ވިލާ ކޮލެޖުން ސެޕްޓެމްބަރު އިންޓޭކަށް ހުޅުވާލައިފި

ވިލާ ކޮލެޖުގައި އަންނަ ސެޕްޓެމްބަރު ފެށުމަށް ހަމަޖެހިފައިވާ ކޯސްތަކުގައި ބައިވެރިވުމުގެ ފުރުސަތު ހުޅުވާލައިފި އެވެ.

މި އިންޓޭކުގައި އެ ކޮލެޖްގެ އަމިއްލަ ކޯސްތަކާއި އިނގިރޭސިވިލާތުގެ ޔުނިވާސިޓީ އޮފް ދަ ވެސްޓް އޮފް އިންގްލެންޑްގެ މާސްޓާސް އަދި ފުރަތަމަ ޑިގްރީގެ ކޯސްތައް ހިމެނެ އެވެ. ވަޒީފާގެ މައިދާނަށް އެންމެ އެކަށީގެންވާ އިންޑަސްޓްރީތަކުން ބަލައިގަންނަ މިންވަރަށް މި ކޯސްތަކުން ތަމްރީނު ލިބޭނެ ކަމަށް ވެސް އެ ކޮލެޖުން ބުނެފައިވެ އެވެ.

ކޯސްތަކުގައި ބައިވެރިވާން ފޯމު ހުށަހަޅަން ޖެހޭ އެންމެ ފަހުގެ ތާރީހަކީ އަންނަ އޮގަސްޓް 28 ވަނަ ދުވަހެވެ. ކޯސްތަކުގެ ކިޔެވުން ފަށަން ހަމަޖައްސާފައި ވަނީ ސެޕްޓެމްބަރު މަހުގެ 3 ވަނަ ހަފްތާ ތެރޭގަ އެވެ.

ސެޕްޓެމްބަރު އިންޓޭކުގައި ފަށާ ކޯސްތަކުގެ ތެރޭގައި އޮންލައިން، ބްލެންޑެޑް އަދި ފޭސް ޓު ފޭސްކޮށް ކިޔެވޭ ކޯސްތައް ހިމެނެ އެވެ. ތަފާތު އެކި ދާއިރާތަކުން 117 ކޯހެއްގައި ބައިވެރިވުމުގެ ފުރުސަތު ވަނީ ހުޅުވާލައިފަ އެވެ.

ސެޕްޓެމްބަރު އިންޓޭކްގައި މާސްޓަސް ފެންވަރުން ފެށިގެން ސެޓްފިކެޓް ލެވެލް 2 ގެ ކޯސްތަކެއް ފެށުމަށް ހަމަޖެހިފައިވެ އެވެ. އޭސީސީއޭ ކިޔަވާ ދަރިވަރުންނަށް ހާއްސަކޮށް އެޕްލައިޑް އެކައުންޓިން ކޯސްތަކުގައި ބައިވެރިވުމުގެ ފުރުސަތު ވެސް ވަނީ ހުޅުވާލައިފަ އެވެ.

ވިލާ ކޮލެޖުން ވަނީ ދަރިވަރުން ފީ ދެއްކުމަށް ފަސޭހަގޮތްތަކެއް ހޯދައިދިނުމުގެ ގޮތުން މަހުން މަހަށް ފައިސާ ދެއްކޭ ގޮތް ހަމަޖައްސައިދީފަ އެވެ. އަދި ބެޗްލާސް ޑިގްރީގެ ހުރިހާ ކޯސްތަކެއްގައި ސަރުކާރުން ހަމަޖައްސާފައިވާ ފުރަތަމަ ޑިގްރީއަށް ހިލޭ ކިޔެވުމުގެ ސްކީމްގެ ދަށުން އެ ކޮލުޖުގެ ކޯސްތަކުގައި ބައިވެރިވެވޭނެ އެވެ.

ވިލާ ކޮލެޖުގެ ހުރިހާ ކެމްޕަސްތަކެއްގައި ވެސް މި ކޯސްތައް ފެށުމަށް ހަމަޖެހިފައިވާއިރު، ވިލާ ކޮލެޖްގެ އަށް ކެމްޕަހެއް މާލެ، ހުޅުމާލެ އަދި އަތޮޅުތަކުގައި ހިމެނެ އެވެ.