ލަންޑަން (އޮކްޓޫބަރު 2) - އިނގިރޭސި ލީގު ކަޕްގެ ހަތަރު ވަނަ ބުރުގައި ޕެނަލްޓީ ޖަހައިގެން 5-4 އިން ލިވަޕޫލް ކަޓުވާލުމަށް ފަހު އާސެނަލުން ކުއާޓާ ފައިނަލުގައި އެންމެ ފަހުގެ ޗެމްޕިއަން މެންޗެސްޓާ ސިޓީއާ ވާދަކުރަން ޖެހިއްޖެ އެވެ.
މިދިޔަ ފަހަރު ލީގު ކަޕްގައި އާސެނަލުން ޕެނަލްޓީ ޖަހައިގެން ލިވަޕޫލް އަތުން ބަލިވި ނަމަވެސް ރޭގެ މެޗުގައި އެ ޓީމުން ކުރި ހޯދީ އެވެ. ރޭ އާސެނަލް މޮޅުކޮށްދިނުމުގެ އެންމެ ބޮޑު ކްރެޑިޓެއް ހައްގުވަނީ އެ ޓީމުގެ ގޯލްކީޕަރު ބާން ލޭނޯ އަށެވެ. ލޭނޯ ވަނީ ލިވަޕޫލްގެ ޑިއޯގޯ ޔޮޓާ ފޮނުވާލި ދެ ބޯޅަ އަކާއި ވާޖިލް ވެން ޑައިކް އަދި މާކޯ ގްރުޔިޗް ފޮނުވާލި ހަމަލާތައް ހުއްޓުވައިފަ އެވެ.
އާސެނަލް މޮޅުކޮށްދޭން އެޑީ އެންކެޓިއޭ އާއި ރޮބް ހޯލްޑިން އަށް ލިބުނު ފުރުސަތުތައް ހުއްޓުވަން ރޭ ލިވަޕޫލްގެ ގޯލު ބެލެހެއްޓި އެޑްރިއާން ވަނީ ރަނގަޅު ކުޅުމެއް ދައްކައިފަ އެވެ.
މެޗުގެ 90 މިނިޓް ހަމަވުމުން ޕެނަލްޓީ ޖެހިއިރު، ލެނޯ ވަނީ ލިވަޕޫލްގެ ޑިވޮކް އޮރީގީ އާއި ހެރީ ވިލްސަން ފޮނުވާލި ޕެނަލްޓީތައް ދިފާއުކޮށްފަ އެވެ. އާސެނަލުން ޖެހި ހަ ޕެނަލްޓީގެ ތެރެއިން ނާކާމިޔާބުވީ މުހައްމަދު އެލްނެނީ ފޮނުވާލި ޕެނަލްޓީ އެވެ. އެ ޓީމުގެ އަލެކްސަންޑަ ލަކަޒޭޓް، ނިކޮލަސް ޕެޕޭ، އެއިންސްލީ މައިޓްލަންޑް-ނައިލްސް، ސެޑްރިކް ސޮއާރޭސް އަދި ޖޯ ވިލޮކް ޖެހި ޕެނަލްޓީ ވަނީ ކާމިޔާބުވެފަ އެެވެ. ލިވަޕޫލުން ޕެނަލްޓީ ކާމިޔާބުކުރީ ޖޭމްސް މިލްނާ، ޖިއޮޖީނިއޯ ވައިނަލްޑަމް، ޓަކޫމީ މިނަމީނޯ އަދި ކާޓިސް ޖޯންސް އެވެ.
މިއީ މި ސީޒަނުގައި އާސެނަލުން ޕެނަލްޓީ ޖަހައިގެން ލިވަޕޫލް ބަލިކުރި ދެ ވަނަ ފަހަރެވެ. އާސެނަލުން ޗެރިޓީ ޝީލްޑް އުފުލާލީ ވެސް ޕެނަލްޓީ ޖަހައިގެން ލިވަޕޫލްގެ މައްޗަށް ކުރި ހޯދުމަށް ފަހު އެވެ.
ކުއާޓާ ފައިނަލުގައި އާސެނަލުން ސިޓީއާ ދެކޮޅަށް ކުޅެން ޖެހޭއިރު، އާސެނަލުން މިދިޔަ ސީޒަނުގެ އެފްއޭ ކަޕްގެ ފައިނަލުން ފުރުސަތު ހޯދީ ސެމީގައި ސިޓީ ކަޓުވާލައިފަ އެވެ.
ލީގު ކަޕްގެ ކުއާޓާ ފައިނަލް މެޗުތައް ޑިސެމްބަރަށް ތާވަލުކުރަން ނިންމާފައިވާއިރު، ދެން އޮތް ކުއާޓާ ފައިނަލް ތިން މެޗުގެ ތެރެއިން އެންމެ ފޯރިގަދަވާނީ އެވަޓަން އާއި މެންޗެސްޓާ ޔުނައިޓެޑް ބައްދަލުކުރާ މެޗެވެ. ހޯސޭ މޮރީނިއޯގެ ޓޮޓެންހަމް ކުޅޭނީ ސްޓޯކް ސިޓީއާ އެވެ. ބްރެންޓްފޯޑް ބައްދަލުކުރާނީ ނިއުކާސަލް ޔުނައިޓެޑާ އެވެ.