މިއީ ދިވެހިންނަށް ލިބުނު ފަހުރުވެރި ކާމިޔާބީއެއް: ޝާހިދު

އދ.ގެ އާއްމު މަޖިލީހުގެ ރައީސަކަށް ހޮވިވަޑައިގަތުމަކީ ހުރިހާ ދިވެހިންނަށް ވެސް ލިބުނު ވަރަށް ބޮޑު ކާމިޔާބީއެއް ކަމަށާއި އަދި މިއަދަކީ ދިވެހިން ވަރަށް ފަހުރުވެރިވާނެ ދުވަހެއް ކަމަށް ވެސް ފޮރިން މިނިސްޓަރު އަބްދުﷲ ޝާހިދު މިރޭ ވިދާޅުވެއްޖެ އެވެ.

އދ. ގެ 76 ވަނަ އާންމު މަޖިލީހުގެ ރައީސަކު ހޮވުމަށް ނިއު ޔޯކުގައި މިރޭ 7:00 ގައި ބޭއްވި އިންތިހާބުގައި ބޮޑު ކާމިޔާބީއެއް ހޯއްދެވުމަށް ފަހު ދެއްކެވި ވާހަކައިގައި ޝާހިދު ވިދާޅުވީ މިއީ ތާރީހުގައި ވެސް އދ. ގެ މިހާ އިސް މަގާމަކަށް ދިވެއްސަކު އިންތިހާބުކުރި ފުރަތަމަ ފަހަރު ކަމަށެވެ.

މި އިންތިހާބު ޝާހިދު ކާމިޔާބު ކުރެއްވީ ވޯޓުލުމުގައި ބައިވެރިވި އދ. ގެ މެމްބަރު 191 ގައުމުގެ ތެރެއިން 143 ގައުމެއްގެ ވޯޓާ އެކު އެވެ. މި އިންތިހާބުގައި ޝާހިދާ ވާދަކުރެއްވި އަފްގާނިސްތާނުގެ ކުރީގެ ފޮރިން މިނިސްޓަރު ޑރ. ރަމްލައި ރަސޫލަށް ލިބިވަޑައިގަތީ 48 ވޯޓެވެ.

"މި މަތިވެރި އދ.ގެ މަޖިލީހުގައި، މި މަޖިލީހުގެ ރައީސްކަމުގެ މަގާމަށް އިންތިޚާބުވި ރައީސްގެ ގޮތުގައި ހުރެ، ދިވެހިންގެ ފަޚުރުވެރި ބަހުން، މިއަދު އަޅުގަނޑު މި އުފުލަނީ ދިވެހި ރައްޔިތުންގެ ފަޚުރުވެރި އަޑު،" ޝާހިދުގެ ވާހަކަ ފައްޓަވަމުން ދިވެހި ބަހުން ވިދާޅުވި އެވެ.

"މިއަދު ދުނިޔޭގެ ހުރިހާ ގައުމުތަކެއްގެ އިތުބާރާއި ޔަގީންކަން ދިވެހިރާއްޖެ އަށް ލިބިގެން ދިއުމުން، ސާބިތުވެގެން މި ދިޔައީ، މުޅި ދުނިޔެ، މިއަދު ރާއްޖެ ބަލައިގެންފައިވާކަން."

ދިވެހި ރައްޔިތުންގެ ނަމުގައި ދުނިޔޭގެ ހުރިހައި ގައުމަކަށް އޭނާ ޝުކުރު އަދާކުރެއްވި އެވެ.

މިއީ އދ. ގެ 75 އަހަރުވީ ތާރީހުގައި އަދި ރާއްޖެ އދ. ގެ މެމްބަރެއްގެ ގޮތުގައި މިވީ 55 އަހަރުގެ ތާރީހުގައި އެ ޖަމާއަތުގެ ރައީސްއަކަށް ދިވެއްސަކު އިންތިހާބު ކުރި ފުރަތަމަ ފަހަރެވެ.

"ސްމޯލް އައިލަން ޑިވެލޮޕިން ސްޓޭޓްގެ ހަ ވަނަ ރައީސަކަށް އަޅުގަނޑު ހޮވިފައިވުމީ، އަޅުގަނޑު ގަބޫލުކުރާ ގޮތުގައި، މިއީ އަޅުގަނޑުމެންނަށް ދިވެހިރާއްޖެ ތަމްސީލުކުރުމާއި ގާތަށް އެޅުނު ފިޔަވަޅެއް،" ޝާހިދު ވިދާޅުވި އެވެ.

ޝާހިދަކީ ޚާރިޖީ ދާއިރާގައި މީގެ އެތައް އަހަރު ކުރިއްސުރެ ފެށިގެން މަސައްކަތް ކުރައްވަމުން ގެންދަވާ އެ ދާއިރާގައި ރާއްޖެ އިން އެންމެ ތަޖުރިބާކާރު އެއް ބޭފުޅާ އެވެ.

ފުރަތަމަ ޒިންމާއަކަށް ވާނީ ކޮވިޑުން އަރައިގަތުން

އާއްމު މަޖިލީހުގެ އާ ރައީސް ކަމާ ހަވާލުވެވަޑައިގެން، އެންމެ ފުރަތަމަ ޚާއްސަ އިސްކަމެއް ދެއްވާނީ ކޮވިޑް-19ގެ ހާލަތު އަރައިގަތުމަށް ދުނިޔެ ކުރާ މަސައްކަތަށް އެއްބާރުލުން ދެއްވުން ކަމަށް ޝާހިދު ވިދާޅުވި އެވެ.

ޝާހިދު ވިދާޅުވީ ތަފާތުކުރުމެއް ނެތި އެންމެނަށް ވެސް ވެކްސިން ލިބެންޖެހޭ ކަމަށާއި ކޮވިޑްގެ ހާލަތުން އަވަހަށް އަރައިގަނެވޭނީ ގިނަ ބަޔަކަށް ވެކްސިން ދެވިގެން ކަމަށެވެ.

"މުޅި ދުނިޔެ ވެކްސިނޭޓް ކުރަން ޖެހޭ! އާދެ! ހުރިހާ މީހުންނަށް ރައްކާތެރިކަން ލިބެންދެން އެއްވެސް މީހަކީ ސަލާމަތްކަން ލިބިފައިވާ މީހެއް ނޫން،" ޝާހިދު ވިދާޅުވި އެވެ.

ޝާހިދު ފާހަގަކުރެއްވި އިތުުރު މުހިންމު ބައެއް ކަންކަން

- ކުރިއަށް ވުރެ ވަރުގަދަ، ފެހި އަދި ނޫ މުޖުތަމައުއެއް ބިނާކުރުމުގައި އެއްވެސް މީހެއް، އެއްވެސް ގައުމެއް ބާކީ ނުކޮށް ކުރިއަށް ދިޔުމަށްޓަކައި މަސައްކަތް ކުރުން.

- އދ. ގެ 76 ވަނަ މަޖިލިސް ވެގެންދާނީ ގުދުރަތީ މާހައުލަށް ހާއްސާ މަޖިލީހަކަށް.

- ސީއޯޕީ 26 އޮން ކްލައިމެޓް ޗޭންޖް، ދަ އޯޝަން ކޮންފަރެންސް، އެމް ބަޔޯޑައިވަރސިޓީ އަދި ސީއޯޕީ 15 އޮން ޑައިވަރސިފިކޭޝަން، ދަ އެނާރޖީ ޑައިލޮގް، ކޮންފަރެންސަސް އޮން ސަސްޓެއިނަބަލް ޓްރާންސްޕޯޓް އެންޑް ފުޑް ސިސްޓަމްސް ފަދަ ގިނަ ބައްދަލުވުންތަކާއި ކޮންފަރެންސްތައް އޮންނާނެ.

- އާއްމު މަޖިލީހުގައި ޒުވާނުންގެ އަޑު އިތުރުކޮށް، ޒުވާނުންނަށް އޮތް ޖާގަ އިތުރުކޮށްދިނުން.

- ޖިންސީ ހަމަހަމަ ކަމަށް ވަކާލާތުކޮށް، ޖިންސީ ތަފާތުކުރުންތަކާއި ދެކޮޅަށް އަޑު އުފުލާނެ.

- އަންހެނުންނާއި ފިރިހެނުންގެ ހަމަހަމަ ކަން ނެތް އެއްވެސް ޕެނަލްއެއްގައި ބައިވެރިނުވާނެ ކަމަށް ވިދާޅުވި.

"ފާއިތުވި ހަފްތާތަކުގައި 193 މެމްބަރު ގައުމެއްގެ އިސް އޮފިޝަލުންނާއި ބައްދަލުކޮށް އަޅުގަނޑުގެ ތަސައްވުރު ވަނީ ހާމަ ކޮށްދީފައި. އެ ބޭފުޅުންގެ ހިޔާލުފުޅުތައް ވެސް ހޯދިން،" އެ ފަރާތްތަކުގެ ސުވާލުތަކަށް ޖަވާބު ދެވިފައިވާ ކަމަށް އުއްމީދުކުރައްވާ ކަމަށް ޝާހިދު ވިދާޅުވި އެވެ.

"އަޅުގަނޑަކީ އަޅުގަނޑު ބުނާ ބަހުގައި ހިފަހައްޓާނޭ މީހެއް ކަމުގެ ޔަގީން ކަން އަރުވަން. އަޅުގަނޑުގެ ވައުދުތައް އަޅުގަނޑު ފުއްދާނަން. އެކަމުގައި އެއްވެސް ޝައްކެއްނެތް ކަމުގައި ދަންނަވަން."

އަންނަ ސެޕްޓެމްބަރު 14 ގައި ފެށޭ އާއްމު މަޖިލީހުގެ 76 ވަނަ ދައުރުގައި އޭޝިއާ ޕެސިފިކް ސަރަހައްދުގެ ފަރާތުން ރިޔާސަތު ބަލަހައްޓަވަން ފޮރިން މިނިސްޓަރު ޝާހިދު ނޮމިނޭޓްކުރެއްވީ ރައީސް އިބްރާހިމް މުހައްމަދު ސޯލިހު އެވެ. މިއީ އދ. ގެ އާއްމު މަޖިލީހުގެ ރިޔާސަތަށް ރާއްޖެއިން ކުރިމަތިލި ފުރަތަމަ ފަހަރެވެ. އަދި މި ކާމިޔާބީއާ އެކު ރާއްޖެ ވެގެން މި ދިޔައީ ތަރައްގީވަމުން އަންނަ ކުދި ޖަޒީރާ ގައުމުތަކުގެ ތެރެއިން އދ. ގެ ރިޔާސަތު ބަލަހައްޓާ ހަ ވަނަ ގައުމަށެވެ.

އދ. ގެ އާއްމު މަޖިލީހަކީ އެ ޖަމާއަތުގެ މައިގަނޑު ހަ ގުނަވަނުގެ ތެރެއިން އެއް ގުނަވަނެވެ. އަދި މިއީ ސިޔާސަތު ކަނޑައެޅުމާއި މަޝްވަރާކުރުމުގެ މައިގަނޑު ގުނަވަން ވެސް މެ އެވެ. އދ. ގެ އާއްމު މަޖިލީހުގެ ޖަލްސާތަކުގެ ރިޔާސަތު ބަލަހައްޓަވާނީ އެ މަޖިލީހުގެ ރައީސް އެވެ. އަދި އާއްމު މަޖިލީހުގެ ރައީސް، ބައިނަލްއަގުވާމީ ބައްދަލުވުންތަކާއި ސަރަހައްދީ ބައްދަލުވުންތަކުގައި އދ. ގެ މުޅި މެމްބާޝިޕް ތަމްސީލްކުރައްވާނެ އެވެ.

ރާއްޖެ، އދ. ގެ މެމްބަރު ގައުމަކަށްވީ މިނިވަންކަން ލިބުނުތާ ދާދި ކުޑަ ދުވަސްކޮޅެއް ފަހުން، ސެޕްޓެމްބަރު 21، 1965 ގަ އެވެ.