މި މަހު އަމަލުކުރަން ފަށާ ފުލުހުންގެ އާ ގާނޫނާ އެކު އެ މުއައްސަސާއަށް ގިނަ ބަދަލުތަކެއް އަންނާނެ ކަމަށާއި އެ ގާނޫނުގެ ސަސަބަބުން ފުލުހުން މިހާރަށް ވުރެ ޒިންމާދާރު ކުރެވޭނެ ކަމަށް ޕޮލިސް ކޮމިޝަނަރު މުހައްމަދު ހަމީދު ރޭ ވިދާޅުވެއްޖެ އެވެ.
ދ. ވާނީގައި ރޭ ބޭއްވި 32 ވަނަ ޕޮލިސް ރެކްރޫޓް ޓްރެއިނިން ކޯހުގެ ދަސްވެނިވިވުމުގެ ހަފުލާގައި ކޮމިޝަނަރު ވިދާޅުވީ މި މަހުގެ 27 ވަނަ ދުވަހު އަމަލުކުރަން ފަށާ ގާނޫނާ އެކު، ފުލުހުންގެ ގާބިލްކަން އިތުރުކުރަން އާ ތަމްރީންތަކާއި ފްރޭމްވޯކްތަކެއް ވެސް ތައާރަފްވާނެ ކަމަށެވެ.
"ފުލުހުންގެ ގާބިލްކަން އިތުރުކުރުމަށް ބޭނުންވާ ތަމްރީންތައް ހިންގުމާ، ތަމްރީންތައް އެކުލަވާލުމާ ތަމްރީންތައް ހަދާ މާހައުލާއި ފުލުހުންގެ ހިދުމަތުގެ އިންފްރާސްޓްރަކްޗާއަށް މިއިން ދުވަހަކު ނުގެނެވުނު ޒަމާނީ ބަދަލުތައް ގެނެވިގެން ދާނެ،" އޭނާ ވިދާޅުވި އެވެ.
ފުލުހުންގެ މުއައްސަސާ އަށް ގެންނަން ކަނޑައަޅާފައިވާ ބަދަލުތައް ހާސިލްކުރަން ސަރުކާރުން ދެމުން އަންނަ އެއްބާރުލުމަށް އެ ރަސްމިއްޔާތުގައި ހަމީދު ޝުކުރުއަދާކުރެއްވި އެވެ.
މީގެ އިތުރުން ފުލުހުންގެ މަސައްކަތްތައް ދެން ކުރިއަށްގެންދާނީ، މިހާރަށް ވުރެ ވެސް ބޮޑަށް މުޖްތަމައުއާ ގުޅިގެން ކަމަށް ވިދާޅުވި އެވެ. އަދި އެ ގޮތަށް މަސައްކަތްކުރަން އަލަށް ގުޅުނު ފުލުހުންނަށް އިލްތިމާސްކުރެއްވި އެވެ.
ރޭގެ ރަސްމިއްޔާތުގައި ފުލުހުންގެ އަސާސީ ތަމްރީނު ފުރިހަމަކުރި 23 އަންހެނުންނާއި 66 ފިރިހެނުން ވަނީ ދަސްވެނިވެފަ އެވެ.
