާރު ވޯޑަށް ބަދަލުކޮށްފައިވާ ކަމަށެވެ.
"ދެ ދަރިވަރުންގެ ހާލު ވެސް އަންނަނީ ރަނގަޅުވަމުން،" ފުލުހުން ބުންޏެވެ.
ސ. ހިތަދޫގައި ހިންގާ ޕޮލިސް ކޮލެޖުގެ ތަމްރީނަށް ދިޔަ ފުލުހުންގެ ތެރެއިން 32 މީހަކު ކާނާ ވިހަވެގެން އައްޑޫ އިކުއަޓޯރިއަލް ހޮސްޕިޓަލްގައި އެޑްމިޓް ކުރީ މިދިޔަ ބުދަ ދުވަހުގެ ރޭގަ އެވެ. އޭގެ ތެރެއިން ފަސް މީހަކަށް އައިސީޔޫގައި ފަރުވާދިނެވެ.
ކާނާ ވިހަވީ ބޭސިކް ޓްރެއިނިން ފަށާ ބެޗުގެ ދަރިވަރުންތަކެކެވެ.
އެނގިފައިވާ ގޮތުގައި ޕޮލިސް ކޮލެޖުގައި ކޭޓަރިންގެ ހިދުމަތް ދެނީ ބެސްޓް ސިލެކްޝަން ކިޔާ ކުންފުންޏަކުންނެވެ. އެ ކުންފުނީގެ ދަށުން މާލެ އާއި އައްޑޫގައި ވެސް ރެސްޓޯރަންޓުތައް ހިންގަ އެވެ. އަދި ކޭޓަރިންގެ ހިދުމަތް ވެސް އަންނަނީ ދެމުންނެވެ.