ވޭތުވެދިޔަ 24 ގަޑިއިރުގެ ތެރޭގައި ރާއްޖެއިން ކޮވިޑް-19 އަށް 253 މީހަކު ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިރޭ ބުނެފި އެވެ.
އެޗްޕީއޭ އިން ބުނީ ހަވީރު 6:00 އިން ފެށިގެން މިއަދު ހަވީރު 6:00 އާ ހަމައަށް 3،286 ސާމްޕަލެއް ޓެސްޓްކޮށްފައިވާ ކަމަށެވެ. އޭގެ ތެރެއިން އަށް ޕަސެންޓް އެ ވަނީ ބައްޔަށް ޕޮޒިޓިވްވެފަ އެވެ.
މާލޭ ސަރަހައްދުން 111 މީހަކު ކޮވިޑަށް ޕޮޒިޓިވްވެފައިވާ އިރު ރަށްރަށުން ޕޮޒިޓިވްވެފައި ވަނީ 61 މީހެކެވެ. ރިސޯޓުތަކުން 68 މީހަކު ޕޮޒިޓިވްވެފައިވެ އެވެ. އެޗްޕީއޭ އިން ބުނި ގޮތުގައި ސިނާއީ ރަށްތަކުން ވެސް 17 މީހަކު ވަނީ ފާއިތުވި 24 ގަޑިއިރުގެ ތެރޭގައި ޕޮޒިޓިވްވެފަ އެވެ.
މިއާ އެކު ރާއްޖެއިން ކޮވިޑް ޖެހުނު މީހުންގެ ޖުމްލަ އަދަދު 26،920 އަށް ވަނީ އަރައިފަ އެވެ. އެ މީހުންގެ ތެރެއިން މިހާރު ބަލިން ރަނގަޅު ނުވެ ތިބީ 2905 މީހެކެވެ.
ކޮވިޑް ޖެހިފައިވާ 81 މީހަކަށް ހޮސްޕިޓަލުގައި ދަނީ ފަރުވާދެމުންނެވެ. އަދި އެ ބަލީގައި 71 މީހަކު ވަނީ މަރުވެފަ އެވެ.
މިފަހުން ރަށްރަށަށް ކޮވިޑް ބަލީގެ ބިރު ބޮޑުވެފައިވާއިރު މިވަގުތު ވެސް 19 ރަށެއް އޮތީ މޮނިޓަރިންގެ ހާލަތަށް ގެނެސްފަ އެވެ.
