ކޭސްތައް އިތުރުވެ، މާލެ ސަރަހައްދުގައި ހަފުލާތަކާއި ރަސްމިއްޔާތުތައް ބޭއްވުން މަނާކޮށްފި

ކޮވިޑް-19 ކޭސްތައް އިތުރުވާން ފެށުމާ އެކު މި ހިނދުން ފެށިގެން މާލެ ސަރަހައްދުގައި ޕާޓީތަކާއި ހަފުލާތަކާއި ރަސްމިއްޔާތުތައް ބޭއްވުން މަނާކޮށްފި އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ޑިރެކްޓަރު ޖެނެރަލް މައިމޫނާ އަބޫބަރު ސޮއިކުރައްވައި މިރޭ ނެރުއްވި އެންގުމުގައިވާ ގޮތުން މާދަމާ ރެއިން ފެށިގެން މާލެ ސަރަހައްދުގައި ދަންވަރު 12 އިން ފަތިހު 4 އާ ދެމެދު މީހުން ބޭރަށް ނުކުމެ އުޅުން ވެސް މަނާވާނެ އެވެ.

މި ވަގުތުން ފެށިގެން، މާލެ ސަރަހައްދުން އެހެން ރަށްރަށަށް ދަތުރުކުރާ އެންމެން ކަރަންޓީނު ކުރުމަށާއި ހުކުރުދުވަހުން ފެށިގެން، ޓޫރިސްޓުން ފިޔަވައި، ރާއްޖެ އިން ބޭރުން އަންނަ އެންމެން 10 ދުވަހުގެ މުއްދަތަށް ކަރަންޓީނު ކުރުމަށް ވެސް އެޗްޕީއޭ އިން ވަނީ ނިންމައިފަ އެވެ.

މާލެ ސަރަހައްދުގައި ފިޔަވަޅުތައް ހަރުކަށިކޮށްފައި މި ވަނީ ވޭތުވެދިޔަ ދެ ތިން ދުވަހު ކޮރޯނާވައިރަހަށް ޕޮޒިޓިވްވާ މީހުންގެ އަދަދު 100 އިން މައްޗަށް ގޮސްފައި ވަނިކޮށެވެ. މިއަދު ވެސް ވަނީ ރާއްޖެ އިން 145 މީހުން ޕޮޒިޓިވްވެފަ އެވެ. އޭގެ ތެރޭން 93 މީހުން ޕޮޒިޓިވްވީ މާލެ ސަރަހައްދުންނެވެ. ރިސޯޓްތަކުން 36 މީހަކު ޕޮޒިޓިވްވި އިރު އަތޮޅު ތެރެއިން ވަނީ 14 މީހަކު ޕޮޒިޓިވްވެފަ އެވެ. ކޭސްތައް އިތުރުވާން ފެށީ އަދަދުތައް ވަރަށް ވަރަށް ބޮޑަށް ދަށަށް ދިއުމަށް ފަހު އެވެ.

Covid-19 ah miadhu 145 meehun positive vejje

The most trusted news source in the Maldives

Mihaaru

ކޮވިޑާ ގުޅިގެން މަނާކުރި ޕާޓީތަކާއި ހަފްލާތަކާއި ރަސްމިއްޔާތުތައް ބާއްވަން އެޗްޕީއޭ އިން އަލުން ހުޅުވާލީ މިދިޔަ މަހު 20 އިން ފެށިގެންނެވެ. އެ ފުރުސަތު ދިނީ ރައްކާތެރިކަމުގެ ފިޔަވަޅުތަކާ އެކު އެފަދަ ހަރަކާތްތައް ބާއްވަން ޝަރުތުކޮށްފަ އެވެ. އެކަމަކު އެޗްޕީއޭ އިން ކަނޑައަޅާފައިވާ އުސޫލަށް އަމަލު ނުކުރާ ތަން ފެނެ އެވެ. ހުއްދަ ލިބުނު ދުވަހު ބޭއްވި ކައިވެނި ޕާޓީއެއްގައި ބަލި ފެތުރި އެތައް ބަޔަކު ޕޮޒިޓިވްވެފައިވެ އެވެ.

ކޮވިޑް ކޭސްތައް އަނެއްކާވެސް އިތުރުވާން ފެށީ އާ އަހަރު ފެށުން ފާހަގަކުރުމުގެ އެއްވުންތަކާއި ދަތުރުފަތުރުގެ ލުއިތަކާ އެކު ކަމަށް ބެލެވެ އެވެ.

ކޮވިޑުން ރަައްކާތެރިވުމަށް މާލެ ސަރަހައްދުގައި މީގެ ކުރިން އިއުލާންކުރި ކާފިއު، ނުވަ މަހަށް ފަހު އުވާލާފައި ވަނީ ޑިސެމްބަރު 19 ގަ އެވެ. އެންމެ ފަހުން ކާފިއު އުވާލި އިރު ބޭރުގައި އުޅުން މަނާ ވަގުތުގެ ގޮތުގައި ހަމަޖައްސާފައި ވަނީ ރޭގަނޑު 12 އިން ފަތިހު ހަތަރަކަށެވެ.

ކޮވިޑާ ގުޅިގެން އެންމެ ފުރަތަމަ ކާފިއު އިއުލާން ކޮށްފައި ވަނީ މިދިޔަ އެޕްރީލް މަހުގެ ތެރޭގަ އެވެ. އަދި އެޕްރީލް 14 އިން ފެށިގެން މާލެ ސަރަހައްދު އެއްކޮށް ލޮކްޑައުން އަކަށް ދިއުމަށް ފަހު، ޖޫން މަހުގެ ތެރޭގައި ލުއި ދޭން ފެށި އެވެ. ލޮކްޑައުން އަށް ފަހު އެންމެ ފުރަތަމަ ހުޅުވާލި އިރު ކާފިއު ގަޑީގެ ގޮތުގައި ކަނޑައެޅީ ރޭގަނޑު 8 އިން ފަތިހު 5 އަށެވެ. އޭގެ ފަހުން މާލެ ސަރަހައްދުން ކޭސްތައް ފެންނަވަރު މަދުވަމުން އައި ވަރަކަށް އެޗްޕީއޭ އިން އޭރު އައީ ކާފިއު ގަޑިތަކަށް ލުއިތައް ދެމުންނެވެ.

ޑިސެމްބަރު 19 ގައި ކާފިއު އުވާލުމަށް ފަހު ވެސް އެޗްޕީއޭ އިން ވަނީ އިތުރު ލުއިތައް ދީފަ އެވެ. އެގޮތުން ކަރަންޓީނުގެ މުއްދަތު 10 ދުވަހަށް މަދު ކުރުމާއި ރާއްޖެއިން ބޭރުން އައިސް ކަރަންޓީން ވާން ނުޖެހުމުގެ އިތުރަށް މާލެއިން ރިސޯޓުތަކަށް ދާއިރު ކަރަންޓީން ވާން ނުޖެހޭ ގޮތަށް ވެސް ވަނީ އުސޫލަށް ބަދަލުތައް ގެނެސްފަ އެވެ.

ކޮވިޑް-19 އަށް ރާއްޖެ އިން ޕޮޒިޓިވްވި އަދަދު މިހާރު ވަނީ 15،200 އަށް އަރައިފަ އެވެ. އެކަމަކު 13،900 އަށް ވުރެ ގިިނަ މީހުން އެ ބަލިން ރަނގަޅުވެފައިވާތީ މި ވަގުތު ފަރުވާ ދެނީ 1،273 މީހަކަށެވެ. ކޮވިޑް-19 ގައި ރާއްޖެ އިން މިހާތަނަށް 51 މީހަކު ވަނީ މަރުވެފަ އެވެ.