ކުރީގެ ސަރުކާރުގައި ހުޅުވާލި ހިޔާ މަޝްރޫއަށް ކުރިމަތިލީ 25،000 އަށް ވުރެން ގިނަ މީހުންގެ ތެރެއިން ފްލެޓް ލިބޭ 6،720 މީހުންގެ ދާއިމީ ލިސްޓު ފްލެޓް ކޮމިޓީން މިރޭ ގެޒެޓްގައި އާއްމުކޮށްފި އެވެ.
ދާއިމީ ލިސްޓު ނެރުނީ ހިޔާ މަޝްރޫއުގައި ހުޅުވާލި 12 ކެޓަގަރީ އާއި ސިވިލް ސާވިސް މުވައްޒަފުންގެ ތެރެއިން ފްލެޓް ކަށަވަރުވާ މީހުން ވަކިން އެނގޭ ގޮތަށެވެ. ހިޔާ މަޝްރޫއުގެ ފްލެޓުގެ އަދަދަކީ 7،000 ކަމަށް ކުރީގެ ސަރުކާރުން ކަނޑައަޅާފައި ވިޔަސް ފްލެޓްތަކުގެ ގްރައުންޑް ފްލޯ، ޓަވަރުތަކުގައި ދިރިއުޅޭ މީހުންގެ އަސާސީ ބޭނުންތަކުގެ ވިޔަފާރި އަށް މި ސަރުކާރުން ޚާއްސަކުރުމުން އެ އަދަދު 6،720 ފްލެޓަށް ބަދަލުވީ އެވެ.
ރައީސް އޮފީހުގެ ބެލުމުގެ ދަށުގައި އޮންނަ ފްލެޓް ކޮމިޓީން ބުނިގޮތުގައި ދާއިމީ ލިސްޓުތައް މި އިއުލާންކުރީ ކުރިން ޕޮއިންޓް ދީފައި ވަނީ އުސޫލާ އެއްގޮތަށްތޯ ބަލައި ކަށަވަރު ކުރުމަށް ފަހު އެވެ. ދާއިމީ ލިސްޓް އިއުލާންކޮށްފައި ވިޔަސް ފްލެޓް ހަވާލުކުރުމުގެ ކުރިން ހައުސިން މިނިސްޓްރީން އިތުރަށް ބަލާނެ އެވެ.
ފްލެޓް ލިބޭ މީހުންގެ ލިސްޓުތަކުގެ އިތުރަށް އެކި ކެޓަގަރީތަކަށް ފޯމު ހުށަހެޅުމަށް ޝަރުތު ހަމަވެ ފްލެޓް ލިބިފައި ނުވާ މީހުންގެ ލިސްޓު ވެސް އާއްމުކުރި އެވެ. ފްލެޓަށް އެ ކެޓަގަރީއަކުން ޝަރުތު ހަމަނުވާ ލިސްޓު ސަބަބުތައް ވެސް ހިމަނާފައިވެ އެވެ.
ކޮމިޓީން ބުނީ ދާއިމީ ލިސްޓުތައް އިއުލާންކުރީ ވަގުތީ ލިސްޓަށް ޝަކުވާ ހުށަހަޅަން ހުޅުވާލި މުއްދަތުގައި ލިބުނު ހުރިހާ ޝަކުވާތަކަކަށް ލިއުމުން ޖަވާބު ދިނުމަށް ފަހުގައި ކަމަށެވެ.
ކުރީގެ ސަރުކާރުގައި ފްލެޓް ދޫކުރި ގޮތާ ގުޅޭ ގޮތުން ކުރި ޝަކުވާތައް ބެލުމަށް މި ސަރުކާރުގައި އެކުލަވާލި ފްލެޓް ކޮމިޓީން ބުނީ ފޯމުތައް އަލުން އިވެލުއޭޓްކޮށް ޕޮއިންޓް ދިނީ ކުރީގެ ސަރުކާރުގައި އިއުލާންކޮށްފައިވާ ކްރައިޓީރިއާ އަށް ކަމަށެވެ. ބަދަލު އައީ ދިރިއުޅުމުގެ ހާލަތުގެ ބަޔަށް ކަނޑައެޅި 30 ޕޮއިންޓަށެވެ.
ކުރީގެ ސަރުކާރުގައި ދިރިއުޅުމުގެ ހާލަތުގެ ބައިން ޕޮއިންޓް ދިނީ ފޯމުގައި ބަޔާންކުރި ވާހަކަތަކަށް ބަލައިގެންނެވެ. ގެތަކަށް ގޮސް ހާލަތެއް ނުބަލަ އެވެ. އެކަމަކު މިފަހަރު ހުރިހާ ގެތަކަށް ވެސް ގޮސް ހާލަތު ބެލި ކަމަށް ފްލެޓް ކޮމިޓީން ބުނެ އެވެ.
ފްލެޓް ކޮމިޓީއާ ހަވާލުކުރީ ހިޔާ މަޝްރޫއަށް ހުށަހެޅި ހުރިހާ ފޯމުތަކެއް އޭރު އިއުލާންކުރި ޝަރުތުތަކާއި އުސޫލްތަކާ އެއްގޮތަށް އެންމެންނަށް އެއް ހަމައަކުން ޕޮއިންޓް ދީފައިވޭތޯ ބެލުމަށެވެ.
"އަޅުގަނޑުމެން އެއްވެސް މީހަކަށް ވަކި ގޮތެއް ހަދާފައެއް ނޯންނާނެ. ހުރިހާ ފޯމެއް ވެސް އިވެލުއޭޓްކޮށްފައި ވާނީ 2018 ގެ އުސޫލްތަކާ އެއްގޮތަށް އެންމެންނަށް އެއް ހަމައަކުން ޕޮއިންޓް ދީފައި ވާނީ،" ކޮމިޓީގައި އިސްކޮށް އުޅޭ މުވައްޒަފަކު ވިދާޅުވެފައިވެ އެވެ.
ހިޔާ ފްލެޓްތަކުގެ ހުރިހާ މަސައްކަތެއް އަންނަ މަހަށް ނިންމާނެ ކަމަށް އެޗްޑީސީން އޮތީ ބުނެފަ އެވެ. ފްލެޓްތައް ހަވާލުކުރަން ނިންމާފައި ވަނީ ފިނިޝިން ނުނިންމަ އެވެ. އެކަމަށް ވަކި މުއްދަތެއް ފްލެޓް ލިބޭ މީހުންނަށް ދޭން ނިންމާފައިވާއިރު، އެ މުއްދަތުގައި ކުއްޔެއް ނުނަގާނެ ކަމަށް ވެސް އެޗްޑީސީން ބުނެ އެވެ.